Kaba da shem da lade bad kaba shu tip pateng ka don ka jingiapher kaba khraw. Ki briew ki lah ban iathuh khana sngewtynnad katno katno ruh ia kano kano ka jaka (tourist spot), hynrei bad kaba phi mad da lade ka iapher shibun. Ha ka juh ka rukom ha kaba iadei bad ka jingshem ia U Jisu Khrist, kaba shu tip pateng bad kaba ngi da mad bad shem da lade ka don ka jingiapher kaba bak lybak. Dei namarkata ka daw ngim dei ban sngewhun tang ha kata ka jingtip pateng, hynrei to ngin da mad da lade, ngin da experience da lade ia U Trai Jisu.
1. Kaba shem lade ka pynlah ban ñiewduh ia kiei kiei baroh:
U Jisu u kren ia ka pharshi shaphang ka jingkynshew ba la buhrieh, bad u mawlynnai bakordor.
Mat 13:44, "Pat, ka hima ki bneng ka long kum ka jingkynshew ia kaba la buhrieh ha ka lyngkha, ia kaba u briew u la shem, bad u la buhrieh; te na kaba kmen u leit noh bad u die noh ia kiei kiei baroh katba u don, bad u thied ia kata ka lyngkha.
Une u briew tangba un ioh ia kata ka jingkynshew, u la hap ban thied ia kata ka lyngkha ba don kata ka jingkynshew, bad ba un ioh ia kata ka lyngkha u la hap ban die lut ia kiei kiei baroh, lada um die lut un ym ioh ia kata ka lyngkha. Ma ngi ruh ba ngin ioh ia ka bneng, ngi hap ban ioh shuwa ia U Jisu, bad ban ioh ia U Jisu ngi hap ban die lut ia kiei kiei baroh ki jong ka pyrthei.
Shuh shuh ngi iohi ha ka gospel u Mat 13:45-46, ka ong, "Pat, ka hima ki bneng ka long kum u nongkhaïi uba wad ia ki mawlynnai bakordor; bad haba u la shem ia uwei u mawlynnai uba kordor, u la leit die noh ia kiei kiei baroh katba u don bad u la thied ia uta."
Hangne ngi iohi ia kita ki briew kiba shem da lade ia kata ka jingkynshew, bad uta u mawlynnai bakordor, bad kata ka jingshem ka la pynlong ia ki ba ki lah ban die lut ia kiei kiei baroh.
U Apostol Paul u ong, "na ka bynta jong u, nga ñiew duh lut ia kiei kiei baroh..." Phil 3:7-8. Kaei kaba pynlah ia u ban leh kumta? Ka dei kaba u lah shem da lade ia U Khrist. Ha ka lynti sha Damaskos u la iashem ia U Trai da lade. Kam 9:1-19. Bad naduh kata ngi iohi u la kheiñ duh wat ia la ka jingim.
Ka Nong Samaria, ka briew kaba pop, kaba im ha ka jingklim bad jingawria, hynrei haba ka la ia shem bad U Trai Jisu markhmat, ka la iehnoh ia kita ki jingsngewbha ka doh baroh. Ioannis 4:1 ter ter.
Balei ngim lah ban ñiewduh ia kiei kiei baroh ha ka jingim jong ngi? Ioh lehse ngim pat da shem, da mad da lade.
2. Kaba shem lade ka pynlong ba ngin nym lah ban shu sngap jar:
Kaba sngewtynnad shuh shuh ka long ba kaba shem da lade ka ai ruh ka jingshlur ban phla bad iathuh lem sha kiwei pat. Kane ka nong Samaria haba ka la shem ia U Jisu, ka la mareh ban iathuh lem sha ki para shnong jong ka. Ioannis 4:28-29; 39. Bad haba kine ki Nong Samaria ki la ia wan, ki la ong ba mynta ym tang namar ka jingong jong pha, hynrei mynta ngi la shem da lade. (Ioannis 4:41-42). Kine ruh ki la shem da lade, ym tang namar ba kata ka Nong Samaria ka iathuh pateng.
U Nongrwai Salm u ong, "Ah to mad bad to khmih ba U Trai u long uba bha" Salm 34:8. Hooid U Trai u long da shisha uba bha, hynrei lada ngim pat mad da lade, ngin nym pat lah eh ban sngewthuh haduh katno kata ka jingbha U Trai. Dei haba ngi la mad da lade ngin sngewthuh haduh katno U long da shisha uba bha.
Paralok baieit, hato ngi lah shem ne em ia U Trai? Lada ngim pat shem, kadei ka por ban wad ia u da ka dohnud baroh, kumba long uta u briew uba la shem ia ka jingkynshew ba la buhrieh.
Jer 29:13, "Bad phin wad ia nga, bad phin shem ia nga, haba phin wad ia nga da ka dohnud baroh"
Ka jingkyntu ka long to ngin nym sngewhun tang ha ka jingtip pateng shaphang U Jisu, hynrei to ngin da mad, da shem da lade. Kumba ngi la iohi kumno kata kaba shem da lade ka don ka jingiapher bakhraw. Ka pynlah ban ñiewduh ia kiei kiei baroh ki jong ka pyrthei, ka pynlah ruh ban phla ia U Trai sha kiwei pat.
Kane ka long ka jinghikai ba nga don ban wanrah shaphi ha kane ka por. To U Blei un kyrkhu iaphi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 28-03-2021
Comments
Post a Comment