Ha kane ka por ngin ia peit ia kaei kaba jia ha ka sngi jingmihpat jong U Trai Jisu Khrist, bad aiu ka don ban kren na ka bynta jong ngi ki bangeit ha U.
Mathaios 28:1-10
Haba ngi pule ha kane ka lynnong naduh ka dkhot ba nyngkong haduh ka dkhot ba shiphew ngin iohi ia kaei kaba la jia bad ia kaei ba ka Ktien jong U Blei ka don ban kren na ka bynta jong ngi. To ngin ia peit.
1. U Angel u la pyntyllun noh ia u mawkhang - v.2
Paralok baieit, lehse phi la ia kynduh ia ka jingeh ha ka jingim, kat shaba phai phi iohi sa tang ki jingkhang lad suda, phi sngew la kat u mawkhang uba khraw ha khmat jong phi. Hynrei to tip ba U Trai uba la pyntyllun noh ia u mawkhang ba la khang ia ka jingtep U Jisu, u long u juh U Blei u ban pyntyllun noh ia kita ki jingeh jong phi baroh lada phi ngeit ha U. Kampher u Soitan un ai hukum ia ki ksuid jong u ban pynskhem ia kita ki mawkhang ha ka jingim jong phi, U Jisu u don ka bor ban pyntyllun ia kita baroh. Hallelujah!
2. U la shong halor jong u - v.2
Une u Angel jong U Trai haba u la lah pyntyllun ia uta u mawkhang, u la shong syndon halor jong uta u mawkhang. Ym tang ba u shu pyntyllun, hynrei u da shong syndon halor jong uta u mawkhang. Kane ka pyni ba U Trai u long halor jong uta u mawkhang. Paralok baieit, kynmaw haba ngi don ia U Jisu, ym tang ba un pynkynriah ia ka jingeh, ka jingkhang lad, hynrei un pynlong ia phi ba phin kiew halor jong ka jingeh, ym ba ka jingeh kan long halor jong phi, hynrei phi phin long halor ka jingeh, halor uta u mawkhang ha ka jingim jong phi. Hallelujah!
3. Ki nongap ia ka jingtep ki la sheptieng bad ki la long kum kiba iap - v.4
Haba kine ki nongap ki la iohi ia kaei kaba uta u Angel u la leh, ki la sheptieng bad ki la long kum kiba iap. Hynrei une u angel U Trai um shym ong eiei, um patiaw eiei, long kumba ong, ki mat ia sheptieng, ki mat ia iap shato. Um shym bother eiei ia ki. Ym don jingisynei ia u bymman. Hynrei haba kita ki kynthei ki la sheptieng, une u angel U Trai u la pyntngen ia ki da kaba ong, 'Wat sheptieng' (v.5). Hangne ngi iohi ia ka jingiapher ki briew jong u Soitan bad ki briew jong U Jisu (bangeit). Haba ki briew jong u Soitan (bymngeit) ki sheptieng sa ba kin iap, ym don jingpyntngen ia ki, hynrei haba ki briew jong u (bangeit) ki sheptieng, u wan ban pyntngen.
4. Ale - v.6
Hadien ba une u angel u la pyntngen ia ki da kaba ong, 'Wat sheptieng'. U la khot ia ki 'Ale', to khmih... U da pdiang sngewbha (welcome) ia ki. Hapdeng jong kata ka jingsheptieng ki la iohsngew ia ka sur khot sngewbha jong u angel U Trai, bad nga ngeit kata ka sur khot sngewbha jong u, ka la pynjahthait ia ki. Paralok baieit, U Blei uba ngi shakri u dei U Blei u ba ju sngewtynnad ban khot sngewbha (welcome) ia ngi ha ki por baroh. Haba ngi iohsngew bad ngi pdiang ia kata ka jingkhot sngewbha jong u, da shisha ngin shym ia ka jingjahthait.
Mat 11:28-29, To wan ha nga, phi baroh kiba thait bad ba khia ka jingkit, te ngan pynjem ia phi.... bad phin shem kaba jahthait ha ki mynsiem jong phi.
5. Khie leit iathuh - v.7
Ynda haba u la dep ban ia kren bad batai ia ki katto katne por, une u angel U Trai u la phah ia ki ba kin leit noh kloi kloi ruh ban leit iathuh ha ki synran ia kaei kaba la jia. Kane ka long ka jinghikai na ka bynta jong ngi baroh kiba lah shem ia U Trai. U Trai u phah ruh ia ngi ba ngin leit ban iathuh lem sha kiwei shaphang U Jisu Khrist. Kane ka jingphah jong une u angel U Trai ia kine ki kynthei ka long ruh na ka bynta jong ngi. Ngi lah shem ia U Trai ba la mihpat, ngim dei ban shu sngap tang ha lade, hynrei la phah ia ngi ban iathuh lem sha kiwei pat.
Markos 16:15, "U la ong ruh ha ki (ha ngi), To leit sha ka pyrthei baroh, bad to ialap ia ka gospel ha ki bynriew baroh"
6. Ki la phet ban iathuh - v.8
Kine ki kynthei haba ki la ioh sngew ia kaei kaba u angel U Trai u la ong bad phah ia ki, da kaba sted ki la phet ban leit iathuh ia ki synran ia kaei kaba ki la ia shem bad ki la iohi. Ki la phet (mareh), ong ka Ktien U Blei. Kane ka kren ia ka jinglong lakloi jong kine ki kynthei, ka jinglong sincere jong ki ia kaei ba la phah ia ki ban leh.
U Trai u la phah ia ngi ban leit iathuh lem ia kiwei pat shaphang jong U. Hato ngi la leit ban iathuh? Lada em, to ngin ioh ia ka jinghikai na kine ki kynthei ban leit bad ban iathuh ia kiwei pat. U Paul u ong to phin long kiba la phong juti ha la ki kjat, da ka jinglong lakloi ka gospel ka jingsuk. (Eph 6:15).
7. U Jisu u wan tan ia ki - v.9
Katba kine ki kynthei ki dang leit ban iathuh ha ki synran, U Jisu u la wan ban tan ia ki, bad u da Khublei ia ki. Ban wan tan bad ban Khublei da U Trai Jisu kam dei ka kam kaba rit, hynrei kadei kaei kaei kaba khraw bad donburom tam. Mut dur, lada tang u Chief minister ne Prime minister un wan tan bad Khublei ia ngi katno ngin kmen bad ngin jin da la iathuh khana briew kylleng khlem kut shuh. Mynta lei pyrthei selfie ngin jin da la sei ka mobile wut wut ban shon selfie namar ba ngi ioh khublei bad u CM lane PM. Katno tam lei ban wan tan bad Khublei da U Trai Jisu. Kane ka pyni ia ka jingshem sngewbha jong U Trai ia kita kiba long lakloi ban leit iathuh lem sha kiwei shaphang jong U.
8. U phah biang ia ki - v.10
Haba u la lah Khublei ia ki, U la phah biang ia ki ba kin leit iathuh sa ha ki para jong U. Ka jingmut ka long ba kam pat biang ban iathuh tang ha ki synran jong U, hynrei leit iathuh ruh ha ki para, leit iathuh ruh sha kiba ha ïing ha sem, para marjan marpa bad kumta ter ter. Kane ka long ka jinghikai ruh na ka bynta jong ngi, kaei kaba ngi la mad la shem, ngi dei ban iathuh lem sha kiwei. Ym dei ban ong o nga lah iathuh ia ito lah biang, hynrei, em. Iathuh, iathuh, iathuh. Leit, leit, leit. Haba ngi leit bad iathuh, ka pynkmen ia U Trai.
Kane ka long ka jinghikai ba ngi ioh lyngba kane ka lynnong kaba iathuh shaphang ka jingmihpat U Khrist. Nga ngeit ngi la iohi jinghikai bad jingshai lyngba kane ka jingthoh.
U Blei un kyrkhu iaphi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© JesterMawlong | 04-04-2021
Comments
Post a Comment