U Apostol Paul u ong, Bad ia kane, haba ngi ithuh ia ka ïa, ba mynta la dap biang ka por ia ngi ban khie joit na kaba iohthiah. Kaba mut ba mynta ka Alarm ka lah riew, ka lah dei ka por ban khie noh, ym dei ban dang ioh thiah sah. Rom 13:11-14
Lada ngi dang iohthiah sah haba ka Alarm ka lah ring, ngin sa kyndit ha ka jingbabe, balei ngam kyndit naduh mynne, balei ngam khie haba ka Alarm ka lah riew. Balei! Balei!! Balei!!! Sa tang ka jingbabe.
Kumta u Paul u bteng shuh shuh da kaba ong, "Khie joit me uba iohthiah, to mih noh na kiba iap..." Eph 5:14
Kaei kata ka Alarm jong u bangeit bad kumno ka ring? Ki jingjia bapher bapher ba ngi iohi bad iakynduh ha kine ki sngi, ki long ka Alarm na ka bynta ki bangeit.
1. Ka jingroi ha ka jingstad briew (technology) - Daniel 12:4. Ngi sakhi ia kane ha kine ki sngi mynta, ka jingtip bad jingstad jong u briew ka lah da roi shisha ha ki liang baroh. Hynrei kaba sngewsih ka long ba ka jingtip ia uba hakhlieh tam pat ka lah nang hiar. Ai ba kane kan long ka Alarm na ka bynta jong ngi ba ngin kyndit thiah noh, to ngin wad ia U Trai bad ban tip shuh shuh shaphang jong U.
2. Ki jingjia bapher bapher (calamity) - Mathaios 24:3-28. Ki nemsniew, jumai, jingiapthem, ka jingialeh makynti. Kine ki la tied bad ki la iai tied ban kyrsiew thiah ia ngi ki bangeit. Lada ngim pat iohsngew, to ngin iohsngew noh.
3. Ka jingiathut bad iashun paralok - Mat 24:9-10. Ngi lah sakhi ia kane, ha kine ki sngi ka jingiashun, ia bishni ka la jur bha, ka jingiathut paralok haduh ba ka pynlong ban ia shun wat ban iadie paralok, wat ban pyniap ruh. Wat ha ki Balang ka don ka jingiathut ka jingiamong uwei ia uwei pat.
4. Ka jingman khriat noh jong ki Khristan - Mat 24:12. "Te namar ba ka pop kan man bun, ka jingieit kiba bun kan man khriat.". Ngi iohi ia ka jingman khriat noh jong kiba bun ki bangeit Khristan ha kine ki sngi. Ym don shuh ka jingpynkhih ban pule Bible, ban duwai, ban iasyllok, ban leit jingiaseng bad ialap ia kiwei. Ka jingman khriat kaba khraw!
U Apostol Paul u ong ha u Timothy ba un sumar namar ba ha ki sngi bakhadduh, don ki ban hap noh na ka jingngeit jong ki - 1 Timothy 4:1
5. Corona Virus system - Haba peit lah i kumba une u Corona u lah synshar ia ki briew. Lada u phah shong khop ha ïing, u briew u hap shong khop, lada u ong ban deng mask, baroh hap ban deng, lada u phah sait kti, baroh baroh ngi ia sait kti, lada u ong ia jngai iwei na iwei, hap ban ia jngai, lada u ong ai injection (vaccine) hap ai injection. Lada ym deng mask ym long, nangta da lah deng mask, donkam sa ban ai injection (Vaccine), da lah dep ai vaccine, tip sa kaei shuh? Kine baroh ki dei ka alarm ba U Jisu u lah jan ban wan bad U Khrist lamler ruh un sa mihpaw shen, bad hangta un ong lada ym don ka shap jong u, phin nym lah ban thied lane ban die, bad kat kiba ialeh pyrshah, ka jingpynshitom, wat ka jingiap kan long ia uta uba ialeh pyrshah ia u.
Kine baroh ki dei ka Alarm ia u bangeit. Ka jingkhot ka long to ngin kyndit noh na kaba iohthiah, to ngin khie noh joit, shuwa ba kan dier ka por ioh ba ngin babe junom. Bret noh ia ka pop, ki jingtlot jingswai, shakri shitrhem noh ia U Trai. Ialap, maham bad kyrsiew thiah lem ia kiwei ruh, ia kiba ha ïing ha sem, paralok parajor. To ngin pynkhreh ialade na ka bynta ban iashem bad U Trai.
U TRAI U LA JAN !!! Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 22-04-2021 | 12:05pm
Amen
ReplyDeleteAmen
Delete