1 Sam 16:7 "Hynrei U Trai u la ong ha U Samuel, Wat khmih ia ka khmat jong u, lymne ia ka jingjrong ka rynieng jong u; namar nga la kyntait ia u: naba U Blei um ju khmih kumba khmih u briew; naba u briew u iohi tang ia ka dur kaba shabar, hynrei U Trai u iohi ia ka dohnud."
Kane ka dei kaei kaba U Blei u kren ia u Samuel ha ka por ba mut ban pynsleh syiem ia uwei na ki khun u Jesse. Haba u Jesse u la khot ia baroh ki khun shynrang jong u kiba lah kham heh, bad ki la wan uwei hadien uwei pat, bad haba la wan u Eliap, u Samuel u la khmih ia u bad u la idei ban pynsleh syiem ia u namar u long uba biang ka met ka phad, uba ikhaiñ imaiñ, hynrei U Blei u la ong ia u Samuel ba um dei une, bad u la ong ia kitei ki kyntien ba U Blei um khmih kumba khmih ki briew, hynrei U Blei u iohi ia ka dohnud.
Nga kwah ban kren ia kane ha ki ar bynta ki jinghikai. Kawei ba ngin ym sngewthuh bakla bad kawei pat ba ngin nym iohi ba bakla.
1. Kaba nyngkong ngin ia peit ia kata ka jingsngewthuh ba bakla.
Kane ka kyntien ka la long ka jingiasaid kaba jur wat hapdeng ki bangeit, khamtam ki samla, ban pynksan ba kaei kaba ki leh, kaba ki riam ki beit kam lei lei lada ka long kumno kumno ruh, ki ong namar ba U Blei um peit ia kaba shabar, hynrei u peit ia ka dohnud. Shisien pyrkhat lyngkot sngewdei, hynrei lada ngi puson bha ia ka Ktien jong U Blei kam long satia kumta kumba ngi mut. Hynrei kaei ba U Blei u ong hangne ka mut beit ia ka jinglong ka met ne ka dur u briew (physical appearance).
Lada ngi ong ba ngi lah ban riam ban beit katba mon, katba sngewbit kam lei lei namar ba U Blei um peit ia kaba shabar, kata ka long ka ba bakla, ka long ka jingshukor, ka dei ka jingshah pynthame ha u Soitan kumba long ka Im. U Soitan barobor un ialeh katba lah ban pynsngewthuh bakla ia ki briew. Un ialeh ban pynsting ia ka jingkhia jong ka jingshisha ka Ktien jong U Blei. Haba U Blei u ong ia ka Im bad ia u Adam wat bam na uta u dieng uba hapdeng jong ka kper Eden, uba long u dieng jong ka jingtip ia ka babha bad basniew, u Soitan pat u ong ia ki ba kam lei lei da phi bam ruh, phin sa long pynban kum ki blei. U da pynbang u da pynthiang ia ka Im haduh ba kan da ngop thiaw. Jen 3:1-7.
Ka jingkyntu ka long, to ngin nym shah shukor ha ki buit-thap u Soitan. Nga kwah pynban ba phin tip ba kaei kaba ngi riam ne kaei kaba paw shabar ka batai ia ka jinglong ba shapoh bad ka jinglong ba shisha jong u briew. U Jisu u ong, ia u dieng yn ithuh na u soh, ia ka jinglong ba shapoh jong u briew yn ithuh na kaei kaba paw shabar, lada kaei kaba paw shabar ka long ikynja pyrthei kynja doh, kumta ruh kan long shapoh jong u briew. Loukas 6:44-45.
Ai ba kane ka jingthoh kan long ka jinghikai ia kito kiba kwah ban im, riam beit katba mon kin sngewthuh ba kane kam kren ia ka riam ka beit, ka kren beit beit ia ka dur ba shabar kumba U Blei u la thaw (physical appearance).
2. Kaba ar ngin ia peit ia ka jingiohi ba bakla.
Ka juh long ka rukom ha u briew hi, lada ngi iohi ia u briew uba ikhaiñ imaiñ, kham i stad i shemphang, kham i nang i stad, ngin kham noh ka khmat sha u, la ka dei samla ne ha kano kano ka liang ruh, wat ha ka jingshakri Blei, kumba long u Samuel. Ia u briew uba i raitoi, u bym da ikhaiñ imaiñ la ju peit noh da kawei ka khmat. Hynrei U Blei um ju peit ia ka physical appearance, ngan ong biang, u peit bad iohi ia ka dohnud. Ka dur lane kata ka physical appearance ka wan hadien.
Bunsien ki briew ki shah shukor noh namar ba ki peit ia kaba shabar, la ka long ki samla shynrang bad kynthei, la ka long ruh ha ka jingshakri Blei ne ki kam ba kynja mynsiem, lada ngi peit tang ia kata kaba shabar, kata ka jingikhaiñ imaiñ jong u briew, ka jingbabe khlem pep kan long. Lada ngim long kiba la shah ialam ha U Mynsiem, ngin poi wat shaduh ka jingñiew shiliang khmat kaba U Blei u maham ba ngim dei ban ñiew ne leh shiliang khmat. Jak 2:1-13
Nga lah ban ong ba kane ka long ruh ka leadership message. Ai ba kane kan long ka jinghikai ruh wat ia ngi ki nongialam, ban ym peit kumba u Samuel u peit ha kaba iadei bad ka jingjied ne thung ia ki briew ha kano kano ka kam, khamtam ha ka ministry.
Ngi donkam ka jingstad kaba kynjablei bad ka jingialam U Mynsiem, namar dei tang U Mynsiem uba ithuh, uba ït wat ia kaba shapoh jong u briew.
1 Kor 2:10-11, "...namar U Mynsiem u ït ia kiei kiei baroh, wat ia kita kiei kiei ruh kiba jylliew ki jong U Blei. Namar uno u briew uba ithuh ia kiei kiei ki jong u briew, hynrei tang ka mynsiem uta u briew kaba hapoh jong u? kumjuh ruh ia kita kiei kiei ruh ki jong U Blei ym don ba ithuh, hynrei tang U Mynsiem U Blei."
Dei tang U Mynsiem jong U Blei uba ithuh ia kaba shapoh jong u briew. Kumta ban lait na ka jingpeit bakla, ngi donkam ban long kiba shah ialam ha U Mynsiem Bakhuid, ym ha ka khmat bad jingiohi jong ngi.
Kine ki long ki ar bynta jong ka jinghikai ha kaba iadei bad katei ka dkhot bad kyntien haneng. To ngin nym sngewthuh bakla kumba don kiba sngewthuh bakla, to ngin nym iohi bakla kumba u Samuel u iohi.
Nga duwai ba U Blei un ai ha ngi ka jingsngewthuh bad ka jingiohi kaba dei biang, bad ban shemphang ia ka Ktien U Blei kumba dei ban sngewthuh.
U Blei un kyrkhu iaphi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 15-04-2021 | 11:34
Comments
Post a Comment