U Jisu shuwa ba un iap halor ka diengphna, u la kren ia kine ki kyntien harum, bad ngi iohi kawei pa kawei ka kyntien ba U Jisu u kren, ka don ka jingmut kaba khraw. Kumta to ngin ia peit ha kane ka por.
1. Ko Kpa to map ia ki naba kim tip kaei ba ki leh. Loukas 23:34
Halor ka diengphna u ong ia kine ki kyntien, "Ko Kpa, to map ia ki; naba kim tip kaei ba ki leh." (Loukas 23:34). Kum u Nongiasaid, wat ha ka khyllipmat ba khadduh, u dang iasaid na ka bynta jong ngi ha khmat jong U Kpa. Wat la ngi la leh sniew, ngi la long bymman, u iasaid. Isaiah 53:12
Lada dei ma ngi lehse ngin jin da la duwai ha U Blei ba un pynhiarkput ia ki briew kiba leh sniew ia ngi. Hynrei U Jisu u duwai pynban ba U Kpa un map ia ki. Ialade u lah dep map lypa, u duwai ba U Kpa ruh un map ia ki. U hikai ruh ia ngi ba ngin nang ban ia map paralok, u ong lada ngim ia map, U Kpa ruh un nym map. Mat 6:14-15. Ngi donkam ia kaba kum kane ka dohnud.
2. Mynta ka sngi men long lem bad nga ha ka Paradais. Loukas 23:43
Arngut ki dakaid la sah narphna ryngkat bad U Jisu, uwei sha ka mon bad uwei sha ka diang. Hadien uwei na kita ki dakaid, haba u la iohsngew ba ki briew ki la ia beiñ ia khoh ia U Jisu, ma ruh u la kren beiñ lang ia U Jisu, hynrei uta uwei pat u la sneng ia uta uwei u dakaid ba kren beiñ ia U Jisu bad hadien ba u la dep ban sneng ia uta uwei u dakaid, u la ong ia U Trai Jisu, "To kynmaw ia nga ynda me poi ha Paradais." U Jisu u la phai ktien ia u, "Shisha nga ong ha me, ha kane ka sngi men long lem bad nga ha ka paradais." Kaba sngewtynnad hangne ngi iohi U Jisu haba ki briew ki pyrthuh beiñ ia u, um shym la jubab wat shi kyntien ruh, hynrei haba une u dakaid u kren ia u, u kyrpad ia u, da kaba sted u la phai ktien ia u. Kane ka pyni ba U Jisu u kloi ban pdiang haba ngi phai sha U da ka dohnud kaba kylla kaba mut.
U Jisu u ong, ".....uta te uba wan ha nga, da lei lei ngan ym kyntait noh shabar." Ioannis 6:37.
Ha ka khyllipmat ba ngi phai sha U Jisu, ngi khot kyrpad ia u, U Jisu u pyntikna ba ngin long lem bad U ha ka Paradais. Rom 10:13 ka ong, “Uno uno baroh u ban khot kyrpad ia ka kyrteng jong U Trai yn pynim ia u”.
3. Ko ka briew, ha khmih ia la u khun! Ha khmih ia la ka kmie! Ioannis 19:26-27
Ioannis 19:26-27, Te la ieng hajan kata ka diengphna jong U Jisu ka kmie jong u, bad ka para ka kmie jong u, Ka Mary ka tnga jong U Klophas, bad Ka Mari ka nong Magdala. Namar kata haba U Jisu u la iohi ia la ka kmie, bad ia uta u synran ia uba u ju ieit ba u ieng hajan, u ong ha la ka kmie, Ko ka briew, ha khmih ia la u khun! Hadien kata u ong ha uta u synran, Ha khmih ia la ka kmie! Naduh kata ka por te uta u synran u la shim ia ka sha ka iing jong u hi.
Jisu kum u khun ia la ka kmie u don ka jingkitkhlieh, ban sumar ia ka la ha ka met bad ka mynsiem kumjuh. Haba ka Mary ka la bud ia U haduh ban da sah narphna, U Jisu u la peit ia ka da ka jingisynei bad ka jingkitkhlieh, kumta haba u iohi ba kiba don hajan jong ka ha kata ka por dei tang U Ioannis, (uta u synran ba u ieit eh), kumta u la aiti noh ha u ban peit ia la ka kmie. Um shym la aiti klumar ha ki briew bym lah ban shaniah, hynrei ha u synran ba u ieit bad uba lah ban shaniah, u ban bsa ia ka met bad ka mynsiem jong ka. Naduh kata ka por te uta u synran u la shim ia ka sha ka iing jong u hi, ban peit bad sumar ia ka kmie U Jisu kum ia la ka jong ka kmie.
Kane ka long ka jinghikai ia ngi ruh, kum ki bangeit ngi dei ban don ka jingkitkhlieh ban bsa ia la ka kmie, u kpa, la ka dei ha ka met bad ka mynsiem, ngim lah ban shu kheiñ sting. U Jisu haduh ka jingiap u ieit, u burom bad u don ka jingkitkhlieh ia la ka kmie.
4. Eli Eli lama sabakthani. Mathaios 27:46
U Jisu halor ka diengphna u la shah ieh marwei, haduh ba u la hap ban pyrta bad ban kyang ia kine ki kyntien, "Eli, Eli, lama sabakhthani (kata kaba long, U Blei jong nga, U Blei jong nga, balei ba me la iehnoh ia nga?)
Ha ki por baroh U Blei uba U Kpa u ju don ryngkat ryngkat bad U Jisu, hynrei ha kane ka por. u la iehnoh ia u marwei. U Nongrwai Salm u ong, 'Ngam ju iohi ba uba hok un shah iehnoh'. Hynrei balei U Jisu u la shah iehnoh, ym namar ba u long uba pop, ne u leh pop. Ka daw ka dei namar ki pop jong ngi. 2 Kor 5:21, "Uta u bym shym la tip (leh) ia ka pop la pynlong pop ia U na ka bynta jong ngi". Isaiah 53: 'Shisha u la bah noh ia ki jingbymhok jong ngi...'. Baroh kaba U Jisu u leh bad shah ka dei na ka bynta jong ngi.
Ka jingkylli kaba ngi hap ban kylli ialade. Kat kane kaba U Trai u la leh na ka bynta jong nga, 'Hato ngan dang klet mo ia U, hato ngan dang iehnoh mo ia U? Nga ngeit U Jisu ruh un kylli ia kane ka jingkylli, "katne nga la leh na ka bynta jong phi, hato phin dang klet mo ia nga? Hato phin dang lyndet mo ia nga? U Trai u la shah iehnoh shipor ha la U Kpa namar ki pop jong ngi, um kwah ba un dang shah iehnoh pat mynta sa ha ngi.
To ngin pynlong ka jingkut jingmut ba da lei lei ngin nym iehnoh ia U Trai, ngin bud bad shakri ia U haduh bakut. To ngin nym klet ia kaei kaba U Trai u la leh.
5. Nga sliang. Ioannis 19:30
Lyngkhuid halor ka diengphna, ha ka jingthang jong ka sngi (kumba 6 kynta eiei), hangta u la ong, “Nga sliang”. Hynrei kaba sngewsynei sat ka long ha ka jaka ban ai da ka um, ki la ai pynban da kaba jew bad bakthang. Kata kam shym la pynjah sliang satia ia u, u iap ha ka jingthynrang bad jingsiang ba shyrkhei. Pyrkhat shaphang U Jisu, ialade u iap ha ka jingsliang, hynrei u tyrwa ha nga bad ha phi ia ka um kaba lada ngin dih ia kata, ngin ym sliang shuh. (Ioannis 4:13-13; Ioannis 7:38-39)
Ia lade u sliang, ym don ba ai um, hynrei ia ngi lada ngi sliang u kular ban pyndap. Mat 5:6, "Suk kiba thngan bad kiba sliang...naba yn pyndap ia ki".
6. La pyndep. Ioannis 19:30
Hadien kine kiei kiei baroh kiba u la shah, u la ong, “La pyndep” It is finished. U Jisu u la pyndep ia baroh kaba la assigned ia u da U Kpa. (Loukas 2:49; Heb 12:2). U la pyndep ia baroh ba la thoh shaphang jong u ha ki hukum bad ki Nongiathuhlypa. U la pyndep ia kine baroh na ka bynta jong ngi. Um shym la iehnoh wat kawei ruh.
Ka jingkylli ka long iangi pat, 'Hato ngi long ki ba iaineh? Hato ngi don kata ka jingkut jingmut ban pyndep ia kata kaba la aiti (assigned) ha ngi? Lada em, kadei ia ngi ban iaineh bad ban pyndep ia kaei kaba la aiti (assigned) ha ngi da U Trai. Bad kawei na ka assignment kaba U Trai u aiti ha ngi ka long ka jingialap gospel. Mat 28:19-20; Mar 16:15.
7. Ko Kpa ha ki kti jong Me nga aiti noh ia la ka mynsiem. Loukas 23:46
Loukas 23:46, U Jisu te haba u la pyrta da ka ktien bajam, u la ong, Ko Kpa, ha ki kti jong me nga aiti ia la ka mynsiem: te haba u la ong ia kane, u la ai noh ia ka mynsiem.
Kaba khadduh ka kyntien ba U Jisu u ong halor ka diengphna ka long, “Ko Kpa ha ki kti jong Me nga aiti noh ia la ka mynsiem”. U Jisu u don ka bor halor la ka mynsiem. Haba u la lah ban pyndep ia baroh ba la buh ia u, da la ka mon sngewbha u la aiti noh ia la ka mynsiem ha U Kpa. Ki briew kim lah ban shim jubor ia ka mynsiem jong u, lada um aiti da lade, yn nym don ba lah. (Ioannis 19:18).
Ngi kynmaw ha ka por ba ki rangbah Lyngdoh bad ki shipai ki la wan ban kem ia u, u Jisu u ong, lada nga mon nga lah ban duwai ia u Kpa ba un phah iarap ianga da ki Khadar paitbah tam ki angel ban pyniap ia kine ki briew. Mat 26:47-56. Baroh kaba ki briew ki lah ban leh shaphang jong u ka long tang ban pyndep ia ka jingthoh bad ka plan jong U Blei U Kpa ban pynim bad siewspah ia ngi. U Jisu haba u sngewthuh ba mynta la pyndep ia baroh ba la buh ban pyndep, U la aiti noh ha U Kpa ia la ka mynsiem.
Kine ki long ki kyntien ba khadduh ba U Jisu u ong halor ka diengphna shuwa ba un iap. Nga ngeit kane ka la long ka jingkyrkhu bad ka jinghikai ba khraw na ka bynta jong ngi ruh kum ki bangeit bad ki khun jong U Blei.
To U Blei un kyrkhu ia ngi lang baroh. Ainguh ia U Trai Jisu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | 01-04-2021 | 9:30 P.M
Comments
Post a Comment