Ka Jingmihpat U Jisu Khrist

Mathaios 28:1-10

U Jisu Khrist u la wan sha kane ka pyrthei ban shim ia ka jinglong u briew, u la im kum u briew, u la iap, la tep ia u, hynrei ha ka sngi kaba lai u la mihpat na ka jingtep. 

Haba ngi peit shaphang kane ka jingmihpat U Jisu ngi shem ba ka don ka jingmut (meaning) na ka bynta ki bymngeit bad ki bangeit kumjuh. To ngin ia peit ia kane ka bynta ha kane ka por.

Kaba nyngkong ngin ia peit ka jingmihpat U Jisu na ka bynta ki bymngeit: 

Kumno ka jingmihpat U Jisu ka don ban kren na ka bynta ki bymngeit?

1. KA JINGMIHPAT KA PYNSHISHA IA KA JINGLONG BLEI JONG U TRAI JISU. 

Rom 1:4, "...ia uba la pynithuh shynna ba u long U Khun U Blei da ka bor katba kum U Mynsiem ka jingkhuid, da ka jingmihpat na kiba iap." 

Da shisha U Jisu u dei u Khun jong U Blei.

2. KA PYNSHISHA RUH BA MA U DA SHISHA U DON KA BOR BAD KA IKTIAR HA BNENG BAD HA KA KHYNDEW.

Mat 28:18; "U Jisu te u da wan u la kren ha ki, u da ong, La ai ha nga ka bor baroh ha bneng bad ha ka khyndew". 

U Jisu u don ka bor halor ka bneng bad ka khyndew, kumta wat haba la tep, la pynskhem bha ruh ia kata ka jingtep, U Jisu u la mihpat! Ka khyndew (jingtep), u mawkhang kim lah satia ban bat ia U Jisu. U don ka bor halor baroh. Hallelujah!

3. KA PYNSHISHA IA KA JINGLONG BYM LAMLER JONG U. 

U Jisu katba u dang im, u la iathuh lypa shaphang ka jingmihpat jong U. (Pule Mat 16:21; 17:22-23; 20:17-19). Kane ka la jia shisha – um lamler. U la mihpat, um don shuh ha kata ka jingtep. 

Mat 28:6, "...um don hangne; naba u la mih noh, kumba u la ong. Ale, to khmih ia ka jaka ha kaba u la thiah U Trai". Dei namar kata ka daw, baroh kaba U Jisu u kren ne hikai ka long kaba shisha, kaba ngi donkam ban ngeit ia kaei kaba Jisu u kren ne hikai. 

Kane ka long kaei kaba ngi iohi, ba ka jingmihpat U Jisu ka don ban sakhi na ka bynta jong ki bymngeit. 

Kaba ar bad kaba ngin kham ia peit kham bniah ka long, ka jingmihpat U Jisu na ka bynta jong ki bangeit. Kumno ka long bad kaei ka jingkyrkhu.

1. KA PYNTIKNA BA KA JINGIALAP IA KA GOSPEL KAM LONG KABA LEHNOHEI. 

1 Kor 15:14, "...hynrei lada ia U Khrist ym shym la pynmihpat, te kumta ka jingialap jong ngi ka long kaba lehnohei". 

Lada U Jisu um shym la mihpat, baroh ka jingialap jong ngi, kan long kaba lehnohei, hynrei namar ba U Khrist u la mihpat, kumta ka jingialap jong ki Apostol, ka jingialap jong ki briew jong U Blei kam long kaba lehnohei.

2. KA PYNTIKNA BA KA JINGNGEIT JONG NGI IA U JISU KAM LONG KABA LEHNOHEI. 

1 Kor 15:14, "...bad ka jingngeit jong phi ruh kaba lehnohei." 

Lada ia U Jisu um shym la pynmihpat, ka jingngeit jong ngi ia U Jisu kan long kaba lehnohei. Ka jingshah shitom jong ki Khristan kan long lehnohei. Hynrei ainguh ia U Blei ba U Jisu u la mihpat, kumta ka jingngeit jong ngi kam long kaba lehnohei. Ka don ka jingmyntoi bakhraw. Hallelujah!

3. KA PYNSHISHA BA KI APOSTOL KIM LONG KI NONGSAKHI LAMLER. (1 Kor 15:15). 

Ki Apostol ki la iaid kylleng ban ialap ia U Jisu bad ki la phla ruh ba U Blei u la pynmihpat ia U na kiba iap. (Kam 2:32). Ki la kam ba ki la don lem bad U Jisu 40 sngi hadien ka jingmihpat. (Kam 10:39-41). Kumta lada U Jisu um shym la mihpat kin jin da la long kiba lamler, hynrei namar ba U Jisu u la mihpat shisha, kumta kim long satia kiba lamler. Ka jingphla jong ki ka long kaba shisha.

4. KA PYNTIKNA BA NGIM DON SHUH HA KA POP. 

1 Kor 15:17, "te lada ia U Khrist ym shym la pynmihpat, ka jingngeit jong phi ka long kaba thala; phi dang sah ha ki pop jong phi" ong u Apostol Paul. Hynrei U Trai Jisu u la mihpat, kumta ngim sah shuh ha ka pop. Ka Ktien jong U Blei ka ong, la pyllaitksan noh ia ngi na ka pop. Rom 6:18. 

5. KA AI KA JINGSNGEWSKHEM BA KI BANGEIT HA U JISU KIN YM JOT NOH. 

1 Kor 15:18, "Te kumta ruh, kita kiba la iohthiah (iohthiah ka kren ia kata ka jingiap jong ka met) ha U Khrist ki la jot noh kein.".

Lada U Jisu um shym la mihpat, kita ki bangeit ha U ruh yn ym pynmihpat. Lada ki iap, kin shu jot noh ha kata ka jingiap. Kata kan long ka jingkordit ong u Apostol Paul (1 Kor 15:19). Hynrei, namar ba U Jisu u la mihpat, kumta ruh kita ki bangeit ha U ki don ka jingkyrmen ba ma ki ruh ha kawei ka sngi kin sa mihpat, lada ki lah khlad noh shuwa ka jingwan U Trai, pynban lada ngi dang im haduh ka jingwan U Trai, yn pynkylla dur ia ngi ha ka shi khyllipmat ong ka Ktien jong U Blei. 1 Thes 4:14-17

6. KA AI KA JINGPYNKSAN IA NGI. 

Shisien ngi la long ki nongpop, ngi leh sniew, ngi la leh bymman, ngi la shah rai pynrem, bad ngi lah dei ban iap (ka jingiap ba shyrkhei ka dujok), hynrei da ka jingiap U Jisu halor ka diengphna la siewspah noh ia ngi na ki pop baroh, bad da ka jingmihpat jong u la pynksan noh ia ngi. (Rom 4:24-25). Ka jingmut "Pynksan" ka mut la pynlong ia ngi kum ki bym leh pop.

Kane ka long kaei ba ka jingmihpat U Trai Jisu ka don ban trei na ka bynta jong ngi ki bangeit. Ainguh ia U Blei uba U Kpa uba la pynmihpat ia U Jisu Khrist na ka jingtep. U Blei un kyrkhu iaphi baroh. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | 04-04-2021