Ioannis 14:1-3, "Wat khih khuslai na ka dohnud jong phi: to ngeit phi ha U Blei, to ngeit ha nga ruh. Ha ka ïing U Kpa jong nga don bun ki pulit shong neh; lymda kumta, nga la iathuh ha phi; naba ngan sa leit noh ban khreh ka jaka ia phi; Ynda nga ia leit noh, bad ba nga la khreh ia phi ka jaka, ngan wan pat, bad ngan shimti ia phi ha lade hi, ba ha kaba nga long ma nga, phi ruh phi lah ban long."
U Jisu u la kren ia kine ki kyntien ha ki synran jong u kiba la khuslai namar ba U Jisu u iathuh ia ki ba uwei na ki un sa die noh ia u. Katba kine ki synran ki dang khuslai shaphang kata, U Jisu u la ong ia ki wat khuslai, shu ngeit ha U Blei bad ngeit ha nga ruh.
Kum ki briew haba ngi ia kynduh ia kano kano ka jingjia bym sngewtynnad, hangto hangto hi ka jingkhuslai kan wan, bad lada ngim da sumar kata ka jingkhuslai kan ktah ia ka jingim jong ngi. Ngin ia peit katto katno ki jingktah jong ka jingkhuslai.
1. Ka kjap bad ka pynlong ba ngin nym lah ban seisoh ha ka jingim. Mat 13:22. Ka jingkhuslai lada ngim lah ban synshar ia ka, kan kjap ia ka jingim haduh ba ngin nym lah ban seisoh, ngin shu pulom hajuh.
2. Ka pynlong ba ngin ym lah ban san. Mat 13:22. Ka jingkhuslai ka lah ban pynlong ia u briew ba un ym san, la ka long ha ka met bad khamtam ha ka mynsiem. Ki jingkhuslai barobor ki tan ia u briew shapoh. Ngim lah ban san kumba dei. Nga la ju ia kynduh ia kiba bun ki briew kiba la shah ban ha ka jingkhuslai, kim lah ban khie khlieh, hajuh shi hajuh. Tad ynda ki la ioh jingpyllait phin shem kin sdang ban san pat.
3. Ka pyntyrkhong ia ki shyieng. Pro 17:22. Ka dohnud kaba kmen ka long kum ka dawai kaba bha, hynrei ka mynsiem kaba lwet (sngewsih, khuslai) ka pyntyrkhong wat ia ki shyieng. Ka dohnud kaba kmen ka lah ban wanrah ia ka jingkoit jingkhiah, hynrei ka jingsngewsih ka lah ban wanrah (create) wat ia ki jingpang ba bun jaid.
Dei na kata kadaw U Jisu um shah ba ngin im sah ha ka jingkhuslai, namar ka jingkhuslai hi kam don nong babha eiei ruh em. Mat 6:25 ter ter, U Jisu u ong uno na phi ba u da khuslai u lah ban pyntam tang khyndiat ka rynieng. Ym don.
Ka jingkhuslai barobor ka lam tang sha kaba leh sniew. Ki briew ynda haba ki la khuslai bad iai khuslai kan pynlong ia ki ba kin leh wat ia kaba sniew ne ka bym dei ban leh.
Kumno ngin lait ne jop ia ka jingkhuslai?
1. Pynkhlain ia ka jingngeit ha U Blei. Ioannis 14:1. Dei haba ngi skhem ka jingngeit ha U Blei ngin jop ia ki jingkhuslai. U Jisu u ong ia ki synran balei phi khuslai, ah phi kiba rit jingngeit. Mat 6:30. Haba ka jingngeit ka rit, ka jingkhuslai ka khraw, hynrei haba ka jingngeit jong ngi ha U Blei ka khraw, ki jingkhuslai ki jah. Hallelujah
2. Da ka jingduwai. Phil 4:6. Wat khuslai ia kiei kiei baroh, hynrei da ka jingduwai, pyntip ia ki jingpan jong phi sha U Trai. Haba ngi ia shem bad ia kynduh ia ki jingeh bad ki jingjia basniew ha ka jingim, kynmaw ban shu pyntip sha U Trai ha ka jingduwai, wat nym kit ha lade.
3. Bret sha U Trai. 1 Pet 5:7. Apostol Petros u ong, bret halor jong u ia ki jingkhuslai jong phi baroh sha U Trai, namar u sumar sukher ma u shaphang jong phi. Ngim dei ban kit ha lade ia ki jingkhuslai ne ki jingeh, hynrei bret sha U Jisu, u donbor ban kit ia ki jingkhuslai jong phi baroh. U Isaiah u ong ba u lah dep bah ia ki jingkhuslai jong ngi baroh. Isaiah 53:4.
U Blei un kyrkhu iaphi baroh. Amen
© Jester Mawlong | 14-04-2021 | 8:55
Comments
Post a Comment