Kaei ba ngi leh ia ki shakri barit jong U Trai, ngi leh ia U Trai

Kaei ba ngi leh ia ki shakri barit jong U Trai, ngi leh ia U Trai.

Ngam tip katno ngut ngi la ju pyrkhat jylliew ia kane. U Trai Jisu u ong ba, lada phi leh bha ia iwei na kine kiba rit kiba ngeit ha nga, phi leh bha ia nga. Ha kajuh ka rukom, lada ngi leh sniew ia iwei na kine kiba rit ka long kumba ngi lehsniew ia U Trai. 

Nga kwah ban pynkynmaw ia kane ka kyntien khnang ban pynlong ia ngi ba ngin  pyrkhat, pleng kaei ba ngi leh ia ki shakri barit jong U Trai, ka long kumba ngi leh ia U Trai. 

To ngin ia peit ia kine ki dkhot na ka ktien jong U Blei.

MATHAÏOS 25:31‭-‬46

³¹“Ynda U Khun u briew un wan te ha ka burom jong u, bad ki angel bakhuid baroh lem bad u, ynda kumta, un shong halor ka khet ka burom jong u, ³²bad yn ïalum lang ïa ki bynriew baroh ha khmat jong u; bad un pynïakhlad ïa ki uwei na uwei pat, kumba u nongaplangbrot u pynïakhlad ïa ki langbrot na ki blang; ³³te un buh ïa ki langbrot sha kamon jong u, hynrei, ïa ki blang sha kadiang. ³⁴Ynda kumta, U Syiem un ong ha kita sha kamon jong u, ‘To wan phi ïa kiba la kyrkhu jong U Kpa jong nga, to ïoh ïa ka hima ïa kaba la pynkhreh keiñ ïa phi na myndanglong ka pyrthei. ³⁵Namar nga la thngan, te phi la ai ha nga ban bam; nga la sliang, te phi la ai dih ïa nga; nga la long nongwei, te phi la khot lem ïa nga; ³⁶ba lyngkhuit, te phi la pynkup jaiñ ïa nga; nga la pang, te phi la wan sumar ïa nga; nga la long ha ka byndi, te phi la wan ha nga.’ ³⁷Ynda kumta, kita ki bahok kin ïathuh ha u, kin ong, ‘Ko Trai, mynno ba ngi la ïohi ba me la thngan, bad ngi la ai bam? lane ba me la sliang, bad ngi la ai dih? ³⁸mynno ruh ba ngi la ïohi ba me long nongwei, bad ngi la khot lem ïa me? lane ba lyngkhuit, bad ngi la pynkup jaiñ? ³⁹mynno te ba ngi la ïohi ba me pang, lane ha ka byndi, bad ngi la wan ha me?’ ⁴⁰Uta U Syiem te un ïathuh bad un ong ha ki, ‘Shisha nga ong ha phi, ha kaba phi la leh ïa ka ha uwei u barit tam na kine ki para jong nga, phi la leh keiñ ha nga.’ ⁴¹Ynda kumta, un ong ha kita ruh sha kadiang, ‘To khie leit noh na nga, phi ïa kiba la tim, sha ka ding ka bymjukut, ïa kaba la buh lypa ïa u Soitan bad ïa ki angel jong u! ⁴²Namar nga la thngan, te phim shym la ai ha nga ban bam; nga la sliang, te phim shym la ai dih ïa nga; ⁴³nga la long nongwei, te phim shym la khot lem ïa nga; ba lyngkhuit, te phim shym la pynkup jaiñ ïa nga; bapang, bad ha ka byndi ruh, te phim shym la wan sumar ïa nga.’ ⁴⁴Ynda kumta, ki ruh kin ïathuh ha u, kin ong, ‘Ko Trai, mynno ba ngi la ïohi ba me la thngan, lane ba me la sliang, lane nongwei, lane ba lyngkhuit, lane bapang, lane ha ka byndi, bad ngim shym la shakri ïa me?’ ⁴⁵Ynda kumta, un ïathuh ha ki, un ong, ‘Shisha nga ong ha phi, ha kaba phim shym la leh ïa ka ha uwei na kine ki barit tam, phim shym la leh keiñ ha nga.’ ⁴⁶Kine kin leit noh te sha ka shitom bymjukut, hynrei, ki bahok sha ka jingim bymjukut.”

Hangne ngi iohi shaphang kata ka sngi bishar ia ka pyrthei. Bad ha kata ka jingbishar la pyniakhlad ia kiwei sha kamon bad ia kiwei pat sha kadiang, kumba u nongaplangbrot u pyniakhlaid ia ki langbrot na ki blang. 

Ka bynta ba nyngkong ngi iohi kumno ba la khot ia kita kiba sha kamon bad u la ong ia ki, ‘To wan phi ïa kiba la kyrkhu jong U Kpa jong nga, to ïoh ïa ka hima ïa kaba la pynkhreh keiñ ïa phi na myndanglong ka pyrthei'. 

Kaei kaba kine kiba sha kamon ki la leh kaba pynlong ia ki ban ioh kat kane ka jingkhot sngewbha na U Trai?

Ha ka dkhot ba 35 & 36, ngi iohi ia kaei kaba ki la leh. U Jisu u ong ha ki, ³⁵Namar nga la thngan, te phi la ai ha nga ban bam; nga la sliang, te phi la ai dih ïa nga; nga la long nongwei, te phi la khot lem ïa nga; ³⁶ba lyngkhuit, te phi la pynkup jaiñ ïa nga; nga la pang, te phi la wan sumar ïa nga; nga la long ha ka byndi, te phi la wan ha nga.’ 

Kine kiba sha kamon (kiba hok) ki lyngngoh bad ki kylli ia U, ‘Ko Trai, mynno ba ngi la ïohi ba me la thngan, bad ngi la ai bam? lane ba me la sliang, bad ngi la ai dih? mynno ruh ba ngi la ïohi ba me long nongwei, bad ngi la khot lem ïa me? lane ba lyngkhuit, bad ngi la pynkup jaiñ? mynno te ba ngi la ïohi ba me pang, lane ha ka byndi, bad ngi la wan ha me?’ Kata ka dei kaei kaba ki la kylli ia U.

Ngin ia peit kaei ba une u Syiem (ba long U Trai Jisu) u jubab ia ki, U ong, ‘Shisha nga ong ha phi, ha kaba phi la leh ïa ka ha uwei u barit tam na kine ki para jong nga, phi la leh keiñ ha nga.’

U Jisu u pyni ba kata kaba ki leh ia ki kita ki shakri barit jong U ka long ba ki leh ia U.

Kynmaw kawei pa kawei kaba ngi leh ia ki shakri barit jong U Trai la ñiew bad la buh jingkynmaw (record) ha bneng. La ka long ka jinglehbha ne ka jinglehsniew. 

Tynjuh ia lade kumno ngi leh ia ki shakri barit jong U Trai?

## Hato ngi la ai bam eiei ia ki haba ki wan ha ïing ne shnong jong ngi? Ne ngi pynmih jyn-it ia ki.

## Hato ngi la ai dih ia ki haba ki sliang? Ne ngi pynmih thylli ia ki.

## Hato ngi la ai jaka sah ia ki haba ki wan sha shnong jong ngi? Ne ngi ong, 'Ym don jaka phi'

## Hato haba ki pang ne ki don ha byndi ngi la sumar, ngi la jngoh ia ki? Ne ngi ong, 'ieh mat ia dep shato, ieh kin mat leh kiwei'.

Ka jubab ka dei ka jong ngi shimet shimet, ïit ia lade, hato kumno phi leh (treat) ia ki shakri barit jong U Trai. Lada phi shem ba phi la leh bymdei (treat wild) ia ki, kylla bamut na kata ka rukom leh, sdang ban leh ia kiei kiei ki ban pynsngewbha ia U Trai ba ngin ioh long kita ki langbrot jong U kiba sha kamon jong U bad ngin iohsngew ba un ong, ‘To wan phi ïa kiba la kyrkhu jong U Kpa jong nga, to ïoh ïa ka hima ïa kaba la pynkhreh keiñ ïa phi na myndanglong ka pyrthei'. 

Ka bynta ba ar ngi iohi kumno ba la khot ia kita kiba sha kadiang bad u la ong ia ki, ⁴¹‘To khie leit noh na nga, phi ïa kiba la tim, sha ka ding ka bymjukut, ïa kaba la buh lypa ïa u Soitan bad ïa ki angel jong u! 

Balei uta u Syiem (U Trai) u beh noh ia ki sha ka ding ka bymjukut? 

Ka jubab ba U Jisu u ai ka long, ⁴²Namar nga la thngan, te phim shym la ai ha nga ban bam; nga la sliang, te phim shym la ai dih ïa nga; ⁴³nga la long nongwei, te phim shym la khot lem ïa nga; ba lyngkhuit, te phim shym la pynkup jaiñ ïa nga; bapang, bad ha ka byndi ruh, te phim shym la wan sumar ïa nga.’ 

Ngi iohi kaei ba kine kiba sha kadiang ki leh ia ki shakri barit jong U Trai ka long pyrshah (opposite) ia kaei ba kitei kiba sha kamon ki leh. 

To ngin ia peit aiu kine kiba sha kadiang ki kylli ia U Trai (u Syiem). ⁴⁴Ynda kumta, ki ruh kin ïathuh ha u, kin ong, ‘Ko Trai, mynno ba ngi la ïohi ba me la thngan, lane ba me la sliang, lane nongwei, lane ba lyngkhuit, lane bapang, lane ha ka byndi, bad ngim shym la shakri ïa me?’ 

Kata ka dei kaba ki la kylli phylla ia U, hynrei u Syiem (U Trai) u la jubab, ⁴⁵‘Shisha nga ong ha phi, ha kaba phim shym la leh ïa ka ha uwei na kine ki barit tam, phim shym la leh keiñ ha nga.’ 

Kine ki briew (ha ka jingpyrkhat jong nga) ki la hap dem la ki khmat sha khyndew bad leit noh iamrem bad sngewsih sha kata ka jaka ba u la phah ia ki kaba long ka ding ka bymjukut.

Para bangeit baieit, kane ka long ka jinghikai kaba khraw ia ngi kum ki khun jong U Blei, to ngin nym leh kano kano ka bymdei (treat wild) ia ki shakri barit jong U Trai, to ngin nang ban leh bha ia ki, namar kam dei ka jingmyntoi jong ki, hynrei ka long ka jingmyntoi bakhraw ia ngi. 

U Jisu u ong shuh shuh ba wat lada phin ai dih wat tang shi khuri ka um khriat ia ki synran barit jong U phin nym duh ia la ka nong. MATHAÏOS 10:42

U Blei un kyrkhu ia phi. Amen

N.B-1: Ia ki synran U Jisu la ju ong ki barit. Ym ju ong satia ki bakhraw lane ki shakri bakhraw.

N.B-2: Balei nga ong ki shakri barit? Namar bunsien hi ia ki shakri bakhraw la kham leh kyrpang, hynrei ia ki shakri barit pat la ju leh da kumwei pat.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Copyright © Jester Mawlong | July 27, 2022