Haba ngi pule ia ka rukom batai jong U Jisu shaphang ka hukum, ngi iohi ba ka kham khia shuh shuh ka jingbatai U Jisu ban ia kaei ba la thoh ha ki hukum.
Nuksa 1: Shaphang ka baklim: Haba ngi pule ha ka shiphew hukum ngi iohi ha kaba iadei bad ka jingklim ka shu ong beit “Men ym klim." (Ek 20:14). Ha ka jingsngewthuh paidbah paidlang hi 'Men ym klim' ka mut men ym ioh tnga nalor kawei ka tnga.
Hynrei haba ngi peit ia ka jingbatai U Jisu ngi shem ba ka kham khia bun shah ban ia kata. U Jisu u ong, "....hynrei, nga ong ha phi, ba uno uno ruh uba da khmih ïa ka briew ïa ka ban kwah ïa ka, u la lah klim lypa ïa ka kumta ha la ka dohnud." Mat 5:28
U Jisu u ong tang ban shu khmih, ban itynnad, ban i kwah brai ia ka wat tang ha la ka dohnud ruh lah klim lypa, nai pat da ia shong kurim, hynrei lah klim. Haba kumta lah ban sumar ia kata ka hukum, haba tang shu peit itynnad ia ka briew lah klim? Em, yn nym don uba lah.
Nuksa 2: Shaphang kaba pyniap briew: Ha ka shiphew la thoh "Men ym pyniap" (Ek 20:13), hynrei U Jisu u ong ba tang ba ngin shu bitar ia u paralok khlem daw, shu bitar ruma, kata ka lah ia ryngkat bad ka jingpyniap briew. Haba kumta phi lah ban khlem bitar, ha ka jinglong briew teng teng ngi bitar khlem sngewthuh, lada tang shu bitar lah ñiew kum ka jingpyniap, uei ba lah ban sumar ia kata ka hukum.
MATHAÏOS 5:21-22
“Phi la ïohsngew ba la ong ha kiba mynbarim, ‘Men ym pynïap: uno uno ruh uba pynïap, te kan dei ïa u ban hap ha ka jingbishar:’ hynrei, nga ong ha phi, ba uno uno ruh uba da sngewbitar ïa u paralok jong u khlem nia, kan dei ïa u ban hap ha ka jingbishar: uno uno ruh de u ban khot ïa u paralok jong u, ‘Raka’, kan dei ïa u ban hap ha ka jingbishar bah; uno uno ruh de u ban khot ïa u, ‘Me uba mutlop runar’, kan dei ïa u ban hap ha ka dujok ding.
Ha man ki jingbatai U Jisu shaphang ka hukum ngi shem ba U batai kham khia shuh shuh.
Ka jingkylli ka long balei U Jisu u da kwah ban pynkhia ia ka hukum?
Ka jubab kaba lyngkot ka long ba ngin sngewthuh pleng da u briew ka long ka bym lah ban sumar ia ka hukum, bad namar ba ngim lah ban sumar ngi lah long kiba la rem namar kata ka hukum, ngi lah long ki nongryngkang bad kiba pop, ngi long kiba dei ban shah pynshitom, dei namar kata ka daw ngi donkam ia U Jisu, ba dei satang ka jingaiei jong U kaba lah ban pynim ia ngi.
Ka hukum barobor ka kdew ia ka pop ba ngi leh bad ka pynrem pyrshah ia ngi, ba ngin sngewthuh ba ngi donkam ia U Jisu. Dei tang U Jisu u ba lah ban pyllait ia ngi na kata ka jingtim ka hukum.
GALATIA 3:13
U Khrist u la siewspah ïa ngi na ka jingtim ka hukum, da kaba la pynlong ïa u ka jingtim na ka bynta jong ngi: namar la thoh: “Long ba la tim ïa uwei uwei baroh uba sdien ha u dieng”:
Mynta U Jisu u dang khot ia ki nongryngkang hukum bad haba ngi wan, u map bad u ong, Khie leit bad wat leh pop shuh, kumba u ong ia kata ka kynthei kaba la ryngkang hukum da kaba ka la ia klim bad ki briew.
ÏOANNIS 8:10-11
Te U Jisu haba u la pynïeng ïa lade, bad ba um ïohi ïano ïano ruh, hynrei, tang ïa kata ka briew, u la ong ha ka, “Ko briew, hangno kito ki nongmudui jong pha? ym don ba la pynrem ïa pha?” Ka te ka la ïathuh, “Ym don, A Trai.” U Jisu u la ong te ha ka, “Nga ruh ngam pynrem ïa pha; to khie leit noh, bad to wat leh pop shuh.”
Haba U Jisu u la pyllait ia ngi na ka jingtim ka hukum, kam mut pat ba ngi lah ban leh pop katba mon, pynkhein hukum katba mon, hynrei U Jisu u ong, nga la map…, hynrei to wat leh pop shuh.
To U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | August 19, 2022
Comments
Post a Comment