Kawei pat ka dei ka jingshongthait Sabaton ba la ai ha ka por u Moses la thoh ha kitab Jingkhein 15:32-36. Kiba pynkhein ia kane ki shah lynthem maw ha ban da iap. Kane ruh ka jingshongthait Sabaton dei ha ka sngi kaba hynniew. Ka sdang naduh janmiet sngi Thohdieng haduh janmiet sngi Saitjain. Katei ka dei ka jingshongthait bneng ha ka dohnud kiba la pdiang ia U Jisu, katba kaba ar dei kaba shah lynthem lada pynkhein ia ka.
Don kiba ong ba ka don sa kawei pat ka jait Sabaton kaba ym ju lynthem namar ba ka dei ka Sabaton jong ka ia jingaiei. Ka Proverb 30:6 ka ong, "me wat pynlang ha ktien jong u, ioh un sneng ia me." Phin sa sngewthuh khambha hadien lada phi iaishah.
Kane ka jingshongthait Sabaton ba shah lynthem lada u briew u pynkhein ia ka, ka dei tang ka syrngiew ia ka met ba U Jisu un sa knia halor u dieng ne diengphna. Ka jingiap U Jisu bad ka jingmihpat jong U ka pynioh ha u bangeit ia katei ka jingshongthait U Blei ha ka dohnud haba u ngeit bad pdiang ia U Jisu uba la iap na ka bynta baroh bad ruh na ka bynta kito kiba dei ban shah lynthem maw ha kaba pynkhein Sabaton.
Ha ka Kolossai 2:16,17 la thoh kumne: "Namar kata wat ba uno uno ruh un bishar ia phi ha kaba bam lane ka dih, lane shaphang ka sngi jingkhawai, lane u nai thymmai, lane ka sngi Sabaton: kiba long ka syrngiew ia kiei kiei ki ban sa wan hynrei ka met ka long ka jong U Khrist." Ia kane ka met U Khrist ba dei ban kñia la thoh biang ha ka shithi sha ki Nong Hebru 10:10, da kata ka mon la pynkhuid iangi da kaba ainguh ia ka met U Jisu tang shisien ai. Kitei haneng, kum ka rukom, ka sngi jingkhawai niam, u nai thymmai bad Sabaton ki Jiw ki long tang ka syrngiew ia ka met U Jisu kaba la kñia ban pynioh jingshongthait Sabaton bneng ha kiba ngeit ha U Jisu. Shaphang kane u khot ia ki nongryngkang hukum, u ong "to wan ha nga phi baroh kiba thait bad khia ka jingkit te ngan pynjem ia phi." Mathaios 11:28. Ha ka khyllipmat ba kylla kabamut bad ngeit: ki ioh ka jingsuk Sabaton bneng ha dohnud, ki la lait mraw na kane ka Sabaton kaba shah lynthem maw bad rung beit sha ka Sabaton bneng da ka jingngeit ha U Jisu. Ha ki Galatia 4:4-5 la thoh, "hynrei haba la jia ka ïa kaba biang U Blei ula phah ia la u khun, ia u ba la kha na ka briew, ia u ba la kha hapoh ka hukum, khnang ba un ioh siewspah noh ia kita kiba hapoh ka hukum." Kito ki dei ki saw tylli ba la dep kdew hynne ha Kolossai 2:16-17, Ka rukom bam, ki jingkhawai niam, ki jingknia, nai thymmai bad Sabaton ki jiw. Ïa ngi ki khristan kam dei shuh. Ka bynta jong ka hukum u Moses kaba dang donkam ia ngi ki Khristan dei tang kaba la thoh ha Exodus 20:12-17.
Kitei ki hukum haneng ki iadei bad ka jingieit ia U Blei bad ki para marjan kumba ialade Markos 12:29-31.
Ka jingshongthait Sabaton kaba dang sah ia u paidlang U Blei ba la thoh ha ka shithi sha ki Hebru 4:8-10 ka dei kaba la dep ioh ha ka khyllipmat ba ngi pdiang ia U Jisu. Ngim don shuh ha Sabaton ki jiw hynrei ngi don ha ka Sabaton bneng ba la thoh ha Genesis 2:2. Namar lada u Joshua u la la ai ka jingshongthait ia ki yn ym da la kren shaphang kawei pat ka sngi. Namar kata ka dang sah ka jingshongthait Sabaton ia u paidlang U Blei. Namar uta uba la leit bsut sha ka jingjah thait jong u, u hi ruh u la shongthait na la ki kam jong u, kumba U Blei u la leh na kita ki jong u. Ka shai kdar kum ka sngi ba ki ba la pdiang ia U Jisu ki la ioh ia ka jingshong thait bneng kaba la thoh hangne ha ka dkhot ba 10 bad Genesis. Ngi la mih noh na Sabaton ba shah lynthem maw sha ka Sabaton bneng. Kawei pa kawei ka sngi lah ban mane ym dei tang ha ka sngi Sunday ne sngi U Trai. Ki bangeit ha ki Kam 4:46 ki ia mane man ka sngi.
Ha bymjukut ym ju khein sngi shuh. U Kpa ba ha bneng u la hukum ia ki jingthaw ha bneng, ba kin mane ia U bymjukut bymjukut bymjukut. Amen
Copyright © Pastor S Swer | March 01, 2022
Comments
Post a Comment