Long uba khlaiñ bad ba shlur bha
"Hato ngam shym la hukum ïa me? To long uba khlaiñ bad uba shlur bha; wat tieng, lymne wat kyiuh: namar U Trai U Blei jong me u don ryngkat bad me kat sha kaba me leit.”
Hadien ba U Moses u shakri jong U Trai u la iap, U Blei u la khot sa ia u Joshua ba un ialam ia ki khun Israel.
Ngi iohi haba U Blei u khot ia u, u da ai ruh ia ka jingbthah (instruction) kumno ba U Joshua u dei ban leh bad ban long.
Ngin ia peit mynta:
1. To long uba khlaiñ bad uba shlur bha:
U Blei u ong ia U Joshua ba me dei ban long uba khlaiñ bad ba shlur bha, ym dei ban khlaiñ malu mala ne ban shlur malu mala, hynrei khlaiñ bad shlur bha. Ym dei ruh ban shu khlaiñ khlem shlur bad ban shu shlur khlem khlaiñ, hap ban khlaiñ bad ban shlur bha. Kata ka dei ka jingkwah jong U Trai ia U Joshua.
Balei udei ban long uba khlaiñ bad shlur bha?
Khnang ba u lah ban pynioh kynti ia ka ri jingkular ha ki khun Israel.
Ngin ia peit kaba nyngkong, To long uba khlaiñ: Ngi hap ban sngewthuh haba ong 'To' ka mut ka dei ka hukum ba hap ban leh bad ban long. Dei namar kata ka daw ngi iohi ha katei ka dkhot U Blei u ong, Hato ngam shym la hukum ïa me? U Blei u hukum ia U Joshua.
Mynta ngi sngewthuh ban long kiba khlaiñ ka dei ka hukum jong U Blei ia uwei pa uwei u bangeit, ym tang ia U Joshua. Eph 6:10, Ha kaba wai noh to long kiba khlaiñ ha U Trai. Ban long kiba khlaiñ ha U Trai ka long kaba donkam palat.
Ka jingkylli ka long, Kumno ngin pynkhlaiñ ia lade?
Da ka Ktien jong U Blei: Kumba ka met ba kan long kaba khlaiñ donkam ia ki jingbam kiba tei met. Kumta ruh ba ka jingim mynsiem jong ngi kan long kaba khlaiñ donkam ia ka jingbam kaba long ka Ktien U Blei.
U Jisu u pynshisha ba ka Ktien U Blei ka long ka jingbam. MAT 4:4. Kumta haba ngi bam (pule bad puson) ia ka, ngin long kiba khlaiñ.
U apostol Ioannis u pynshisha ba ka Ktien U Blei ka pynkhlaiñ ia u briew.
1 ÏOANNIS 2:14
Nga la thoh ha phi, ko ki kpa, naba phi ithuh ïa uta uba long naduh kaba mynnyngkong. Nga la thoh ha phi, ko ki samla, naba phi long ki bakhlaiñ, bad kata ka ktien U Blei ka ïaisah ha phi, bad phi la jop noh thiaw ïa uta u basniew.
Haba ka Ktien jong U Blei ka don ha ngi, ngin long kiba khlaiñ bad kata ka jingkhlaiñ ka pynlong ba ngin jop thiaw ia kaba sniew lane ia u nongshun.
Ka jingkyntu ia ngi ki bangeit ka long, 'To ngin ieit ia ka Ktien U Blei, ngin pule bad puson ia ka synia sngi haduh ba kan da shong dap hapoh jong ngi.
U apostol Paul u ong ha ka shithi sha ki Nong Kolosai 3:16, Ai ba ka ktien U Khrist kan shong kyrhai hapoh jong phi ha ka jingstad baroh; da kaba hikai bad da kaba ïasneng paralok ha ki salm, ha ki jingrwai bad ha ki jingkynud bakynja mynsiem, da kaba rwai da ka jingaiei ha ki dohnud jong phi sha U Blei.
Donkam ba u bangeit un thrang bad un sliang ia ka Ktien jong U Blei kumba u khunlung u thngan bad sliang ia ka dud jong ka kmie jong u.
1 PETROS 2:1-2
Namar kata, haba la iehnoh ïa ka jingpynsniew baroh, bad ka jingshukor baroh, bad ki jingleh arsap, bad ki jingbishni, bad ki jingïakren sniew baroh, kum ki khunlung ba dang kha, to phin kwah hir hir ïa ka basngur ka dud kaba dei mynsiem, khnang ba phin ïoh san da ka sha ka jingpynim.
Kaba ar, To long uba shlur bha: Ka jingkhlaiñ khlem ka jingshlur kam pat biang, donkam baroh ar, ka jingkhlaiñ bad ka jingshlur, kata kan pynlong complete ia u briew.
Kumno ngin long kiba shlur?
Ngin long kiba shlur dei haba ngi iohsngew ia ka jingkular jong U Blei ban don ryngkat lem bad ngi. U Joshua u la iohsngew ia kaei ba U Trai u la kular ban long ryngkat (Joshua 1:1-9), bad kane kaba u la iohsngew ka la pynshaitbor ia u ha kaba u la iaid shaphrang da ka jingshlur bad u la jop ia ki nongshun jong u baroh.
U nongrwai Salm u ong, La nga iaid ia ka them ka syrngiew ka jingiap ngan ym sheptieng, namar me don ryngkat ma me bad nga. Salm 23:4
Shuh shuh Salm 27:1 ter ter u ong, U Trai u long ka jingshai jong nga, iano ngan sheptieng, iano ngan khaweit.
Paralok baieit, U Trai u la kular ban don ryngkat bad ngi, kumta to ngin ym sheptieng, to ngin nym khaweit, Hynrei to ngin long shlur na ka bynta U Trai. Mat 28:18-20
Balei ba ngi donkam ban long kiba khlaiñ bad ba shlur?
Ban pynioh kynti ia ka ri jingkular ha kiwei pat. Joshua 1:6
Ngi donkam ban long kiba khlaiñ bad ki shlur bha namar ba ngi don ka bynta ban pynioh bynta ia ka ri jingkular kaba long ka bneng.
Kumno ngin pynioh bynta ia ki?
Da kaba ngi ialap bad phla ia U Jisu sha kiwei pat.
U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh; te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem. MARKOS 16:15-16
2 TIMOTHI 4:2
"... to men ïalap ïa kata ka ktien; to ïaiminot haba dei por, ha bymdei por de; to pynkynduh, to sneng, to kyntu da ka jingshahslem baroh bad ka jinghikai.
Ngi donkam ban long kiba khlaiñ bad kiba shlur ban ialap ia U Trai la haba dei por ne ha bym dei por de.
To U Blei un kyrkhu ia phi, Amen.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | August 23, 2022
Comments
Post a Comment