Uei une U Kornilios? U Kornilios udei u Gentil bad udei ruh u rangbah shispah na ka kynhun shipai ba la khot “Ka Italia”. KI KAM 10:1
U dei U Jentil, tangba u dei u briew ba riewblei bad uba sheptieng ia U Blei. Bad la ong ba une U Kornilios udei u Jentil ba nyngkong eh ban ngeit bad pdiang ia U Jisu. (First Gentile Christian)
Haba ngi peit ha ka Bible naduh basdang ka ministry U Jisu ngi iohi ia ka gospel la ialap beit tang ha ki Jew/Israel.
Mat 10:5-6, U Jisu haba u phah ia ki 12 ngut ki synran jong u ban leit ialap, u da ong, Wat leit ha ka lynti ki Jentil.
Ia lade ruh u ong ba ym shym la phah ia nga ban leit sha ki kiwei pat (Jentil), hynrei tang ha kita ki langbrot kiba la jah noh na ka ïing Israel. Mat 15:21-24
Haba ka Nong Kanaan ka kyrpad jingpynkhiah ia ka khun jong ka, U Jisu u ong ba ym long ban ai ia ka jingbam ki khun ha ki ksew, ia ki Jentil la ñiew ia ki tang kum ki ksew. Mat 15:24-27
Hynrei hadien ka jingmih pat U Jisu u la ai ka hukum ia ki synran ban ialap ia ka gospel sha ki bynriew baroh kynthup sha kita ki ksew ba long ki Jentil.
Kam 1:8, U Jisu u ong, phin ioh diang ia ka bor…phin long ki nongphla ia nga ha Jerusalem, Judia, Samaria bad shaduh bakut ka pyrthei. Kaba mut ban ialap ia ka gospel ym don pud shuh. Lah ban ialap iano iano, hangno hangno.
Mynshuwa ki nong Samaria kim long ban ia jan bad ki Jiw (Ioan 4:7-9), hynrei hadien ba U Mynsiem Bakhuid u la wan hiar ha ka sngi Pentecost, ia ka Gospel la ialap ha ki bynriew baroh, bad Jiw bad Greek, bad Jentil, bad mraw bad ba laitluid bad kumta ter ter. Markos 16:15
Kumta ngi iohi ha ka kitab Ki Kam ki Apostol 10:34-43, kumno U Petros u la sdang ban ialap ia ka gospel ha ka ïing U Kornilios ba long U Jentil.
V.34 - U Petros u ong ba mynta ym don shuh ka jingñiew shiliang khmat ha khmat jong U Blei. Ym don pud shuh.
Ngi bunsien ngi buhpud da ma ngi, ngi pyrkhat tip da khot jingiaseng ïing ia kito tip kin ngeit ne em, lane ni ito te lah tip lypa ba in nym ngeit da khot ne da in wan makna ruh, ni ito te ba sngewniam bad kumta ter ter. Ngi lah calculate lypa ma ngi ia U Blei. Kumba long U Petros haba u iohi ia ka jingpynpaw, u sdang ban kylli, ban bun nia bad U Blei. Oh ba kumne ba kumta. Hynrei ka jingpynim ka long ia baroh. Uta uba ngeit, ong ka Ktien jong U Blei. Mar 16:15
Ngin ia peit biang shaphang une U Kornilios, kaei kaba u la leh bad ai ba kane kan long ruh ka nuksa ia ngi. (v.24)
1) U lum ia ka ïing ka sem.
U Kornilios u don ka jingkitkhlieh ia la ka jong ka ïing ka sem. Um kwah ban ioh jingpynim tang ia lade shimet, hynrei u kwah ruh ba ka ïing jong u baroh kawei kan mad ia ka jingpynim jong U Trai. Kumta u la lum lang ia ka ïing baroh kawei ba kan shong ban ia sngap bad shah shkor lang ia ka jingialap U Petros.
Ngi ruh kum ki bangeit ngi dei shisha ban don ka jingkitkhlieh ia la ka jong ka ïing ka sem, ban khmih ba iwei ruh in nym long shabar na ka sem jong U Trai. La ka dei ka kmie, u kpa, ki khun ki kti, ki hynmen para bad kumta ter ter.
Ha ka jingialap ha ka sngi Pentecost, U Petros u ong to kylla bamut namar ka jingkular ka long ia me bad ia ka ïing jong me. Kam 2:38-39
Ka jingkular ia ka jingpynim kam dei satia tang ia iwei ar ngut, hynrei ka dei ia baroh. Kat kiba ngeit. Mar 16:15
2) U khot lang ruh ia ki kur jong u.
Hangne ngi iohi ba ka circle ka lah nangiar. U Kornilios u don ruh ka jingkitkhlieh na ka bynta ki kur jong u. Um kwah ban im tang ia lade, lane ban im tang ka ïing jong u, hynrei u kwah ba ki kur jong u ruh kin im. Kumta ngi iohi ka Ktien U Blei ka iathuh ba u la lum bad khot lang ia ki kur jong u ba kin wan ban sngap ia ka jingialap U Petros.
Ai ba kane ruh kan don ha ngi kum ki bangeit, ban don ka jingkitkhlieh wat na ka bynta ki kur jong ngi, ban khot ban wer ia ki ba kin ngeit bad pdiang ia U Jisu, ba kin ioh jingpynim.
U Blei barabor u kwah ba ngin pyniar ia ka ïing jain jong ngi. Um kwah ba ngin long kiba khapnap ban ai ia U Khrist sha kiwei pat.
ISAÏAH 54:2-3
“Pynkylluid ïa ka jaka ka ïingjaiñ jong pha, bad to kin pynïar noh ïa ki jaiñ ki jaka shong jong pha; wat bynnud: kham pynjrong ïa ki tyllai jong pha, kham pynskhem ruh ïa ki snar jong pha. Naba phan nang roi sha kamon bad sha kadiang; te u symbai jong pha un ïoh ïa ki jaid bynriew, bad un pynlong kiba don briew ïa ki shnong bakynjah."
3) U khot ruh ia ki paralok baieit jong u.
Nalor ka ïing bad ki kur, U Kornilios u la khot ruh wat ia kita ki lok baieit jong u baroh. U don ka jingsngewkhia na ka bynta ki paralok jong u ruh. Kumba ma u bad ka ïing jong u lem bad ki kur jong u, u kwah ruh ba ki paralok baieit jong u kin ioh jingpynim lang. Kata ka dei ka jinglong jong U Kornilios.
Ai ba kane ruh kan don ha ka jingim jong ngi kum ki bangeit. Ngin don kata ka jingsngewsynei (compassion) ia la ki paralok jong ngi ba ma ki ruh kin mad ia U Trai.
Kaba sngewtynnad ha kane ka jingiaseng ïing ha ka ïing U Kornilios ngi iohi ka ïing jong u baroh ka la ngeit, kita ki kur bad ki paralok jong u ruh ki la ngeit bad pdiang ia U Trai, bad la pynbaptis ia ki. Hallelujah
Ka jingkyntu ka long to ngin ioh ia ka jingmut jong u Kornilios, ban don ka jingthrang bad ka jingangnud ba ka ïing jong ngi baroh ka dei ban ioh jingpynim, ki kur jong ngi ki dei ban ioh jingpynim, ki paralok baieit jong ngi ki dei ban ioh jingpynim.
Ngin nym shu hun noh tangba ngi lah ioh jingpynim ia lade, hynrei to ngin ai lem ia U Khrist sha kiwei pat. Ioh ia ka nuksa ka nong Samaria, haba ka la ia kynduh ia U Jisu, ka la mareh sha la shnong ban iathuh lem ha ki para shnong jong ka, ba ma ki ruh kin iashem lem ia U Khrist. (Ioannis 4)
To ngin nym buh pud ban ialap, bad ban iawer ia ki briew sha ki jingiaseng lane wat ha ki jingiaseng ïing ha ki ïing jong ngi namar U Blei u don la ka jong ka jingtrei kumba u la trei ha ka ïing U Kornilios.
U Kornilios um dei u nongialap, hynrei u don ka jingkitkhlieh ban lum ban lang ia la ka ïing ka sem, ki kur ki jait bad ki paralok jong u bad u khot ia ki shakri U Trai ban wan ialap ha ïing jong u.
Ngi ruh lehse ngim pat nang ban ialap da lade, hynrei to ngin lum ngin lang ia ka ïing ka sem, ki kur ki kha, ki paralok para jor bad khot ia ki briew jong U Blei ban wan ialap ha ka ïing jong ngi, ryngkat ka jingduwai bad ka jingngeit ba U Blei un ktah un pynkynduh bad pynim ia kiba ha ïing ha sem, ki paralok para jor jong ngi, kumba la long ha ka ïing U Kornilios.
U Paul u ong to ialap ia ka gospel, la haba dei por ne ha bym dei por de. 2 TIMOTHI 4:2
U Blei un kyrkhu, Amen.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright @ Jester Mawlong | August 1, 2022
Comments
Post a Comment