Ban ai report kam long kaba sniew, ngi donkam ban ai report la ka long ha kano kano ka kam ba ngi trei ne ngi bat (la ka long ka kam U Blei ne ka kam pyrthei) khnang ban tip kumno ka kam iaid bad ka long. Hynrei ngi hap pat ban sumar haba ngi ai ia ka report.
Lehse phi lah ban kylli balei ba hap ban sumar kumta?
Ngi hap ban sumar namar u Soitan u ap kmang nangno ban ioh bsuh khlieh ha u briew, kham tam ha ki shakri U Blei, kumno ban ioh nguid tylli bad pynjot ia ki (1 PETROS 5:8). IOANNIS 10:10
Ia kane ngi iohi ha ka por ba ki 70 ngut ki synran U Jisu ki wanphai na ka jingleit ialap jong ki. Haba ki la wanphai, ki la wan ai report ruh sha U Jisu.
LOUKAS 10:17-20
Te kita ki hynñiewphew ngut ki la wan phai pat da ka jingkmen, ki da ong, “Ko Trai, wat ïa ki ksuid la pyndem hapoh jong ngi ha ka kyrteng jong me.” U te u la ong ha ki, “Nga la ïohi ïa u Soitan ba u hap kum ka leilieh na bneng. Ha khmih, nga la ai ka bor ha phi ïa ka ban ïuh roit halor ki bseiñ bad ki 'ñianglartham, bad halor ka bor baroh ka jong u nongshun; bad ym don ei ei ruh ka ban pynsniew ïa phi. Hynrei, wat kmen ha kane, ba ïa ki mynsiem la pyndem hapoh jong phi; hynrei, to kmen namar ba la thoh ïa ki kyrteng jong phi ha bneng.”
Ha ka dkhot ba 17 ngi iohi kine ki hynñiewphew ngut ki la wan phai da ka jingkmen, bad ki da iathuh ha U Jisu ban ong, “Ko Trai, wat ïa ki ksuid la pyndem hapoh jong ngi ha ka kyrteng jong me.” Bad mar kumta hi U Jisu u kem ktien ban ong, “Nga la ïohi ïa u Soitan ba u hap kum ka leilieh na bneng. Ma ki ki iathuh ba ngi la leh kumta, ngi la leh kumta, U Jisu pat u iohi ia u Soitan ba u hap kum ka leilieh.
Hooid U Jisu u iohi ia u Soitan kum uta u bym don bor shuh, uba la shah shop ha U Blei na bneng, hynrei ha ka juh ka por U iohi ia u Soitan ba u hap kum ka leilieh (kaba kren ia ka jingsted jong u Soitan kum ka leilieh kumno ban ioh rung ha u briew ban ioh bsuh eiei ha u briew). Kumta ngi hap ban sumar haba ngi ai report, kham tam haba ngi la lah pyndep (accomplished) ia kaei kaei kaba bha ba ngi leh ioh ba u Soitan u rung bad u bsuh ryngkat bad ita i jingsngew long eiei, i jingsngewlah, sngew don bor, ita i jingsngew sarong. Bad lada ngim sumar, bad lada u Soitan un ioh jaka un pynkiew skong, un kyntiew sha jrong, bad ynda ngi la kiew kham ha jrong, un sa khynniat kylla pat najrong shapoh bad kata kan long ka jingmynsaw bad ka jingma bakhraw.
Dei namar kata ka daw U Jisu u ong, wat kmen than haba phi lah ban leh eiei, wat haba phi lah ban pyndem ia ki ksuid hapoh jong phi, hynrei phin kham kmen shibun haba la thoh ia ka kyrteng jong phi ha bneng.
Namar bun bah kita kiba la accomplished shibun kiei kiei, hynrei kiba U Jisu um ithuh ia ki.
MATHAÏOS 7:21-23
“Ym u briew baroh uba ong ha nga, ‘A Trai, A Trai’, u ban ïoh leit hapoh ka hima ki bneng; hynrei, uta keiñ uba leh ïa ka mon U Kpa jong nga uba ha bneng. Shibun kin ïa-ong ha nga ha kata ka sngi, ‘A Trai, A Trai, ngi ngim shym la ïalap ha ka kyrteng jong me? Ngi ngim shym la beh noh ïa ki ksuid ha ka kyrteng jong me? Ngi ngim shym la leh shibun ki kambah ruh ha ka kyrteng jong me?’ Ynda kumta te, nga ruh ngan ong pyrshah ha ki: Ngam ju la ithuh ïa phi; khie leit noh na nga, phi kiba ju trei bymman.
Jingkyntu: To ngin nym ai jaka ia u Soitan da kano kano ka rukom bad ka lynti.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | August 24, 2022
Comments
Post a Comment