Nga kwah ban ia peit mynta shaphang u bangeit bad la ka jong ka mynsiem. Kaei ka kamram jong u bangeit ia la ka jong ka mynsiem?
Ka long kaba donkam ba kum ki bangeit ngin don ka jingkitkhlieh ia la ka jong ka mynsiem. Kumba ngi don ka jingkitkhlieh na ka bynta ka met, ngi dei ruh ban don ka jingkitkhlieh kham tam na ka bynta ka mynsiem jong ngi.
Ka Bible ka iathuh ia ngi ba ka mynsiem ka kham kordor ban ia ka met. Ka met kan sa pyut noh ha kawei ka sngi, hynrei ka mynsiem ka im bymjukut. Bad dei ia kane ka mynsiem ruh ba U Trai Jisu u la wan khnang ban wad.
Ngin ia peit mynta ia ka nuksa babha na ka jingim U David kumno u leh bad la ka jong ka mynsiem.
Haba ngi pule ha ka Bible ngi shem U David u dei u briew uba don ka jingkitkhlieh na ka bynta la ka jong ka mynsiem.
1. Haba ka leh klet ia U Blei, u kyntu ia ka:
Ngi pule ha ka Salm 103 ngi iohi kumno u rwai ia ka jingrwai ban kyntu ia la ka mynsiem ba kam dei satia ban leh klet ia U Blei.
SALM 103:1-5
¹Ko mynsiem jong nga, to kyrkhu ïa U Trai; bad baroh kaba ha nga, ïa ka kyrteng bakhuid jong u. ²Ko mynsiem jong nga, to kyrkhu ïa U Trai, bad wat klet ïa ki jinglehbha jong u baroh: ³uba map ïa ki jingleh bymman jong pha baroh, uba shna ïa ki jingpang jong pha baroh; ⁴uba pynim ïa ka jingim jong pha na ka jingjot; uba pynphong pansngiat ïa pha da ki jingleh isynei bad ki jingisynei bajem: ⁵uba pynkdang ïa ka shyntur jong pha da kiei kiei ki babha; kat ban pynthymmai ïa ka jinglong samla jong pha kum ka pukni.
Ha ka dkhot ba nyngkong u kyntu ia la ka jong ka mynsiem ba ka dei ban kyrkhu ia U Trai, namar ba U Trai u la kyrkhu ia ka ha kiei kiei baroh, uba la map ia ki jingleh bymman jong u baroh… Bad ha ka dkhot ba ar u ong "Wat klet ia ki jinglehbha jong U baroh"
Kane ka long ka jinghikai ba khraw na ka bynta jong ngi ruh ba ngim dei ban klet ia U Trai namar kaei ba u la leh na ka bynta jong ngi.
Kaba sngewsih ka long bunsien ki briew ynda haba U Trai u la map ia ki pop bad jingleh bymman jong ki, ynda ki la koit la khiah, la dap la biang, la man bha man miat kiei kiei baroh, ki sdang ban klet noh ia U Trai.
Kane ka jia ia ki khun Israel ruh. U Blei u lah dep maham lypa ia ki ba kim dei ban klet ia U ynda haba ki la manbha, hynrei ki khun Israel kim shym la patiaw ia kaei ba U Blei u ong, ynda ki la manbha ki la klet shisha ia U Trai.
DEUTERONOMI 8:3, 11-20
U la pynrit te ïa me, bad u la shah ïa me ban sngewthngan, bad u la bsa ïa me da ka manna, ïa kaba mem ju tip, lymne ki kpa jong me kim ju tip; khnang ba un pyntip ïa me ba u briew um im tang da u kpu, hynrei, ba u briew u im da ka ktien baroh kaba mih noh na ka shyntur jong U Trai. “To sumar ïa lade ba ïoh men klet ïa U Trai uba U Blei jong me, da kaba khlem da sumar ïa ki hukum jong u, bad ïa ki jingbishar jong u, bad ïa ki aiñ jong u, ïa kiba nga hukum ïa me ha kane ka sngi: ba ïoh ynda me la lah bam, bad me la kdang, bad me la thaw ki ïing ki babha, bad la shong sah ha ki; bad haba ki la ïaroi ki masi jong me, bad ki langbrot jong me, bad ba la man bun ka rupa, bad ka ksiar jong me, bad ba la man bun baroh katba me don; te hadien kata ba ka dohnud jong me ka da sngewkhraw, bad men klet te ïa U Trai uba U Blei jong me, uba la wallam noh ïa me na ka ri Ijipt, na kata ka ïing ka jinglongmraw; uba la ïalam ïa me lyngba kata ka ri khlaw bakhraw bad ba-itieng, ha kaba la don ki bseiñ ba-meh ding, bad ki 'ñianglartham, bad kaba rang ryngkhiang ha kaba ym don um: uba la pynmih te ka um ïa me na u mawshamok; uba la bsa ïa me ha kata ka ri khlaw da ka manna, ïa kaba ki kpa jong me kim ju tip; ba un ïoh pynrit ïa me, bad ba un ïoh tynjuh ïa me, khnang keiñ bad leh bha ïa me ha ka bakut jong me; bad ba me ong ha la ka dohnud, ‘Ka bor jong nga hi, bad ka bor ka kti jong nga, ka la pynïoh ïa nga ïa kane ka spah.’ Hynrei, to men kynmaw ïa U Trai uba U Blei jong me, namar long ma u keiñ, uba ai bor ïa me ban ïoh ka spah; ba un ïoh pynskhem ïa la ka jutang ïa kaba u la smai ha ki kpa jong me, kumba ha kane ka sngi. Te kan long, lada men klet jynduh ïa U Trai uba U Blei jong me, bad men bud hadien kiwei pat ki blei, bad shakri ïa ki, bad mane ruh ïa ki, nga phla pyrshah ïa phi ha kane ka sngi ba phin ïajot noh da shisha. Kumba kita ki jaid bynriew ïa kiba U Trai u pynjot noh ha shuwa jong phi, kumta keiñ, phi ruh phin ïajot noh; namar ba phim shym kohnguh ïa ka ktien U Trai uba U Blei jong phi.
U Blei um sngewbha ban iohi ba ngin klet noh ia U ynda haba ngi la man bha kiei kiei baroh.
U Solomon u duwai ha U Blei u ong, "...wat ai ïa nga lymne ka jingkyrduh lymne ka spah; to bsa ïa nga da ka jingbam kat ban biang ïa nga: ïoh ba ngan sngewdap, bad ba ngan len ïa me, bad ngan ong, “U Trai u long uei?” lane ïoh ba ngan duk, bad ba ngan tuh, bad pyndonkambeiñ ïa ka kyrteng U Blei jong nga." PROBERB 30:8-9
Ngi iohi ia ka Balang ha Laodikaia ruh ynda haba ka la sngewdap kyrhai ka la sdang ban klet noh ia U Blei, haduh ba kata ka Balang ka la shu long blem blem, shit ruh em, khriat ruh em. JPW 3:14-19
U Blei um kwah ia ngi ba ngin shu long ki Khristan blem blem, plem plem. U kwah ba ngin long kiba shitrhem ha ka mynsiem na ka bynta jong U.
Kumta nga kyntu ieit ia phi bad ia ngi lang baroh, shuwa ba U Blei un maham kumba maham ia ka Balang ha Laodikaia, to ngin kyrsiew ia la ka jong ka mynsiem jong ngi ba kan ym klet ia U Blei kumba U David u la kyrsiew ia la ka jong ka mynsiem.
2. Haba don hapdeng ka jingnoh mynsiem:
U David kum u briew u iakynduh shibun kiei kiei ki bym sngewtynnad ha ka jingim kiba pynlong ba ka mynsiem jong u kan noh. U la shah beh thong ha u Saul, u lah shah beh thong ha u Absolom uba long u khun jong u, u la hap ban phet rieh sha ki krem ki kroh, haduh ba um ioh shuh ban leit sha ka temple U Blei ban mane ia U. Pynban kaba sngewtynnad ka long, haba u sngewthuh ba ka mynsiem jong u ka la noh, u la kyrsiew bad kynteit ia la ka jong ka mynsiem jong u da kaba ong, Balei pha long kaba la pynnoh, ko ka mynsiem jong nga? bad ba pha pynkhih hapoh jong nga? To kyrmen pha ha U Blei: naba ngan sa ïaroh ïa u pat namar ka jingkhiah ka khmat jong u. SALM 42:5
Bunsien kum ki briew haba ngi ia kynduh ia ki jingeh bad ki jingjia bym sngewtynnad, ngi noh mynsiem, ngi khia ka jingmut jingpyrkhat, teng teng haduh ba ngim kwah shuh ban leh eiei, wat ban pule Bible, ban duwai bad ban shakri ia U Trai ruh ngim kwah shuh. Hynrei ha kaba kum kata ka por ngi hap ban kyrsiew ia la ka mynsiem kumba U David u la kyrsiew. Lada ngim nang ban kyrsiew ia la ka mynsiem, ngin iap ha kata ka jingnoh mynsiem.
Balei ki briew ki poi shaduh u pud ban pyniap ia lade (suicide) haba ki ia shem ia ki jingeh jingiakynduh ha ka jingim? Ka daw ka dei namar ba kim nang ban kyrsiew ia la ka mynsiem ba ka dei ban ngeit, ban kyrmen bad ban phai sha U Blei. Ha U Blei ka don ka jingkyrmen, ha U Blei ka don ka lad ban lait na kita ki jingeh jingjynjar.
U Jisu u ong, To wan ha nga, phi baroh ki bathait bad bakhia ka jingkit, te ngan pynjem ïa phi. MATHAÏOS 11:28
Paralok baieit wat nym kit ha lade ia ki jingkhuslai kiba pynnoh mynsiem ia phi. U apostol Petros ruh u ong bret ia baroh kita kiei kiei kiba pynnoh mynsiem jong phi sha U Trai.
1 PETROS 5:7
"...da kaba bred halor jong u ïa ka jingkhuslai jong phi baroh, naba u sumar sukher ma u shaphang jong phi."
SALM 55:22
"To bred ïa la ka jingkit halor U Trai, te un shan ïa me: un ym shah ban pynkhih ïa u bahok lano lano ruh."
Haba ngi nang ban bret, ngin ioh jahthait shisha. U Trai un pyllait war ia ngi. Hallelujah!
SALM 34:19
Ki jingjynjar u bahok ki long shibun: hynrei, U Trai U pyllait ïa u na ki baroh.
Wat pyrkhat tangba ngi lah ngeit ngin nym iakynduh jingeh, jingjynjar shuh. Ngi lah ban ia kynduh ia ki jingeh jingjynjar. Hynrei kynmaw ba ngin nym shu shong ha kyndong ban shu pyrkhat sah balei ka jia kumne ia nga??? Hynrei to ngin nang ban kyrsiew ia la ka mynsiem kumba U David u la leh ia la ka jong ka mynsiem ban ong, Balei pha long kaba la pynnoh, ko ka mynsiem jong nga? bad ba pha pynkhih hapoh jong nga? To kyrmen pha ha U Blei: naba ngan sa ïaroh ïa u pat namar ka jingkhiah ka khmat jong u.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong | August 19, 2022
Comments
Post a Comment