Ka jingbym san

Ka jingbym san ka dei kaba la maham ha ka Ktien jong U Blei na kawei ka por sha kawei ka por. U Jisu u da kren ruh ha ki pharshi na ka bynta ki bym san, bad haba ngi peit na ka jingkren jong U Jisu ngi iohi ba ka jingbym san ka don ha ka jingma.

Kiei ki daw kiba pynlong ia ka jingbymsan?

1. Ka jingjied.

Ka jingsan ba kynja mynsiem ka iapher na ka jingsan ha ka met. Ka jingsan jong ka met ka dei kaba U Blei u pynlong, ha kaba u briew wat la u kwah ban long khynnah sah, pynban ka met jong u kan san hi na ka jinglong khynnah sha ka jinglong samla, rangbah, tymmen bad kumta ter ter. Katba ka jingsan ba kynja mynsiem ka shong ha ka jingjied jong u briew shimet, lada u jied ban san un san, lada u jied ban ym san un sah hajuh. Ym don da kawei pat.

Kumta to ngin jied ban san da kaba ngin pynlut por ha ka jingiasyllok bad U Trai, da kaba pule ia ka Ktien jong U Blei bad ha ki jingduwai.

2. Ka jingbym pynshahshkor ia ka jinghikai ba la iohsngew.

U Jisu u ong to sumar kumno phi sngew (Markos 4:24). Ngi donkam ban sumar kumno ngi sngew ia ka jinghikai ba janai ba la hikai ia ngi, namar lada ngim sumar bad ngim pynshahshkor ia kaei kaba ngi iohsngew, kata ka jinghikai ba janai kan nym lah ban pynsan ia ngi. Kumta khnang ba ngin san, ngi donkam ban pynshahshkor bha ia kaei kaba ngi la iohsngew.  

Ïa kane ngi lah ban iohi ia ka nuksa na u Judas Iscariot uba long u synran jong U Jisu Khrist. Mut dur une u Judas u la bud ia U Jisu ryngkat ryngkat bad kita kiwei ki synran kat shaba u leit, hynrei ngi shem u Judas u la die noh pynban ia la u Kynrad jong u, U Jisu. Lah ban ong ba u Judas u la iohsngew lut ia ki jinghikai U Jisu, hynrei um san satia, dei namar ba um san, ha kaba kut u die noh pynban ia la u Kynrad. Balei u Judas um san haba ki juh ki jinghikai u iohsngew na u Kynrad jong u kumba kita kiwei ki synran ki iohsngew? Ka dei ka jingbym pynshahshkor ia kaei ba la hikai ia u.

N.B: Pynshahshkor ka mut ban pyndem ia la ka dohnud sha kata ka jinghikai ba janai ba la iohsngew.

PROBERB 2:1‭-‬5 

Ko khun, lada men pdiang ïa ki ktien jong nga, bad kynshew ïa ki hukum jong nga bad me; kat ban pyndem ïa la ka shkor sha ka jingstad, bad pyndei ïa la ka dohnud ha ka jingshemphang; bad lada me ïam ïawad ïa ka jingsngewthuh bad pynjam ïa la ka ktien ban ïoh ka jingshemphang; lada me wad ïa ka kum ïa ka rupa, bad wad bniah ïa ka kum ïa ki spah ba la buhrieh; kumta te men shemphang ïa ka jingsheptieng ïa U Trai , bad men shem ïa ka jingtip ïa U Blei.

 

Kumta ngi hap ban peit ialade, lada ka don ka jingbymsan ha ngi, ngi donkam ban ït ioh lehse ngim shym la pynshahshkor ia kaei ba ngi la iohsngew. 

To ngin long kum kita ki briew ba la thoh ha ka shithi sha u Timothi, ki briew kiba ju ioh jinghikai ha la ka sngi, hynrei ki bym lah ban poi sha ka jingtip ia ka jingshisha. 2 TIMOTHI 3:7

U Jakob u ong to ngin nym long tang ki nongsngew, hynrei to ngin long ki nongleh.

JAKOB 1:22-23

Te to long phi ki nongleh ïa ka ktien, bad ym tang ki nongsngew, da kaba shukor noh ïa lade hi. Naba lada uno uno ruh u long u nongsngew ïa ka ktien, bad ym u nongleh, une u long kum u briew uba khmih thuh ïa ka khmat ka met jong u ha ka ïitkhmih.

Haba ngi long ki nongleh ia kaei ba ngi iohsngew, ngin long kiba stad ong U Jisu. MATHAÏOS 7:24-27

3. Ka jingshahteh ha ki hukum bad ki niam ki rukom.

Kawei pat kaba pynlong ia u briew ban ym san ka dei ka jingshahteh ha ki hukum bad ki niam ki rukom.

HEBRU 6:1

Naba kumta, da kaba iehnoh ban kren shaphang ki jinghikai ki banyngkong shaphang U Khrist, ïa, ngin ïa nang ïaid shaduh ka jingpynjanai; khlem buh pat ka nongrim ka jingkylla-ka-bamut na ki jingleh baïap, bad ka jingngeit sha U Blei.

U nongthoh sha ki Hebru u ong ia ki bangeit ba ki dei ban iaid shaphrang haduh ban poi shaduh ka jingpynjanai (jingsan ba pura), ym ban dang shahteh ha kita ki hukum bad ki niam ki rukom ia kiba la ñiew kum ki jingleh baiap. 

Ki niam ki rukom barobor ki bat ia ki bangeit ba kin ym lah ban iaid shaphrang, ki long kum u tyllai ba teh ia ka lieng, kumta ngi hap ban ieh ia ki niam ki rukom shadien bad ban iaid shaphrang da ka jingngeit ha U Khrist.

U Paul u ong ia ki bangeit ha Kolossai ba kumba ki la pdiang ia U Khrist uba U Trai kumta ki dei ban iaid ha U, ym shuh ha ki niam ki rukom. KOLOSSAI 2:6 ter ter.

U Blei u khot ia ngi sha ka jingsan ba pura, hynrei u Soitan u ialeh ban pynwit (distracted) ia ngi da kiei kiei ki ban pynlong ia ngi ba ngin shu sah kut hajuh shi hajuh, kumta ka la dei ka por ia ngi ban kynther ia kita ki jingpynwit baroh bad ban iaid shaphrang haduh ban da poi shaduh ka jingdap rynieng ka jong U Khrist. 

U Blei un kyrkhu ia phi. Amen

© Jester Mawlong | July 30, 2021