2 TIMOTHI 4:1-8
¹Nga hukum ha khmat U Blei, bad U Jisu Khrist uba U Trai, u ban sa bishar ïa kiba im bad ïa ki baïap, bad da kata ka jingmihpaw jong u bad ka hima jong u, ²to men ïalap ïa kata ka ktien; to ïaiminot haba dei por, ha bymdei por de; to pynkynduh, to sneng, to kyntu da ka jingshahslem baroh bad ka jinghikai. ³Namar ka por kan jia, haba kin ym shahshkor ïa ka jinghikai bajanai; hynrei, haba ki don ki shkor ba-dait, kin ïakynton ha lade ïa ki nonghikai katba kum ki jingkwah brai jong ki hi; ⁴bad kin pynphai noh ïa la ki shkor jong ki na ka jingshisha, bad kin phai khmat sha ki puriskam. ⁵Hynrei, ma me, to sharai ha kiei kiei baroh, to shah shitom, to leh ïa ka kam u nongïathuhkhana, to pyndep ïa kata ka kam jong me. ⁶Namar ïa nga la theh noh lypa kum ka jingainguh dih, bad kata ka por ka jingleit noh jong nga ka la jan. ⁷Nga la ïaleh ïa kata ka jingïaleh babha, nga la pyndep ïa la ka jingphet, nga la ri ïa ka jingngeit. ⁸Naduh mynta, ïa nga la buh ïa kata ka pansngiat jong ka hok, ïa kaba U Trai, uta U Nongbishar bahok, un ai ha nga ha kata ka sngi: bad ym tang ha nga hi, hynrei, ha kita baroh ruh kiba ieit ïa kata ka jingmihpaw jong u.
U Apostol Paul hadien ba u sngewthuh ba ka jingleit noh jong u ka la jan (v.6), kumta u la thoh sha u Timothi ban hukum bad kyntu ia u ba u dei ban ialap ia kata ka Ktien, ban minot la haba dei por, ha bymdei por de. (v.1-2)
Kaei kane ka Ktien ba u Paul u phah ia u Timothi ban ïalap?
Kane ka Ktien ba u Paul u phah ia u Timothi ban ïalap ka dei kata ka jinghikai shongtynrai (sound doctrine) jong ka Ktien U Blei. Kam dei satia kata ka jingialap gospel ba ju ïalap paidbah, ban ong to Kylla bamut, pdiang ia U Jisu bad kumta ter ter, (watla ka long kaba dei ban ïalap ia ka gospel haba dei por ne ha bymdei por), hynrei kaei ba u Paul u mut hangne ka long beit ia kata ka jinghikai ba janai ne kata ka jinghikai shongtynrai jong ka Ktien U Blei (sound doctrine).
Ha ka dkhot ba nyngkong u ong, nga hukum ha khmat U Blei bad U Jisu Khrist uba U Trai. La hukum ïa u Timothi ban ïalap ia kata ka Ktien, kata ka jinghikai shongtynrai jong ka Ktien U Blei. Um shym la kyrpad, hynrei u hukum ba dei ban ïalap ia kata ka Ktien la haba dei por ne ha bymdei por de. Na ka bynta kiwei pat ki jingbthah ne jingdonkam ngi iohi ba u Paul u ju kyrpad, hynrei ha kaba ia dei bad ka jinghikai shongtynrai um shym la KYRPAD hynrei u HUKUM, kaba mut ba dei ban leh beit, ban kren beit. Kane ka pyni ia ka jinglong kyrkieh ban ïalap ia ka jingshisha jong ka Ktien U Blei, kata ka jinghikai shongtynrai (sound doctrine), la haba dei por ne ym dei por ruh. Hap ban pynkynduh da ka jingshisha jong ka Ktien U Blei ia ki briew ki bym pat tip ia ka jingshisha, hap ban sneng ia kito kiba hikai bakla ia ka jingshisha ka Ktien U Blei, hap ban kyntu da kata ka jingiaishahslem baroh ia ki bangeit ba kin iaineh ha kata ka jinghikai ba janai. Kata ka dei ka jingmut.
Ka mut aiu haba dei por ne bymdei por?
Kane ka mut ba ngi hap ban kren beit ia ka jingshisha jong ka Ktien U Blei lada ki briew ki sngewtynnad ne kim sngewtynnad, lada ki pdiang ne ki kyntait, lada ki rkhie beiñ ne ki iaroh, lada ka long sa ha kano kano ka rukom ruh hap ban ïalap ia ka jingshisha, kren ia ka jingshisha.
Balei ba hap ban ïalap la ka long haba dei por ne bymdei por ruh? Balei ba hap ban ïalap wat la ki briew ki pdiang ne ki kyntait ruh?
Ha ka dkhot ba lai bad ba saw u Paul u ong da kata ka jingiohi-lypa ba kan sa poi ka por ba ki briew kin ym sngewtynnad shuh ban sngap ia ka jinghikai ba janai (sound doctrine) hynrei kin sngewtynnad ban sngap ia kita ki jinghikai ki ban pynhun ia ka jingkwahbrai jong ki, ka ban pynhun ia kita ki shkor ba dait jong ki. Lada phin ïalap ia ka jingshisha ki briew kin pynphai noh ia la ki shkor jong ki, kim treh ban sngap, namar ba ka jinghikai ba janai kam pynjahdait satia ia ki shkor badait jong ki. Kin kwah beit ban sngap ia kita ki jinghikai ki ba kyrshan ia ka rukom ngeit bad rukom im jong ki. Kin kham sngewtynnad ban sngap ia ki kynja puriskam kai ong ka Ktien U Blei.
Nga ju iohi ha Facebook ki briew ki ju post bad kylli ia kane ka jingkylli, Balei ki nongshna phlim ne ki Nongrwai Khasi bad kiwei ki shna beit tang shaphang ka jingieit samla, balei kim ia shna teng ki jingrwai sneng kraw, jingrwai shaphang ka mariang, shaphang ki riewkhraw bad kiwei kiwei ki jaid jingrwai? Bad ha kata ka post (jingkylli) ngi i don kiba jubab kumne: Namar lada shna jingrwai da kiwei pat ki jingrwai ki duna bha kiba peit (views) bad lada shna ki jingrwai jingieit, comedy ki bun bha kiba like ba view.
Kata ka dei ka jingshisha bad ka jinglong jong ki briew ha kine ki sngi. Lada ia ki jingrwai mariang, jingrwai sneng kraw, jingrwai shaphang ki riewkhraw dang duna nongsngap nongpeit, katno tang lei ia ka jinghikai bashisha jong ka Ktien U Blei. Ka long kaei kaei kaba sngewsih. Hynrei la ka long sa kumno kumno ruh, ki briew jong U Blei kim dei ban shu hikai tang ban pynsngewtynnad lane ban shu pynsngewbha ia ki briew, hynrei ban kren beit ia ka jingshisha, hikai beit ia ka jinghikai ba janai (sound doctrine) lada ki sngap ne kim sngap. Kata ka long kaba ngi dei ban leh bad kaba u Paul u HUKUM bad kyntu ia u Timothi.
Ha ka dkhot ba saw u ong, ⁵Hynrei, ma me, to sharai ha kiei kiei baroh, to shah shitom, to leh ïa ka kam u nongïathuhkhana, to pyndep ïa kata ka kam jong me. Kum ki briew jong U Blei, ki nongialap, ngi hap ban long kiba sharai ha kaba iadei bad ka jinghikai, namar shibun ki jinghikai ba khyllah ki mih, khamtam ha kine ki sngi jong ngi mynta, ki jinghikai ba khyllah ki la syrtap lut ha ki social media bapher bapher. Na ka bynta ka jinghikai ba janai ngi hap ban shah shitom ruh ong u Paul, hap ban leh ia kata ka kamram kum ki nongialap ia ka jingshisha, hap ban pyndep hok. Hap ban pyndep ia kata ka jingiaphet thong ba la buh ia ngi, bad kata ka long ban hikai beit ia ka jingshisha (sound doctrine). Haba ngi leh kumta, ngin sa ioh ia kata ka Pansngiat jong ka hok ba U Trai u la pynkhreh ia ngi.
⁸Naduh mynta, ïa nga la buh ïa kata ka pansngiat jong ka hok, ïa kaba U Trai, uta U Nongbishar bahok, un ai ha nga ha kata ka sngi: bad ym tang ha nga hi, hynrei, ha kita baroh ruh kiba ieit ïa kata ka jingmihpaw jong u.
Ka jingkyntu ka long ia ngi ki nongialap bad ki nonghikai Ktien Blei ba ngin hikai beit ia ka Ktien ka jingshisha, khlem da khmih lynti la ki briew kin beiñ ne kin iaroh, kin like ne dislike ia ki post jong ngi, hynrei katba lah to ngin hikai bad kren ia kaei ba U Blei u sngewbha. U Paul u ong ba ngam ju bhoh ia u briew.
GALATIA 1:3
Namar hato mynta nga bhoh ïa ki briew, ne ïa U Blei? lane nga wad ïa ka ban pynsngewbha ïa ki briew? lada nga dang pynsngewbha ïa ki briew, ngam shym long u shakri U Khrist.
1 THESSALONI 2:4
Hynrei, kumba U Blei u la ibit ban aiti ha ngi ïa kata ka gospel, kumta, ngi ïalap keiñ; ym kum kiba pynsngewbha ïa ki briew, hynrei, ïa U Blei uba tynjuh ïit ïa ki dohnud jong ngi.
To ngin long ki shakri babha jong U Khrist ban kren bad ïalap ia ka jingshisha la haba dei por ne bymdei por de.
Ka jingkyntu ka long ruh ia ki bangeit, to ngin sumar ialade ioh ba kumno re kumno ngi don ia kita ki shkor ba dait ha kaba ngi ialeh ban wad tang ia kita ki jinghikai ban pynhun ia ka jingkwah jong ngi, ym ia ka jinghikai ba janai bad bashisha jong ka Ktien U Blei.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | July 6, 2021
Comments
Post a Comment