Ka jingman khriat noh jong ka jinglong mynsiem ka dei kaba la ju jia ha ki bangeit naduh ki por ba mynshuwa. Na kata ka daw ka Ktien jong U Blei ka hikai ia ngi kumno ba ngin sumar ia la ka jong ka jingim ba ngin lait na kata ka jingman khriat noh jong ka jinglong mynsiem.
Ngin ia peit mynta ia ki katto katne ki daw kiba pynlong ia ki bangeit ban man khriat noh. Da kaba ngin ia peit ia kane kan iarap ia ngi ba ngin nang ban kiar na kine kiei kiei ki ban ialam sha ka jingman khriat noh jong ka jinglong mynsiem.
1. Ka jingsngew dap kyrhai.
Teng teng haba ka jingdap kyrhai jong kiei kiei baroh ka don bad ba kiei kiei baroh ha ka jingim ki jingiaid beit iaid ryntih, lada ngim sumar bha ka lah ban ialam sha ka jingman khriat noh jong ka jinglong mynsiem. Ka Balang ha Laodikaia ka dei kawei na ki Balang ba U Jisu u maham ha ka kitab Jingpynpaw. Ka dei ka Balang kaba shu plem plem, shit ruh em, khriat ruh em ong ka Ktien U Blei.
JINGPYNPAW 3:15-16
“Nga ithuh keiñ ïa ki jingleh jong pha, ba pham long kaba khriat lymne kaba shit: A nga da kwah dik dik ba phan da long kaba khriat lane kaba shit! Kumta, naba pha long kaba shu syaid, khriat ruh em, shit ruh em, ngan sa prie noh ïa pha na ka shyntur jong nga.
U Jisu u ong ia kane ka Balang ba lada kam kylla bamut bad lada kan iai long ha kata ka rukom, yn sa prie noh ia ka. Kane ka pyni ba U Blei um lah ban shah ia ka jinglong plem plem lane ka jinglong Khristan kaba shu pjah, U kwah ban iohi ba ka jingim Khristan, ka jingshakri Blei kan long kaba pluh ba rhem.
Kaei kaba pynlong ia kane ka Balang ban shu long plem plem, shit ruh em, khriat ruh em, ka dei ka jingsarong namar kata ka jingdap kyrhai jong kiei kiei baroh.
JINGPYNPAW 3:17
Naba pha ong, “Nga kaba riewbha, bad nga la pynman spah, te ngam don ka jingkyrduh ei ei ruh em,” bad pham tip ba ma pha hi pha long kata kaba lanot khop, bad kaba jynjar sat, bad ka baduk, bad ka bamatlah, bad ka balyngkhuit.
Kane ka Balang Laodikaia ka ong, Nga kaba riewbha, ba dap ba biang, ngam kyrduh eiei ruh em. Ka don kata ka jingsarong ba ka dap ka biang, namar ba ka don ia kata ka jinglong bad ka jingsngew jong ka, kumta ka la pynlong ia ka, ka Balang kaba shu plem plem, shit ruh em, khriat ruh em. Bad na ka jinglong plem plem, kan ialam sha ka jingman khriat syndon, bad na ka jingman khriat, sha ka jingshah prie noh ha U Trai. Kane ka jinglong lada kan ioh rung ha ki bangeit ruh, suki suki kan pynlong ia ki ba kin sa man khriat noh ka jinglong mynsiem jong ki. Ngi hap ban sumar ba kane ka mynsiem kan ym iohrung ha ngi.
Nga lah iohi bun ki sakhi na kiba bun ki briew, kiba mynshuwa ki long kiba shitrhem, kiba mih shakhmat ha ka kam U Trai, hynrei ynda haba ki la kham sngewdap sngewbiang, ki sdang sa ban sngewsarong noh, bad na kata ka jingsarong ki sdang sa ban leh jngai na ka jingshakri ia U Trai bad na ka jingiasyllok para bangeit bad kumta suki suki ki sdang ban man khriat noh.
To ngin ioh ia ka jinghikai ba watla ngi dap ngi biang katno katno ruh to ngin ym sngew sarong, namar dei U Blei u ba kyrkhu ia ngi. To ngin ioh ia ka dohnud kaba kum ka dohnud jong u David kaba nang ban kyrkhu ia U Trai ha kiei kiei baroh ba ngi don, bad ban ym klet satia ia ka jinglehbha jong U.
SALM 103:2
Ko mynsiem jong nga, to kyrkhu ïa U Trai, bad wat klet ïa ki jinglehbha jong u baroh.
2. Ka jingiathut.
Ka jingiathut ia mong, khamtam ka jingiathut para bangeit, lane teng teng bad ki nongialam ruh, ka pynlong ia ka jingman khriat noh jong ka jinglong mynsiem. Ïa kane ruh nga lah ju iohi ba ka ju jia ha kiba bun. Namar ba ngi thut ia uto ne kato ka para bangeit kumta ngim treh shuh ban leit jingiaseng lang, lane teng teng namar ka jingiathut bad ki nongialam kumta ngi kiar noh na ka jingshakri, bad kane suki suki ka pynlong ban man khriat noh ka jinglong mynsiem.
U Jisu u iathuh ia kane ba ha ki sngi ba khadduh shibun kin iathut bad kin ia die paralok. Hynrei ngim dei pat ban long ma ngi ki nongpyndep jingthoh.
MATHAÏOS 24:10, 12
Ynda kumta te, shibun kin ïathut, bad kin ïadie paralok, bad kin ïashun paralok. Te namar ba ka pop kan man bun, ka jingieit kiba bun kan man khriat.
Na ka jingiathut, ka poi sha ka jingiadie paralok (ka jingbym shaniah iwei ia iwei pat), bad na ka jingiadie paralok ka poi sha ka jingman khriat. Namar kata, ngi dei ban husiar bad ban ialeh katba lah ban ym don ka jingiathut ia mong para bangeit, lane bad ki nongialam. Ka donkam baroh arliang ban iaibat (maintain) ia kane. Ngim lah ban kynnoh shiliang shiliang, hynrei baroh arliang ngi hap ban maintain lang. Namar haba ngi peit na ka Bible ngi iohi ba lada ngi thut ruh ym long bad lada ngi pynthut ruh ym long.
MATHAÏOS 18:6
“Uno uno ruh u ban pynthut te ïa iwei na kine ki barit kiba ngeit ha nga, ka la kham bha ïa u ba yn teh ïa u mawtylliat bakhraw ha ka ryndang jong u, bad ba yn pynngam jyllop ïa u ha kaba jylliew ka duriaw."
Kumta ngi hap ban sumar bha ia la ka jong ka jingim ioh ba kumno re kumno ngin man khriat noh ha ka jinglong mynsiem da kaba ngi sngewthut iano iano, bad ruh ngi dei ban sumar ban ym long ka daw ka jingjynthut ia kiwei pat.
U Apostol Paul u ong, Ha kane, nga hi ruh nga pynmlien ïa lade, ban ïoh khlem da pud ka jingïatiplem ba khlem pynthut sha U Blei bad sha ki briew. KI KAM 24:16
Ngi ruh katba lah ngi hap ban wad ia kata ka jingiatiplem kaba khlem pynthut ia U Blei lane ia u briew ruh, khnang ba ngin ym long ka daw jong ka jingman khriat noh ka jinglong mynsiem jong ki para bangeit, bad ialade ruh kumjuh.
Ka dak jong ka jingman khriat.
Ka duh noh ia ka jingieit ba nyngkong ba la thoh ha ka kitab JINGPYNPAW 2:4. Ha kawei pat ka kyntien lah ban ong ka dei kata ka jingduh noh ia ka jingshitrhem ban shakri ia U Trai bad ban leh eiei na ka bynta U Trai. Bad haba kata ka la duh, ka jingim ka lah don ha u dak jingma.
Kumta to ngin sumar ban ym ai jaka ia ka jingman khriat noh jong ka jinglong mynsiem jong ngi da kaba ngin sngew dap sngew biang haduh ba ngin klet noh ia U Blei bad ka jingbha jong U. Bad to ngin sumar ban ym iathut ia mong para bangeit lane ban long ka daw ka jingjynthut iano iano. Katba lah to ngin ia shong suk ong ka Ktien jong U Blei.
ROM 12:17-18
Wat leh markylliang hano hano ruh ïa ka basniew namar ka basniew; to pyrkhat lypa ïa kiei kiei ruh ki babha tynnad ha khmat ki briew baroh; lada long kaba lah, katba shong kata ha phi to long kiba ïashong suk noh bad ki briew baroh.
U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyrights © Jester Mawlong July 21, 2021
Praise The Lord! Amen!
ReplyDeletePraise the Lord 🤝
Delete