Nga buh ia kane ka kyrteng jong ka khubor ha kane ka rukom ba kan long particular, pynban ngam exclude ialade ruh, kata, "Lada phim pynkylla dur, phin duh ia ka jingpynkylla dur". Lehse don napdeng jong phi kiba pyrkhat, ka mut aiu? Ngin sa ia peit na ka Ktien U Blei bad ngin sa iohi kaei kata ka jingmut.
Ban sngewthuh ia kane ngin ia peit ia ki artylli ki jingpynkylla dur ba la kren ha ka Bible.
1. Ka jingpynkylla dur jong u briew.
Ka Ktien jong U Blei ka khot bad iai khot ia ngi ki bangeit sha ka jingim ba la pynkylla dur, ka jingim bym pyniasyriem ryngkat ia lade bad kane ka pyrthei.
ROM 12:1-2
Namar kata, nga kyrpad ïa phi, ko parabangeit, na kita ki jingisynei ki jong U Blei, ban aiti noh ïa ki met jong phi kum ka jingkñia ba-im, bakhuid, bad ba pynsngewbha eh ïa U Blei, kaba long keiñ ka jingshakri bakynja mynsiem jong phi. Bad to wat pynsyriem ryngkat ïa lade bad kane ka pyrthei; hynrei, to pynkylla dur noh ïa lade keiñ da ka jingpynthymmai ïa ka jingmut jong phi, khnang ba phin ïoh tip kaba kumno ka long ka mon ka jong U Blei, ka babha, bad kaba pynsngewbha eh, bad ka bajanai de.
Katno ngut na ngi, ngi la ju pyrkhat ia kane, balei la khot bad iai khot ia ngi, la kyntu bad iai kyntu da ki pastor, da ki nongialam ba ngin im ka jingim ba la pynkylla dur bad ka bym pynia-syriem bad ka pyrthei. Lehse don napdeng jong phi kiba la sngew satia ruh namar ba la kyntu shi kyntu ba phi dei ban im ka jingim ba la pynkylla dur, ka jingim bym pynia-syriem bad ka pyrthei? Hynrei nga ong ia phi ba ka dei namar ka jingbha bad ka jingmyntoi jong phi hi. Namar lada jia ba ngim shym la pynkylla dur ialade, khlem artatien ngin sa duh ia ka jingpynkylla dur jong U Trai, bad lada ngi duh ia ka jingpynkylla dur jong U Trai, kan long ka jingsngewsih bad jingbabe junom. Ngin sa nang ia peit kaba kumno kata ka jingpynkylla dur jong U Blei kaba ngim dei ban duh.
2. Ka jingpynkylla dur jong U Blei.
1 KORINTH 15:51-53
Ha khmih, nga ïathuh ha phi ïa ka jingmaïan: ngin ym ïohthiah (iap) baroh, hynrei, yn pynkylla ïa ngi baroh shisyndon, ha kaba shi khyllipmat keiñ, ha ka turoi ka bakhatduh. Namar ka turoi kan sawa, ynda kumta, ïa ki baïap yn pynmih pat ki bympyut, bad ïa ngi yn pynkylla. Namar ka dei da lei lei ïa kane kaba pyut ban phong ïa ka bympyut, bad ïa kane ka baïap ban phong ïa ka bymïap.
1 THESSALONI 4:15-17
Namar kane, ngi ong ha phi da ka ktien U Trai, ba ma ngi kiba dang im, ïa kiba la pynsah haduh kata ka jingwan U Trai, da lei lei ngin ym ïoh leit shuwa ïa kita kiba la ïohthiah. Naba U Trai hi un wan hiar na bneng bad ka jingrisa, da ka ktien sawa u angel rangbah, bad da ka turoi U Blei: bad kita kiba ïap ha U Khrist kin ïamihpat shuwa. Ynda kumta, ma ngi kiba dang im, ïa kiba la pynsah, yn rong noh ïa ngi lem bad ki ha ki lyoh, ïa ka ban ïashem ïa U Trai ha ka suiñbneng: te kumta, ngin ïailong junom junom lem bad U Trai.
Ka Bible ka iathuh ia ngi, ba shuwa ba U Blei un pynjot noh ia kane ka pyrthei, un wan ban shaw (rongnoh) shuwa ia ki riewkhuid jong U (Balang) sha kata ka jaka ba u la pynkhreh (IOANNIS 14:2-3) bad ha kata ka jingwan shaw jong u, kiba iap ha U Khrist kin ia mihpat shuwa (kiba iap khlem U Khrist kin ym pat mihpat ha kane ka por), bad ia ngi pat kiba dang im yn sa pynkylla dur ha ka shikhyllipmat, bad yn rongnoh ia ngi ryngkat bad kita ki riewkhuid kiba la mihpat ban iashem bad U Trai ha suiñbneng bad kumta ngin iailong junom junom lem bad U Trai.
Dei hangne nga ong ba kita ki bym shym la pynkylla dur ialade kin duh ia kane ka jingpynkylla dur jong U Blei ia ki riewkhuid, bad lada ngi duh ia kane ka jingpynkylla dur jong U Blei, kaba ap hangta dei sa tang ka jinglynniar bad kum dait bniat, sa tang ka jingbabe, balei ngam shym la pynkylla dur ialade, balei ngam kohnguh ia ka jinghikai ka Ktien U Blei, balei ngam shym la kohnguh ia ki pastor, ki nongialam kiba la hikai ia nga ban im ka jingim ba la pynkylla dur bad bym pynia-syriem ialade bad kane ka pyrthei? Balei? Sa tang ka balei?
Kumta katba ka por ka dang don, to ngin ialeh tyngeh ban im ka jingim ba la pynkylla dur ialade bad ban im ka jingim ka bym pynia-syriem bad ka rukom im jong kane ka pyrthei, la ka long ha ka kren ka khana, ka bam ka dih, ka iaid ka ieng bad ki jingleh jong ngi, to ngin iaid bad ngin im kum ki khun ka jingshai khnang ba haba U Trai un wan ban pynkylla dur ia kita ki bangeit kiba la pynkylla dur ialade, yn shem ia ngi ruh kiba bitnam ban ia her ryngkat bad u sha kata ka ri ba U Trai u la kular kaba long ka Bneng, kaba hangta yn ym don jingpang jingshitom, jingkhuslai jingsngewsih shuh, hynrei tang ka jingsuk bad ka jingkmen junom la junom.
U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong July 23, 2021
Amen
ReplyDeletePraise the Lord 🤝
Delete