Ka jingkwah burom

Ka jingkwah burom, ka jingkwah iaroh ka long ka jingijli bad kaba U Blei um sngewtynnad bad um lah ban shah slem. 

Ngi pule ha ka kitab u Isaïah, ngi iohi shaphang u syiem jong ka Babylon (uba long ruh ka dur jong u Soitan), kumno namar kata ka jingsarong bad ka jingkwah burom U Blei u la pynhiar noh ia u na kata ka burom ba u don. 

ISAÏAH 14:12‭-‬15 “Kumno me la hap na bneng, ko 'lurshai, u khun jong ka step! Kumno la ot noh ïa me sha ka khyndew, uba la ju pyndem lin ïa ki jaid bynriew!  Te me la ong ha la ka dohnud, ‘Ngan kiew sha bneng, ngan kyntiew ïa la ka khet haneng ki khlur jong U Blei; bad ngan shong halor u lum ka jingïaseng, ha ki bakut phang shatei :  ngan kiew sha lyndet ki lyoh; ngan long kum U Bahajrong Tam.’  Pynban, yn sa pynhiar ïa me sha dujok, shaduh trai jong ka 'liewlong.

Kane ka dei kaba la jia ia u syiem Babylon, ka jingsarong, ka jingkwah burom ka la rung haduh ba u la kwah ban shim noh ia ka jaka jong U Blei, pynban U Blei u la shop noh ia u, la pynhiar noh ia u na kata ka burom ba u don. Ka jingkwah burom kam pynkyntiew ia u briew, hynrei ka pynhiar pynban. Kynmaw ba ym dei tang ia u syiem Babylon, hynrei lada ngi ruh ngi kwah burom, ngi shim noh ia ka jaka jong U Blei, bad haba ngi shim noh ia ka jaka jong U Blei, un sa shop ia ngi ruh lada ngim kylla ka bamut. Ka burom hi ka dei ka jong U Trai, dei tang ma U, uba dei ban ioh lut ka burom. U Blei u kren shai da kaba u ong, "Nga long U Trai; kata ka long ka kyrteng jong nga: te ia la ka burom ngan ym ai ha uwei pat, lymne ia la ka jingiaroh ha ki bleithaw." - ISAÏAH 42:8. 

U Blei un nym shah ba ia ka burom jong U yn ai sha uno uno u briew lane u bleithaw. Kynmaw kano kano kaba ngi leh, lada ngi shim burom noh sha lade, U Trai um sngewtynnad. Wat lada ngim kren da ka shyntur, hynrei lada ngi don ka jingmut (motive) kwah burom U Blei um sngewtynnad.

U Jisu bunsien u sneng tyngeh (rebuke) ia ki Pharisi namar ba ki long ki briew kiba kwah burom. Kaei kaba ki leh, ki leh ba ki briew kin iaroh ia ki. Lada ki ai, lada ki duwai bad lada ki leh kano kano ruh, ki leh ba kin ioh iaroh. (MATHAÏOS 23:29-36). Hynrei U Jisu u hikai ba ngim dei ban long kum ma ki. U hikai bunsien ia ka jingsngewrit hynrei ia ka jingsarong, ka jingkwah burom u ai '0' (zero).

Ha u MATHAÏOS 23:2-3; 5-6 u ong, “Ki nongthoh bad ki Pharisi ki shong ha ka jingshong u Moses: namar kata, ïa kiei kiei baroh katba kin ong ha phi ban sumar, to phin sumar, bad leh ruh; hynrei, katba kum ki jingleh jong ki, phi wat leh; naba ki ong, te kim leh hi. Hynrei, ïa ki jingleh jong ki baroh, ki leh khnang ïa ka ban ïohi da ki briew: namar ki pynpyiar ïa la ki philakteri, bad ki pynkhraw ïa ki rmiang ki jaiñ jong ki, ki ieit ruh ïa ki jaka ba-donnam tam ha ki jingkhawai, bad ïa ki jingshong bakor tam ha ki synagog. Kata ka dei ka jinglong jong ki Pharisi bad ki nongthoh. 

U Soitan barobor un ialeh ban bsuh ha ki briew ia kane ka mynsiem kwah burom, ka mynsiem kaba kwah ba ki briew kin iaroh ia ki. U la pynshoi ia ka Im ha kper Eden u ong ba lada phan bam na uta u dieng uba hapdeng ka kper, phan sa long kum ki blei. Kumta ka Im haba ka la iohsngew kat kata ka burom, ka la shim bad ka la bam. Hynrei haba ka la bam ka long pynban da khongpong (ka kjat sha jrong, ka khlieh sha khyndew). GENESIS 3:4-7

Da ka juh ka buit (method) u la leit sha U Jisu halor jong uta u lum ba U Jisu u don hadien ba u la shah jingit sawphew miet bad sawphew sngi, bad ha baroh lai tylli ki rukom pynshoi jong u, ki phalang beit sha ka jingkwah burom. (MATHAÏOS 4:1-11) bad da kane ka juh ka method u dang iai pyndonkam haduh kine ki sngi. Hynrei sngewsih ban ong ba wat la katne ngi iohi na ka Ktien jong U Blei, pynban kiba bun ki dang liat, dang ngop hi ha kane ka jingkwah burom. Lada ngin peit naduh ki Nongsynshar pyrthei, ki NGO's, bad wat ha ki Balang kumjuh, kane ka jingkwah burom ka jur bha. Ka jingkwah burom lade, ka jingkwah burom na ka bynta ka ïing ka sem, ki khun ki kti, bad kumta ter ter. Bad kaba sngewsih shuh shuh ka long ba kane ka jingkwah burom barabor ka wanrah ia ka jingiathut ka jingiamong, ia sngewsih para briew ruh. Uwei tang ban ioh burom ialade, um pyrkhat shuh ia utai uwei pat la un sngew kumno ne un long kumno. Ngi donkam ban kylla bamut na kaba kum kane ka jinglong lada ka don ha ngi. Ai ba U Mynsiem jong U Blei un pynsngewthuh ia ngi lada ka don kaba kum kane ka jingkwah burom. Bad ai ba U Blei un hikai ia ngi na ka Ktien jong U Blei haba ngi pule ia ka bad ai ba ngi ruh ngin long kiba shah hikai, khnang ba ngin lait na kaba kum kane ka pop kwah burom.

Khyndiat ngan iathuh shaphang ialade. Nga ruh kum u khynnah samla, ha ka por ba nga dang sdang ban ngeit bad pdiang ia U Trai, bad haba nga leh ia kano kano ha ka Balang nga kwah ba ki briew kin iohi ia nga ba nga leh kumta bad ba kin ong 'ishhh', bad kin iaroh ia nga. Kata ka dei ka jinglong kum u khynnah ha ka met, mynsiem, jingmut jingpyrkhat, hynrei katba nga nang pule ia ka Ktien jong U Blei, U Blei u hikai ia nga na ka por sha ka por. Nga pule ia ka Proberb, ka Ktien jong U Blei ka ong ia nga, Ai ba uwei pat un ïaroh ïa me, te ym ka shyntur jong me hi; u nongwei, te ym ki rmiang shyntur jong me hi. PROBERB 27:2. Nga pule ia ka Philipi ka Ktien jong U Blei ka ong, da ñiew phi ïa ki paralok kiba kham bha ban ïa lade. PHILIPPI 2:3 Kumta suki suki nga nang sngewthuh bad nga sdang ban jop ia kane ka mynsiem kwah burom, kwah ba ki briew kin iaroh. Nga ngeit U Blei un iarap ia phi ruh ba phi lah ban sngewthuh bad ban lah ban im kumba u Jisu u hikai. MATHAÏOS 5:16. 

Ai ba baroh kaba ngi leh, ngin leh ba U Trai un ioh burom, ym ma ngi. 

U Blei un kyrkhu ia phi. Amen

© Jester Mawlong | July 7, 2021