Ka jingñiew shiliang khmat

Ka jingñiew shiliang khmat ka dei kata kaba ngi leh (treat) ia ki briew da kaba peit ia kaei kaei kaba shabar (physical appearance etc). Ka dei kata kaba ngi leh bha ia uwei, leh sniew ia uwei pat, kyntiew ïa uba mon, pynhiar ïa u bym mon. Kata ka dei ka jingbatai lyngkot ha kaba iadei bad ka jingñiew shiliang khmat. 

Shuh shuh ki briew kiba don ka jingñiew shiliang khmat, ki iohi ia kaba ki kwah ban iohi, ki matlah ia kaba ki kwah ban matlah. Ka long thik kum ka jingbamsap, ka pynmatlah ia u briew u ba don ia kata ka mynsiem.  

To ngin ia peit mynta katto katne ia kane ka bynta.

Ka jingñiew shiliang ka long ka subject kaba ym ju kham kren da kiba bun, ngam tip balei. Naduh ba nga kylla bamut haduh mynta ngam da kham iohsngew ba ki briew kin kren ne hikai shaphang ka jingñiew shiliang khmat, dei na kata ka daw kane ka jingñiew shiliang khmat ka iai trei ha kiba bun ki briew, lada ngin peit naduh ki Nongsynshar pyrthei, ki officer bapher bapher haduh ki bangeit bad wat ha ki nongialam Balang kane ka jingñiew shiliang khmat ka trei. Kata ka rukom leh (treat) hapdeng uba riewspah (rich) bad uba duk (poor), uba stad (educated) bad uba bieit (illiterate) ka iapher bha. Hynrei la shu ia leh klet, leh sting da kaba pyrkhat ba ka dei tang kaei kaei ka bym da donkam eh. Ha ka jingshisha ka long ka subject kaba dei eh ban hikai, namar ba ka jingñiew shiliang khmat ka long ka pop ong ka Ktien jong U Blei.

Bunsien ngi pyrkhat ba ka pop ka dei tang kata kaba klim, tuh, pyniap, bad kaba leh ia kiwei kiwei ki kam sniew, hynrei ngi klet ba ka jingñiew shiliang khmat ruh ka long kawei na ka pop ba u briew u hap ban kylla ka bamut lada ka don kum kata.

JAKOB 2:9 "...hynrei, lada phi ñiew shiliang khmat, phi leh pop keiñ, ba la pynrem ïa phi da kane ka hukum kum ki nongpalat."

Ha ka por jong u Jakob ruh kane ka jingñiew shiliang khmat ka don, wat ha ki para bangeit lane ha jingiaseng ruh. Kumta ka la pynkhih ia u Jakob ban thoh shaphang kane ka jingñiew shiliang khmat, bad kane ka jingthoh jong u Jakob kam dei satia ka jingkyntu ne jingkyrpad, hynrei ka dei ka adong. Kaba mut ba ym bit ban leh shiliang khmat bad lada ngi leh shiliang khmat ka mut ngi long kita ki nongpynkhein hukum lane ki nongpalat.

JAKOB 2:1‭-‬13

Ko parabangeit jong nga, wat bat da ki jingleh ñiew shiliang khmat ïa ka jingngeit U Jisu Khrist U Trai jong ngi, uba U Trai ka burom. Namar lada wan rung shapoh ka jingïaseng jong phi u briew uba deng ka sa'ti ksiar, ha ka jaiñkup babha, bad lada wan rung u baduk ha ki jaiñkup basyrdep jot; bad lada phi khmih burom ha uta uba kup ïa kita ki jaiñkup ki babha, bad phi ong ha u, “Ma me to shong hangne ha ka jaka ka babha”; hynrei, phi ong ha uta u baduk, “To ïeng ma me hangtai, lane to shong hapoh kane ka jingïuh kjat jong nga”: hato kumta phim bishar shiliang ha lade hi, bad phi la jia long ki nongbishar ba don ki jingpyrkhat basniew? To da sngew phi, ko parabangeit ba-ieit jong nga: Hato U Blei um ju la jied ïa kita ki baduk jong kane ka pyrthei, ban long ki bariewspah ha ka jingngeit, bad ki nongïoh pateng ïa kata ka hima, ïa kaba u la kular ha kita kiba ieit ïa u? Hynrei, ma phi pleng phi la ñiewbeiñ ïa uta u baduk. Hato kita ki bariewspah kim ban shitom ïa phi, bad kim ring ma ki hi ïa phi sha khmat ki khet bishar? Hato kine kim krenbeiñ sat ïa kata ka kyrteng ba-donburom da kaba la khot ïa phi? Hynrei, lada phi pyndep ïa ka hukum bakynja syiem, katba kum ka jingthoh, “Men ieit ïa u paramarjan jong me kumba ïa lade”, phi leh bha keiñ: hynrei, lada phi ñiew shiliang khmat, phi leh pop keiñ, ba la pynrem ïa phi da kane ka hukum kum ki nongpalat. Namar jar u ban sumar biang ïa ka hukum baroh kawei, hynrei, un jynthut tang ha iwei, u la jia long uba rem noh na ki baroh. Namar uta uba la ong, “Wat klim”, u la ong ruh, “Wat pynïap”. Te lada men ym klim, pynban, men pynïap, me la jia long keiñ u nongpalat ïa ka hukum. Kumta, to kren phi, bad kumta, to leh phi, kum ïa ki ban sa bishar da ka hukum ka jingpyllaitluid. Namar ka jingpynrem ba khlem leh isynei kan long ha uta u bym ju la leh isynei; hynrei, ka jingisynei ka leh risa halor ka jingbishar.

Kane ka long kaei ba u Jakob u thoh shaphang kata ka jingñiew shiliang khmat. Ngi iohi u da pynrem ia kata ka jingñiew shiliang khmat hapdeng ki bangeit. Ha ka dkhot ba shiphew u ong ba ngi lah ban sumar ia ki hukum baroh hynrei lada ngi jynthut noh ha ka jingñiew shiliang khmat kata ka mut ngi lah rem noh baroh. Ha kawei pat ka kyntien lah ban ong ba ym don jingmyntoi eiei kata ka jingleh hok, ka jingsumar jong ngi ia ki hukum U Blei lada ngi dang don kata ka jingñiew shiliang khmat.

JAKOB 2:10

Namar jar u ban sumar biang ïa ka hukum baroh kawei, hynrei, un jynthut tang ha iwei, u la jia long uba rem noh na ki baroh. 

Kumta khnang ba ngin ym rem noh, to ngin kiar na ka jingñiew shiliang khmat, la ia u ba bieit ne ba stad, ba don kyrdan ne bymdon kyrdan, la ia uba duk ne uba riewspah, ngin ñiew (treat) kumjuh, namar ngi shakri ia U Blei u bymjuñiew shiliang khmat.

U Blei u sngewsih ban iohi ba ngi leh shiliang khmat iano iano. Nga duwai ba U Blei un ai ka jingaiei ba ngi lah ban sumar ba ngin ym niew shiliang khmat iano iano.

U Blei un kyrkhu. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Copyright © Jester Mawlong | July 11, 2021