Balei phi shah ialade ha ki niam ki rukom?

Intro: Ki niam ki rukom ki dei kata ka jingpynmlien kaba khlain haduh katta katta, ka long kaba shitom ban pyndkut ia ki wat haba ngi lah tip ba ym dei ban dang leh ruh. Kane ka jia ha ki Balang bapher bapher. U Paul u la hap ban thoh bad ban iai kyntu ia ki bangeit ba kim dei ban dang shah riam pat ha kita ki niam ki rukom. 

KOLOSSAI 2:20‭-‬23

²⁰Lada phi la ïap noh lem bad U Khrist na kita ki jinghikai jong ka pyrthei, balei, la kumba im ha ka pyrthei, phi shah ïa lade ha ki niam ki rukom, ²¹(“Wat ktah; wat mad; wat tba”; ²²kiba kum kita, kin jot noh ha kaba pyndonkam), katba kum ki adong bad ki jinghikai ki briew? ²³Kiba kum kita, ki don shisha ka jingthawnang stad ha kaba mane katba mon, bad ha ka jingsngewrit, bad ha kaba pynshitom ïa ka met; hynrei, kim long ei ei ha kaba ïaleh ïa ka jingpynsngewbha ka doh.

U Paul kum uwei na kita ki riewniam, uba ju bat pyrkhing bha ia ki niam ki rukom jong ka niam Jiw bad ki hukum, u ba long u Pharisi na ki Pharisi, u Hebru na ki Hebru, hynrei hadien ba u la iashem bad U Trai ha kata ka lynti sha Damoskos, u la  sngewthuh ba kita ki niam ki rukom baroh kim lah satia ban pynim ia u. Kumta ha ka jingshakri jong u ia ki bangeit u la ju hikai ia ki kumno ba ki dei ban ngeit ha U Jisu na ka bynta ban ioh ia ka jingpynim, hynrei don pat kiwei kiba ïalap bad hikai ban ong ba watla ngi lah ngeit ia U Jisu ruh ngi dang dei ban sumar ia kita ki hukum, ki niam ki rukom bad ki jinghikai pateng la pateng, kita ki wat ktah, wat mad, wat tba. Kumta haba u iohi ba ki bangeit ha Kolossai ki la sdang ban leh biang ia kita ki niam ki rukom, u la hap ban thoh bad ban pynkynmaw biang ia ki da kaba ong, Balei phi shah ialade ha ki niam ki rukom? 

Ha ka dkhot ba 20 u ong Lada phi la ïap noh lem bad U Khrist na kita ki jinghikai jong ka pyrthei, balei, la kumba im ha ka pyrthei, phi shah ïa lade ha ki niam ki rukom? Ka jingmut hangne ka long ba ia ki jinghikai ka pyrthei phi lah iap mynba phi lah ngeit ha U Khrist, balei pat phim lah ban iap ia kita ki niam ki rukom? Ha kawei pat ka rukom ka long, haba ia ka pyrthei phi lah iap lem bad U Khrist, kan eh aiu ba phin iap ia ki niam ki rukom? 

Kane ka long ruh ka jinghikai ia ngi ha kine ki sngi, bun na ngi ngi lah iap ia ka pyrthei, hynrei ngim lah pat ban iap ia ki niam ki rukom. Ngi dang shah hi ha kita ki niam ki rukom, wat ktah, wat mad, wat tba, hynrei u Paul u ong ba ngi dei ban iap noh ia kine baroh.

Ha kawei pat ka liang kane ka kyntien, Wat ktah; Wat mad; Wat tba ka ai ruh ha ngi ia ka jinghikai ba ngim dei ban dang ktah, ban dang mad bad ban dang tba ia kita ki niam ki rukom. Haba ong, wat ktah, ka mut ym long ban ktah wat tang khyndiat ruh, bad haba ong, wat mad, ka mut ym long ban mad wat tang khyndiat ruh, nangta haba ong, wat tba, ka mut ym long ban tba wat tang khyndiat ruh. Hap ban iap lut.

U Paul da kata ka jingialam U Mynsiem Bakhuid, um kwah ba ki bangeit kiba la pdiang ia U Trai kin dang shah teh ha kita ki niam ki rukom bad ki hukum ba kynja briew.

Ha ka shithi sha ki Galatia u ong, Ïa ka jinglaitluid U Khrist u la pyllait ïa ngi: namar kata, to ïeng skhem, bad wat ai ba yn riam ïa phi pat ha ka lyngkor ka jinglongmraw. GALATIA 5:1 KHB. Kaei kane ka jinglongmraw, kane ruh kam dei kata ka jinglongmraw ha ka pop, hynrei kadei ka jinglongmraw ha ka hukum, ki niam ki rukom. U Paul u ong ba U Khrist u la pyllaitluid ia ngi na ka jingtim jong ka hukum, kumta u ong ba ngim dei ban shah riam pat.

Shuh shuh ha ka KOLOSAI 2:6-7 u ong, Namar kata, kumba phi la pdiang ïa U Khrist Jisu uba U Trai, kumta, to ïaid ha u; ba la pynsuh thied ïa phi bad ba la ïaitei ïa phi ha u, bad ba la pynneh skhem ïa phi ha ka jingngeit, kumba la hikai ïa phi keiñ, phi da roi kyrhai ha ka, da ka jingainguh.

Ngi lah pdiang ia U Khrist uba U Trai, ka dei ia ngi ban iaid ha U, ym ha ki hukum, ki niam ki rukom briew pateng la pateng.

Bad ha ka dkhot ba 8 bad 9 u ong, To sumar phi, ïoh ban don uno uno uba rong lute ïa phi da la ka jingstad pyrthei bad da ka jingshukor bathala, katba kum ka rukom pateng jong ki briew, katba kum ki jinghikai jong ka pyrthei, te ym katba kum U Khrist. 

Ngi donkam ban sumar ba ngin ym shah shukor ha uno uno ong u Paul. Bad ha ka dkhot ba 9 u ong, Naba ha u, kata ka jingdap baroh jong ka Jinglong Blei ka shong tylli. Ym ha kita ki niam ki rukom briew, hynrei ha U Khrist ka shongtylli ka jinglong Blei. Shuh shuh ha ka dkhot ba 14 & 15 u ong, haba la lah pyndam noh ïa ka kot jingkular ba la thoh ha ki niam ki rukom kaba la ïaleh pyrshah ïa ngi, kaba la long pyrshah ïa ngi, bad u la weng noh ruh ïa ka, u da sahnar ïa ka ha ka diengphna; bad haba u la lah law noh na lade ïa ki jingsynshar bad ïa ki bor, u la thad rong ïa ki ha kaba paw, u da risa halor jong ki ha ka.

Da ka jingiap jong U Jisu halor ka diengphna, la pyndam noh ia kita ki hukum bad ki niam ki rukom briew pateng la pateng, u da thadrong ia ki ha kaba paw bad u da risa halor jong ka, ong ka Ktien U Blei. 

Ha ka dkhot 16-17 u ong, Namar kata, wat ai ba uno uno ruh un bishar ïa phi ha kaba bam lane kaba dih, lane shaphang ka sngi jingkhawai, lane u 'nai thymmai, lane ka sngi Sabbaton; kiba long ka syrngiew ïa kiei kiei ki ban sa wan; hynrei, ka met ka long ka jong U Khrist.

Kine baroh ki adong adit, ki rukom briew pateng la pateng la pynkut ha ka diengphna. Kita ki baroh ki long tang ka syrngiew ong ka Ktien jong U Blei, hynrei ka met bashisha long U Khrist. Kumta u Paul u ong ba ia kita baroh ym long shuh ban dang ktah, ban dang mad bad ban dang tba, kumta kumba ngi la pdiang ia U Khrist, to ngin iaid ha ka hukum bathymmai jong U Khrist, ba la thoh ym shuh ha kita ki kot niam kot rukom briew, hynrei hapoh ka dohnud jong ngi.

U Blei un kyrkhu. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Copyright © Jester Mawlong | July 11, 2021