Kane ka kyntien ka dei kaba la kren da u Apostol Paul ha ka shithi sha ki Philippi 4:13, bad ka dkhot ka dei ruh dkhot Bible kaba ki briew ki ju sngewtynnad, bad la ju iohi ba la ju print ha ki walltext, key chains, T shirt bad kiwei bad ba ki briew ki ju sngewtynnad ban wah ha ki ïing ki sem bad kumta ter ter. Ka long ka kyntien kaba sngewtynnad shisha. Hynrei katno ngut ngi la ju pyrkhat, kaei ka jingmut ba u Paul u ong ia kine ki ktien? Bunsien ngi pyrkhat ba kane ka kyntien ka dei kata ka jinglah ban leh ia kiei kiei kiba khraw, ki kambah, ki jingphylla bad kiwei, hynrei kaei ba u Paul u ong kam dei satia shaphang kata, wat la ka long ba ia kiei kiei ngi lah ban leh dei da ka jingpynshaitbor jong U Blei. Hynrei ha kaba iadei bad kane ka dkhot kam da thew eh shata. Ban sngewthuh kham bha, to ngin ia peit na ka jingim jong u Paul.
U Apostol Paul u dei u briew uba nang ba stad, ba bit ba biang lehse nga lah ban ong, hynrei haba u la wan sha ka jingngeit ia U Jisu Khrist, u la mad ia shibun ki jingeh jingtynjuh, ki jingduk jingthngan, ki jingshah kren beiñ, jingshah leh-beiñ, ki shah sympat bad ki jingshah set byndi bad kiwei kiwei. Hynrei ha kine kiei kiei baroh u la lah ban iaid lyngba.
Ha ka dkhot ba 12 u ong, Nga tip kumno ban pynpoh, bad nga tip kumno ban sngewdap kyrhai: ha kaei kaei bad ha kiei kiei baroh nga la nang ïa kata ka buit ban sngewkdang ruh bad ban sngewthngan, ban sngewdap bad ban sngewkyrduh.
U pyni ba u lah ban leh ia kitei kiei kiei baroh ym dei satia da ka bor jong u, hynrei da ka jingpynshaitbor jong U Trai. Lymda dei da ka jingpynshaitbor jong U Trai ka long kaba eh ban pynpoh ialade, lymda dei ka jingpynshaitbor jong U Trai ka long kaba eh ban sngewdap kyrhai wat haba ngi kyrduh, ka long kaba eh shisha, khamtam kum uta u briew ba dap ba biang. Pynban da ka jingpynshaitbor jong U Trai, u la lah ban leh ia kine kiei kiei baroh. Kumta ha ka shithi sha ki PHILIPI 4:13 u phla bad u ong, Nga lah ban leh ia kiei kiei baroh ha uta uba pynshaitbor ia nga.
Shuh shuh ha ka shithi ba 2 KORINTH 11:24-27 u iathuh shaphang ka jingshah jong u, u ong, Na ki Jiw, san sien nga la ïoh sawphew nawei thri. Lai sien la shoh ïa nga da ki dieng sympat, shi sien la lynthem maw ïa nga, lai sien nga la shah paitlieng, shi miet shi sngi nga la don ha ka duriaw bajylliew; ha ki jingleit bunsien, ha ki jingma na ki wah, ha ki jingma na ki nonglute, ha ki jingma na la ki para jaid, ha ki jingma na ki Jentil, ha ki jingma ha ka nongbah, ha ki jingma ka khlaw, ha ki jingma ha ka duriaw, ha ki jingma hapdeng ki lok ba-arsap; ha ka jingtrei minot bad ka jingtrei shitom, ha ki jingbymïohthiah bunsien, ha ka jingthngan bad ka jingsliang, ha ki jingshah jingit bunsien, ha ka pjah bad ka jinglyngkhuit.
Kane ka dei ka jingiaid lynti jong u Paul. Pynban katne ka jingiashem jong u, hynrei u la iaineh skhem khlem phaidien. Kumta u kyntu ruh ia ki bangeit ba ki donkam ban shaniah ha ka bor jong U Trai ba ngi lah ban leh bad ban jop ia ki jingeh jingtynjuh ba wan ha ka jingim.
Para bangeit baieit, ha ka jingiaid lynti jong phi kaba man ka sngi kum ki Khristan lehse phi iakynduh ia shibun ki jingeh jingjynjar, ki jingduk jingthngan, ki jingshah kren beiñ shah leh-beiñ bad kumta ter ter. Phi sngew kum ban phaidien noh, hynrei to ieng skhem ha U Trai, ai ba U Trai un pynshaitbor ia phi kumba u la pynshaitbor ia u Paul.
Ha ka kitab u Isaïah ka Ktien U Blei ka ong, U ai ka bor ha kiba sngewlwait; bad ha u bymdonbor u pynroi ka bor. Wat ki samla kin sngewlwait bad kin sngewthait, bad ki rang samla kin kyllon khoit: hynrei, kita kiba ap khmih ïa U Trai kin pynthymmai bor; kin her sha jrong da ki thapniang kum ki pukni; kin mareh, bad kin ym sngewthait; kin ïaid, bad kin ym sngewlwait. ISAÏAH 40:29-31
Ka jingsngewthiat, ka jingsngew lwait ka lah ban wan, hynrei ngi donkam ban iai ap khmih ha U Trai namar na U ka wan ka jingpynshaitbor. Dei haba U Trai u pynshaitbor ngi lah ban leh ia kiei kiei baroh, ngi lah ban iaid bad ngin ym sngewlwait, ngi lah ban mareh bad ngin ym sngewthait, bad ba ngi lah ban her shajrong kum ka pukni haduh ba ngin da iashem bad U Trai ha sahit bneng ha kata ka sngi ba U Trai un wan shaw noh ia ngi.
Nga duwai ba U Blei un nang pynshaitbor ia phi iwei pa iwei, naduh ki Pastor, ki nongsharai bad ki para bangeit baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong July 10, 2021
Amen!
ReplyDeletePraise the Lord 🤝
Delete