Intro: Lada ngin ia kren ia ki jingkhuslai ki don ha ki rukom bapher bapher, ka jingkhuslai jong une ka long da kumwei, ka jingkhuslai jong utai ka long da kumwei pat, ka jingkhuslai jong uba duk ka long da kumwei, ka jingkhuslai jong uba riewspah ka long da kumwei pat, ka jingkhuslai jong ki nongialam ka long da kumwei, ka jingkhuslai jong ki bangeit ka long da kumwei pat. Hynrei haba ngi peit na ka Ktien jong U Blei barobor U Blei u ju ong, 'wat khuslai', la ka long ha kano kano ka rukom jingkhuslai ruh U Blei um ju shah ba ki briew jong U kin khuslai.
Ha kane ka por ngin nym ia kren ia kita kiwei pat ki rukom khuslai ba ki briew ki khuslai, hynrei kaei ba nga kwah ban ia peit mynta ka long halor kata ka jingkhuslai ba U Jisu u ong ha ka gospel u Mathaïos 24 lynnong dkhot ba 6.
Bad phin sa ïohsngew shaphang ki thma bad ki jingbna ïa ki thma: to sumar phi wat sngewkhuslai: naba ka dei ba kine kiei kiei baroh kin long: hynrei, ka bakut kam pat la jia.
Kane ka dei kaei ba U Jisu u ong ia ki synran jong u haba ki la ia kylli ia u shaphang ka dak ka jingwan jong u bad kaba wai noh ka pyrthei. U Jisu u la iathuh ia ki ba shuwa ka jingwan jong u kin don kine kine ki jingjia ha ka pyrthei, kita ki thma, ki jingialeh markynti ha kaba ka kynja bynriew kan ialeh bad ka kynja bynriew, ka hima ruh bad ka hima, ki nemsniew, ki jingiapthem, bad kiwei kiwei, hynrei, U Jisu u ong, to sumar phi wat sngewkhuslai', um shym la shah ia ki synran ban khuslai wat haba kin iohi ia kine kiei kiei ki ban jia. Bad ha ka dkhot ba 8 u ong, hynrei kine baroh ki long tang ki jingsdang jong ki jingjynjar. Kane ka kyntien tang ki jingsdang, ka pyni ba kin dang don ki jingjynjar kiba kham khraw ban ia kine kiba dang ap sha khmat. Hynrei la kumno kumno ruh u ong phi wat khuslai.
Balei ba ngim dei ban khuslai? U Jisu hi u lah dep jubab namar ba ka dei ia kine kiei kiei ban jia.
MATHAÏOS 24:34-35
Shisha nga ong ha phi, kane ka pateng bynriew kan ym leit noh, tad ynda la pyndep noh ïa kine kiei kiei baroh. Ka bneng bad ka khyndew kin leit noh, hynrei, ki ktien jong nga kin ym leit noh satia.
Bunsien nga ju iohi ha ki Facebook post, WhatsApp ba ki briew ki ia khuslai ia kane ia katai ha kaba iadei bad ki jingjia bapher bapher, haba ka sorkar ka pynmih ia kita ki protocol ban iada na ka jingsaphriang jong u Covid, ka jingkhang ia ki jaka mane Blei, ki curfew ha ka Sunday, ka jingpyntreikam ia ka Vaccine bad kiwei kiwei, ka la don ka jingkhuslai bad ka jingkylli kaba bun, da kaba burom, wat ki pastor, ki basan ruh don kiba la khuslai bad kylli shibun ki jingkylli balei, balei, balei? Hynrei ha ka jingshisha ngim dei ban dang kylli, namar U Trai u lah dep iathuhlypa.
Kine kiei kiei ba ka sorkar jong ngi ka leh mynta ki long tang i ei i ei iba rit eh ban ia nujor bad kaei ba U Jisu u iathuhlypa. Phai biang sha ka gospel u Mathaïos 24 dkhot 9 U Jisu u ong bad kin ai noh ia phi ha ka shitom, bad kin ia pyniap noh ia phi. Na kata ka daw nga ong ia phi ba kine ki jingleh ka sorkar jong ngi ka dang biang palat, lada ka leh lei ban pyndep shuh shuh ia ka jingiathuhlypa U Jisu aiu ngin dang ia ong? Dei na kata ka daw U Jisu u ong, wat khuslai, namar kine ki long tang ki jingsdang, ngim pat poi sha kata ka climax ba U Jisu u ong.
Kumta ka jingkyntu ka long to ngin ym khuslai, hynrei to ngin sngewkmen ba ia ka Ktien U Blei la nang pyndep, bad ba ka jinglaitim jong ngi ka la jan.
LOUKAS 21:28
Te haba kine kiei kiei ruh ki sdang ban jia long, to khmied bad to mied ïa la ki khlieh, naba ka jinglait im jong phi ka la jan.
U Paul u ong ha ki Philipi 4:6-7, Wat khuslai ïa kaei kaei ruh; hynrei, ha kaei kaei baroh da ka jingduwai bad ka jingkyrpad lem bad ka jingainguh, to phin pyntip ïa ki jingpan jong phi sha U Blei. Te kata ka jingsuk U Blei, kaba palat ïa ka jingshemphang baroh, kan ri jai jai keiñ ïa ki dohnud jong phi bad ïa ki jingmut jong phi ha U Khrist Jisu.
Haba ngi iohi kaei kaei kaba pher kaba jia, to ngin ym shu khuslai, hynrei pyntip sha U Trai ha ki jingduwai bad jingkyrpad. Namar ka jingkhuslai hi, ngan ong biang, kam wanrah jingmyntoi eiei ruh em, ka shu tuh pynban ia ka jingsuk jingkmen na ka jingmut jingpyrkhat jong ngi.
U Jisu u ong, Uno te na phi, haba u da khuslai ruh, uba lah ban pyntam shi pruh ïa la ka rynïeng? MATHAÏOS 6:27 La ka long ha kano kano ka rukom, ngin nym lah ban thaw pyrthei da kaba ngi khuslai. Ha ka juh ka rukom ngin nym lah ban pynbha ia ka pyrthei da kaba ngi khuslai. Hynrei lada U Trai um pat shah ba kine ki jingjia kin jia, dei tang ka jingduwai kaba da ka bor U Mynsiem Bakhuid kaba lah ban pynsangeh ia baroh ki jingthmu ba sniew jong u bymman (mrad khlaw).
Ka jingpynkut bad ka jingkyntu ka long, to ngin ym shu kut noh ha ka jingiakhnium ia ud, ka jingiakynnoh bad ha ka jingkhuslai ia kane ne kata, hynrei, to ngin pynkhreh, ngin pynbeit janai ia la ka jingim ba yn ioh shem ia ngi kiba bit nam ban ia leit ryngkat bad u sha kata ka ri ba la kular haba un wan ban shaw ia ngi.
U Blei un da kyrkhu kyrhai bad pynshaitbor ia phi baroh. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Copyright © Jester Mawlong July 16, 2021
Amen..
ReplyDeletePraise the Lord 🤝
Delete