Da bishar ia kiei kiei baroh

1 THESSALONI 5:21

Da bishar ïa kiei kiei baroh; bat skhem ïa kata ka babha.

U Paul u thoh sha ki bangeit ha Thessaloni ba ki dei ban da bishar ia kiei kiei baroh. Hangne u ong ia kiei kiei baroh, ka mut ha baroh ki liang. 

Kane ka long ruh ka jinghikai na ka bynta jong ngi ha kine ki sngi, khamtam lei ha kane ka pyrthei social media mynta, ha kaba shibun ki khubor kiba mih man ka sngi, la ka dei bad kiei kiei kiba iadei bad ka Bible (ba kynja mynsiem) lane ha kaba iadei bad kiei kiei kiba ha ka doh. Ngi hap ban nang shisha ban bishar. 

Nga lyngngoh bha ki briew ha kine ki sngi ki sted haduh katta katta ban share bad ban ngeit ia kano kano ka khubor ka bymshisha, wat ki bangeit ruh, khlem da peit, khlem da bishar la ka long ne em kaba shisha, tang shu don kaei kaei kaba pher, wut lah share, ynda peit bad bishar bniah ia kata, bunsien nga shem ba kam long kaba shisha. Dei namar kata kadaw ka la pynlong ia nga ban thoh ia kane ban long ka jinghikai bad ka jingpynkynmaw ia ngi.

1. Da bishar ia ki khubor ba ialap

Kumba nga ong iaphi ha kine ki sngi namar ka jingdon ka social media kum, Facebook, YouTube, Whatsapp bad kiwei kiwei ki social media platform, shibun ki nongialap ne nonghikai Ktien Blei ki mih, ainguh ia U Trai na ka bynta kane, hynrei ngi hap ban sngewthuh ba ym baroh ki jingialap ki long kiba don ka jingshisha ha ki, don ruh ka bym don ka jingshisha katkum ka Gospel. Kiba shu kren thawnang stad na lade, da kaba shu pynsyriem na ka Ktien U Blei. Lehse phi lah ban sngewphylla ba nga ong ia kane, hynrei ka long kaba shisha ba ka don kum kita ki jingialap ne nongialap. Dei namar kata kadaw ngi hap ban da bishar wat ia ki jingialap ne jinghikai baroh.

U Paul u ong ha ki nong Galatia ba don kita ki briew kiba kam ba ki long ki nongialap, pynban ka jingialap jong ki kam long katkum ka Gospel ba shisha, hynrei kaba shu pynsheptieng, pyn-artatien bad kaba shu pynsniew kai ia ka Gospel U Khrist, bad u Paul u ong ba ngi dei ban da bishar.

GALATIA 1:6‭-‬9

Nga sngewlyngngoh ba phi la kynriah noh shen katta katta na uta uba la khot ïa phi ha ka jingaiei U Khrist, sha kawei pat ka gospel, ka bymlong kawei pat ka gospel; hynrei, tang ba don kiba pynkhuslai ïa phi, bad kiba kwah ban pynkylla sniew ïa ka gospel U Khrist. Hynrei, lada ma ngi, lane u angel na bneng, ngi ïathuhkhana ha phi ïa kano kano ka gospel ka bapher na kaba ngi la ïathuhkhana ha phi, to ai ba un long uba la tim noh. Kumba ngi la ong mynshuwa, nga ong kumjuh mynta pat, “Lada uno uno ruh u da ïathuhkhana ha phi ïa kano kano ka gospel ka bapher na kaba phi la pdiang, to ai ba un long uba la tim noh.” 

Ha ka dkhot ba phra u ong ba lada ma ngi, lane u angel na bneng ngi wan ïalap ha phi ia kawei pat ka Gospel, wat ngeit, hynrei ai un long uba la tim noh. Kane ka kyntien long ba la tim, ha kawei pat ka translation ka ong, ai ba yn rai pynrem ia u sha dujok. Kata ka dei kaei ba u Apostol Paul u ong. Hynrei ha kine ki sngi nga ju iohi bad iohsngew ki briew ki ju ong, O, ba lah ong uta uta u briew jong U Blei, lane uta uta u nongiathuhlypa te ngi dei ban ngeit beit, hynrei u Apostol Paul uba long u shakri bad u Apostol U Jisu Khrist um shym ong satia kumta, namar ba lah ong kita ki briew ba khraw jong U Blei lane u angel U Blei u lah paw ha uta uta bad u ong kumta kumta, ngin ngeit beit. Em! Ngi hap ban bishar. 

Nga lah peit bun bah ki jinghikai wat ha YouTube kiba ong kane ka long ka khubor na U Trai bad U Trai u ong kumta kumta, hynrei haba nga peit na ka Ktien jong U Blei kata jingong ka ia pyrshah bad ka Ktien jong U Blei (Bible). Kynmaw kano kano ka jinghikai lane ka jingiathuhlypa kaba long pyrshah ia ka Ktien U Blei kam long kaba shisha, ka dei kaba lamler, kaba shu mih na ki hi. 

Ki bangeit ha Beria ki long kiba don akor bad kiba stad, haba don ba ialap, ki da ïitbniah na ka Ktien U Blei, la kita ki jingialap ne jingkren ki long ne em kiba shisha.

KI KAM 17:10-11

Te kita ki parabangeit kumne kumne ruh ki la phah noh ïa u Paul bad u Silas mynmiet sha Beria; kiba haba ki la lah poi hangta, ki la ïaleit sha ka synagog ki Jiw. Kine te ki la long kiba kham don akor ban ïa kita kiba ha Thessaloni, kiba la pdiang ïa kata ka ktien da ka jingsngew-la-kloi baroh, ha la ka sngi ki da ïitbniah ïa Ki Jingthoh, la kine kiei kiei ruh ki lah long kumta ne em.

2. Da bishar ia ki jingiathuhlypa

Kumba nga ong ia phi mynne, ngan ong biang. Ha kine ki sngi shibun ki briew kiba mih ban iathuhlypa, ban ong U Trai u ong kumta kumta, lane, kane ka long ka khubor na U Trai, lane, U Trai u pynpaw ia nga ba kan long kumta kumta. Nga ong ia phi ba ngim lah ban shu ngeit ia ki namar ba ki ong 'kumne U ong U Trai', hynrei ngi hap ban da bishar, hooid ngim lah ban shu kren beiñ lane ban shu kyntait kumto, hynrei bishar. 

Da ei bad kumno yn bishar? 

Da ka Ktien U Blei. Lada ka dei katkum ka Ktien U Blei, pdiang, lada kam dei kyntait, tangba wat kren beiñ, da ioh lad ban pyni ia ka jingshisha pyni, lada ki ngeit ai kin ngeit, lada kim ngeit, ieh kumto ha ki kti jong U Trai.

1 THESSALONI 5:20

Wat ñiewbeiñ ïa ki jingïathuhlypa. Ngim dei ban ñiew beiñ, hynrei ban bishar ka long kaba dei.

1 KORINTH 14:29

Hynrei, to ai ba ar ngut ne lai ngut ki nongïathuhlypa kin kren, bad to ai ruh ba kita kiwei kin ïabishar.

1 ÏOANNIS 4:1

Ko hep ba-ieit, wat ngeit ïa ki mynsiem baroh, hynrei, to phin tynjuh ïit ïa kita ki mynsiem, la ki long ne em na U Blei: naba shibun ki nongïathuhlypa balamler ki la leit mih noh sha ka pyrthei.

Lada ngim bishar, ngin shu shah ialam bakla khamakha. Ngi hap ban bishar.

3. Da bishar ia kiei kiei kiba jia ha ka pyrthei

Sa kawei kaba ngi hap ban da bishar bha ka long ha kaba iadei bad kiei kiei kiba jia ha ka pyrthei. Ki jingthoh, ki post, YouTube bad kiwei. Ngim dei ban shu ngeit lut bad shu share wut wut, hynrei bishar bniah, pynshong nongrim bha jai. Da tip na kano ka source ka wan.

Balei nga ong kumta ba ngi dei ban da bishar wat ia kiei kiei kiba jia ha ka pyrthei? Namar ha kine ki sngi nga iohi ia ka jingklumar jong ki briew haduh ba ngam nang shuh ban batai, na kawei ka jingjia sha kawei pat, ka jingklumar suda. Mih ka ADHAAR CARD, klumar lut ki briew namar ba ki tieng (don hi ruh kiba pyntieng) ba ka dei ka shab u mrad khlaw, nangta mynta mih sa kane ka COVID VACCINE, klumar biang ki briew (khamtam ha Meghalaya jong ngi), kane ruh ka long namar ki briew ki pyrkhat bad don kiba ong hi ruh ba ka dei ka shab u mrad khlaw. Dei namar kata, ngi dei ban da bishar bniah bha da kaba peit na ka Ktien U Blei la ka long ne em kumta. Ym ban shu ia sheptieng ruma khlem da peit khlem da bishar na ka Ktien U Blei. Teng teng ia kaei kaba shu iasyriem malu mala ngi lah ong lah dei thik. 

Ngan ai ia phi kawei ka nuksa, ka miaw ka iasyriem bad u khla, hynrei kam dei u khla. Ka lah ban iasyriem thik, ka rukom thoh, ki tmaiñ, ki tyrsim bad kiwei, hynrei to tip ba ka miaw ka sah ka miaw bad u khla u sah u khla. Kam lah da lei lei ban shu kylla khla tangba shu iasyriem. Kumta ruh kiei kiei kiba jia bad pyntreikam ha ka pyrthei ki lah ban iasyriem, hynrei to tip ba kim lah ban shu long la ka long shab mrad khlaw, ka shab u mrad khlaw ka sah ka shab u mrad khlaw. 

Lada phi kwah ban tip shuh shuh shaphang "Ka shab u mrad khlaw" pule ia kine ki jingthoh lane sngap ruh ha YouTube da kaba click ha kine ki link) 

YouTube 👉 Ka jingshon shab 

Blog 👉 Ka jingshon shab

👉 Lano bad Ïano yn shon shab?

👉 Hato u Covid Vaccine u dei ka shab u mrad khlaw?     

👉 U briew jong ka pop

Nga ngeit ngi la sngewthuh bad ioh jinghikai lyngba kane ka jingthoh. Kumta sa shisien pat nga kyntu ieit ia phi baroh kiba pule, to nang ban bishar ia kiei kiei baroh, la ka long ia ki jingialap, jinghikai (article, YouTube etc) lane ia ki jingiathuhlypa bad wat ia kiei kiei kiba jia ha ka pyrthei, ngi hap ban da bishar. Wat ia kane ka jingthoh ne jingkren jong nga ruh bishar, lada ka dei, to pdiang ia ka bad lada kam dei, kyntait ia ka, that's it. Tangba ngi hap ban bishar da ka Ktien jong U Blei, ym tang da ka jingsngew, jingmutdur lane jingpyrkhat briew.

U Blei un kyrkhu.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Copyright © Jester Mawlong | July 10, 2021