Intro: Haba nga iohi ia ka jingklumar jong ki briew (lah ban ong ba wat ki nongialap, ki nongiathuhlypa bad kiwei kiwei) ha kaba iadei bad ka dak lane ka shab u mrad khlaw, ka la pynlong ia nga ban sdang wad bniah na ka Ktien jong U Blei, kumta nga la pule, pule bad iai pule ia ka kitab Jingpynpaw 13 lynnong, hadien ba nga la pule bad iai pule, U Trai U ai ha nga ka jingshai 'lano, iano bad kumno yn pyntreikam ia ka shab u mrad khlaw'.
Ka dak u mrad khlaw ka long ka topic kaba la iasaid da kiba bun ki briew kylleng ka pyrthei, bad ka long ruh ka topic kaba la pynktha khlieh lehse ia ki ba bun kham tam ia kiba duna ka jingtip ia ka Bible. Ka jing tip bhai ka Ktien U Blei ka la pynlong ba ki briew kin shu antad shaphang kata ka dak u mrad khlaw. Dei namar kata, tang shu don eiei kaba pher ki lah tharai ba lah dei ka dak jong u mrad khlaw. E.g. ATM, MICROCHIP, BARCODE, EPIC, ADHAAR, VACCINE etc, kawei hadien kawei pat, ki tharai lah dei, lah dei, lah dei, hynrei khlem dei.
Kumta ha kane ka por to ngin ia peit na ka Bible, Lano bad iano u mrad khlaw un shon shab? Nga ngeit kane kan iarap ia ngi ba ngin ym shu pyrkhat ruma ne sheptieng klumar haba wan kano kano ka khubor ba pynsheptieng shaphang u number jong u mrad khlaw lane u 666.
Ban sngewthuh ia kane, ngin ia peit na ka Ktien jong U Blei na ka kitab Jingpynpaw 13 Lynnong.
1. LANO?
#-1. Hadien ka jingrongnoh: Ka Ktien jong U Blei ka pyntikna ba ka jingshon shab jong u mrad khlaw kan long hadien ka jingrongnoh ia ka Balang. Hooid u Soitan un ialeh wat mynta ruh ban pynurlong ia ka jingthmu jong u, hynrei un nym lah satia katba ka Balang ka dang don.
Ha ka shithi ba ar sha ki THESSALONI 2:7 ka Ktien U Blei ka ong, Namar kata ka jingmaïan ka jingbymñiew hukum ka la trei lypa: tang ba don uwei uba khang mynta, tad ynda yn weng noh ïa u.
Uei une u ba khang? U dei U Mynsiem Bakhuid. U Mynsiem Bakhuid jong U Blei un nym shah satia ia u Soitan ban shon shab ia ki briew namar ka dang dei ka ïa jong ka jingaiei, ha kaba U Mynsiem Bakhuid u dang trei ban pynkynduh ia ki briew, bad kat kiba kylla bamut bad pdiang ia U Jisu, U Mynsiem Bakhuid u shon shab ia ki. Ioannis 16:8; Ephesos 1:13;
Bad haba jingaiei ka la kut, yn rong noh ia ka Balang bad U Mynsiem Bakhuid ruh un leit noh sha bneng.
#-2. Ynda haba ki briew ki la ia mane ia u: Ynda la rong noh ia ka Balang, un sa mihpaw u mrad khlaw banyngkong na ka duriaw. Ka Ktien jong U Blei ka iathuh ba ynda la mih uta u mrad khlaw na duriaw, u Ïakjakor (Soitan) un pynkup bor ia u ba un synshar ia ka pyrthei bad un leh bha haduh ba ki briew kin ia ong, kat une te ym don shuh. Bunsien ki briew ki pyrkhat ba uta u mrad khlaw marsien mih un shu leh donbor beit, hynrei em.
JINGPYNPAW 13:2b Bad uta u mrad khlaw ïa uba nga la ïohi, u la syriem ïa u 'labasa, bad ki kjat jong u kum ki kjat dngiem, bad ka shyntur jong u kum ka shyntur sing: te uta u ïakjakor (Soitan) u la aiti ha u ïa ka bor jong u, bad ïa ka khet jong u, bad ïa ka bor synshar bakhraw.
Bad haba ki briew ki la iohi ia kata ka bor jong u, ki la ia sngewphylla bad ki la ia mane ia uta u mrad khlaw bad ki da iaroh ia u ki da ong, Uei, uba long kum uta u mrad khlaw?
JINGPYNPAW 13:4 Bad ki la ïamane dem ïa uta u ïakjakor naba u la aiti ïa ka bor synshar jong u ha uta u mrad khlaw; te ki la ïamane dem ïa uta u mrad khlaw, ki da ong, “Uei, uba long kum uta u mrad khlaw? uei uba lah ban ïaleh thma bad u?”
Kumba nga ong ia phi ba u mrad khlaw un nym shon shap jubor kumba ki briew ki pyrkhat mynta, hynrei haduh ba ki briew kin mane ia u, kin da iaroh shuwa ia u kumba ngi i ha kitei ki dkhot. Wat haba ki lah mane ruh un nym pat shon shab, dang don shuh shuh ki process ban iaid, ngin sa nang ia peit.
Ha ka dkhot ba 5 & 6 la ong ba ynda u la iohi ba ki briew ki la mane bad iaroh ia u, u la nang sngew ioh bor bad u la sdang sa ban kren khraw bad ban kren beiñ ia U Blei.
JINGPYNPAW 13:5-6
Te la ai ha u ka shyntur kaba ïalap ïa kiei kiei ki bakhraw, bad ïa ki jingkrenbeiñ Blei; bad la ai ha u ïa ka bor synshar ban sah jin sawphew ar bnai (3 snem shiteng). Te u la ang ïa ka shyntur jong u ïa ka ban krenbeiñ ïa U Blei, ban krenbeiñ ïa ka kyrteng jong u, bad ïa ka ïing kyntang jong u, bad ïa kita kiba shong ha bneng.
Haduh lai snem shiteng ruh um pat shon shab. Ynda haba u Soitan u la iohi ba ki briew ki la shem sngewbha ia uta u mrad khlaw, u la nang ai bor shuh shuh bad kumta un sdang ban ialeh thma pyrshah ia ki riewkhuid jong U Blei bad ban jop ia ki.
JINGPYNPAW 13:7
Bad la ai bor ha u ban ïaleh thma bad kita ki riewkhuid, bad ban jop noh ïa ki: bad la ai ha u ïa ka bor synshar halor ka jaid, bad u paidlang, bad ka thylliej, bad ka kynja bynriew baroh.
Kiei kine ki riewkhuid? Don ki briew kiba pynshong nongrim na kane ka dkhot ban ong ba ka jingrongnoh kan long hapdeng ka jingsynshar u mrad khlaw lane ka jingjynjar bah, namar ki ong ba haduh ka kitab JINGPYNPAW 13 lynnong ki riewkhuid ki dang don. Hynrei nga kwah ban ong ba kine ki riewkhuid ki dei kiba kylla bamut hadien ka jingrongnoh, ha ka por jong ka jingsynshar u mrad khlaw bad ka jingjynjar bah.
JINGPYNPAW 7:9, 13-14
⁹Hadien kine kiei kiei ruh, nga la khmih, bad ha khmih, u paidbah byllien, ïa uba uno uno um lah ban ñiew, na ki kynja bynriew bad na ki jaid bad na ki paidlang bad na ki thylliej baroh, ba ki da ïeng ha khmat kata ka khet bad ha khmat uta U Khun langbrot, kiba la kup ki jaiñkup balieh, bad ki dieng Tlai ha ki kti jong ki; ¹³Te uwei na kita ki tymmen basan u la kylli, u da ong ha nga, “Kine kiba la kup kita ki jaiñkup balieh, hato ki long kiei bad nangno ki la wan?” ¹⁴Te nga la ïathuh ha u, “Ko Kynrad, me tip ma me.” Te u la ong ha nga, “Kine ki long kita keiñ kiba wan na kata ka jingjynjar bakhraw, bad ki la sait ïa kita ki jaiñkup jong ki, bad ki la pynkhuid lieh ïa ki ha ka snam jong uta U Khun langbrot.
Kine ki riewkhuid namar ba kim treh ban mane ban iaroh ia u mrad khlaw, kumta ki hap ban shah pynshitom, wat ban shah pyniap ruh.
JINGPYNPAW 13:10
“Lada uno uno ruh u ïalam mraw, u leit noh hi keiñ sha ka jinglongmraw: lada uno uno ruh u pynïap noh da ka waitlam, ka dei ban pynïap noh ïa u da ka waitlam. “Hangne don ka jingïaishah bad ka jingngeit jong kita ki riewkhuid.”
Ki riewkhuid ki donkam ka jingiaishah bad ka jingngeit kaba skhem ha U Blei haduh ka jingiap. Dei kane ba U Jisu u ong, Hynrei, jar uba da ïaineh haduh ka bakut, uta keiñ u ban ïohlait im. MATHAÏOS 24:13
#-3. Ynda ki briew ki la thaw dur ia uta u mrad khlaw banyngkong: Hadien kata un mih sa uwei u mrad khlaw na ka khyndew, (ia une u mrad khlaw uba ar la tip kum u nongiathuhlypa ba lamler) (JINGPYNPAW 13:11) bad da ka jingmih jong une u mrad khlaw uba ar, utei u mrad khlaw banyngkong u la nang ioh bor shuh shuh. Bad une u mrad khlaw ba ar, u la leh shibun ki jingphylla, kat ban pynhiar ia ka ding na bneng ban shukor ia ka pyrthei bad u da pynbor ia ka pyrthei ban mane ia uta u mrad khlaw banyngkong. (JINGPYNPAW 13:12) Bad ym tang ban mane, hynrei haduh ba kin da thaw ia ka dur jong uta u mrad khlaw banyngkong, bad ynda ki la dep thaw dur, yn ai bor ha u ban ai ka mynsiem ha kata ka dur haduh ba kata ka dur kan da ioh kren briew.
JINGPYNPAW 13:14-15
Te u shukor noh ïa kita kiba shong halor kata ka khyndew, da kita ki dak khyllah ïa kiba la ai bor ha u ban leh ha khmat uta u mrad khlaw; u da ong ha kita kiba shong halor kata ka khyndew ba kin thaw dur ïa uta u mrad khlaw, uba la ïoh ïa kata ka jingmong da ka waitlam, bad ba la ïoh im pynban. Bad la ai bor ha u ban ai ka mynsiem ha kata ka dur uta u mrad khlaw, ba kata ka dur uta u mrad khlaw kan da ïoh kren ruh, bad ba kan ïoh pynlong ba kat ki ban ym mane dem ïa kata ka dur uta u mrad khlaw, yn pynïap noh ïa ki.
2. ÏANO?
Ka jingshon shab u mrad khlaw kan nym long kumba ki briew mynta ki pyrkhat. Kumba nga ong iaphi ha kaba sdang, ki briew tang shu don eiei kaba pher ki lah pyrkhat ba lah dei ka dak u mrad khlaw, mih u ADHAAR ki briew ki lah ong kane te lah dei ka jingriam u mrad khlaw, mih sa U Covid Vaccine lei lei lah nang khynniuh shuh shuh bad lah nang pynskhem ba une te lah dei beit. Baroh baroh lah ia pyrshah. Hynrei nga kwah ban iathuh ia phi ba katba phi dang pyrshah um dei u mrad khlaw. Namar ha ka por jong u mrad khlaw lada phi pyrshah un nym ong satia kumba ong ka sorkar jong ngi, to ngin ap shuwa, ngin pynsngewthuh shuwa, em. Lada phim treh um pyniap.
To ngin ia peit, Ïano un shon shab?
#-1. Ïa kita kiba mane ia u: Ngi la ia peit ha kaba sdang, haba u Soitan u la ai bor ha uta u mrad khlaw, ki briew ki la sngewphylla bad ki la ia mane ia u, ki la iaroh ia u. (dkhot 4)
Phi i ka sdang shuwa ka jingmane, ka jingiaroh bad ka jingthaw dur ia uta u mrad khlaw, hadien ka wan ka jingshon shab. Kat kita kiba mane ia u, u shon shab bad kat ki bym mane u pyniap. Kam long satia kumba pyrkhat ki briew ba lada ym mon ruh un shon jubor lane un leh buit tuh, em. Wat la u dei uba buit tuh hynrei ha kane ka por un nym leh buit tuh shuh. Lada phi mane, shon shab, lada phim mane, pyniap. No other option.
JINGPYNPAW 13:15
Bad la ai bor ha u ban ai ka mynsiem ha kata ka dur uta u mrad khlaw, ba kata ka dur uta u mrad khlaw kan da ïoh kren ruh, bad ba kan ïoh pynlong ba kat ki ban ym mane dem ïa kata ka dur uta u mrad khlaw, yn pynïap noh ïa ki.
Kynmaw, ka jingshon shab u mrad khlaw ka don jingiadei bad ka jingmane. Kano kano ka scheme ka bym pat ktah ia ka jingmane kam pat dei ka shab u mrad khlaw.
#-2. Ia kita kiba ia ka kyrteng jong ki ym shym la thoh ha ka kitab ka jingim jong U Khun langbrot:
JINGPYNPAW 13:8
Te kita baroh kiba shong halor ka khyndew kin ïamane dem ïa u, kiba ki kyrteng jong ki ym shym la thoh ha kata ka kitab ka jingim jong uta U Khun langbrot, ïa uba la pynïap la myndanglong ka pyrthei.
Lehse phi lah ban sngewphylla balei ba ym shym la thoh ia ka kyrteng jong ki ha ka kitab ka jingim jong uta U Khun langbrot? Ka daw ka dei namar ba ki la kyntait ia U Jisu u ba la shah iap halor diengphna namar ki pop jong ki. Kam dei satia ka jinglehshiliang khmat jong U Blei lane ka jingjied jong U Blei kumba don mano re kiba ngeit kumta. Hynrei ka dei ka jingjied jong u briew ban kyntait ia U Jisu.
2 THESSALONI 2:10-12
Bad da ka jingshukor ka jingbymhok baroh na ka bynta kita kiba jot; naba kim shym la pdiang ïa ka jingieit ïa ka jingshisha, ba yn pynim ïa ki. Te namar kane, U Blei un phah ha ki, ïa ka jingtrei ka jingbakla, ba kin ngeit ïa ka lamler; khnang ba yn ïoh pynrem ïa kita baroh ki bym shym la ngeit ïa ka jingshisha, hynrei, kiba la sngewbha ha ka jingbymhok.
Kumta ban lait na ka jingshah shon shab ha u mrad khlaw ngi hap ban pyntikna ba ia ka kyrteng jong ngi yn thoh ha ka kitab ka jingim jong U Khun langbrot.
JINGPYNKUT
Ban pynkut ia kine baroh, ki jingsheptieng, ki jingkhuslai bad kiwei, ka long ba ka khubor jong ka kitab Jingpynpaw ka hikai ia ngi ba ngin pynleit jingmut ha U Khun langbrot uba la pyniap na ka bynta jong ngi, ban mane ia U da kata ka jinglong hok bad jingaiti lut. Ai ba U Khrist un long ka bynta pdeng jong ka jingpyrkhat jong ngi, ym ia u mrad khlaw bad ka dak (mark) jong u. Ngin pynkhreh ia la ka jong ka jingim kum ki theisotti bastad, bad haba U Jisu un wan ha ka jingrongnoh ngin ioh ban ia her ryngkat bad U, namar lada ngi duh ia ka jingrongnoh kan long kaba eh ba ngi lah ban shah ia ki jingjynjar ha kata ka sngi, ka long kaba eh ban lait na ka jingshah shon shab, lait tang kito kiba U Trai u la ai bor kyrpang. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | June 25, 2021
Comments
Post a Comment