U Jisu u la iam

U Jisu u la iam (Jesus wept) ka dei ka dkhot kaba lyngkot tam ha ka Bible lada ngi peit katkum ka Bible phareng (English). La thoh ia kane ha ka gospel u Ioannis 11:35. Lehse ngi lah ban pyrkhat, kaei kaba pynlong ia U Jisu ban iam? Ban sngewthuh ia kane phi lah ban pule naduh ka dkhot ba nyngkong ter ter. Hangne la iathuh shaphang ka jingiap jong u Lasaros.

Ka Bible ka ong, "La don te uwei uba la pang, u Lasaros na Bethania, na ka shnong jong ka Mari bad ka Martha ka para jong ka." (v.1). Namar kata, kita ki para kynthei ki la ïaphah ha U, ki ong, “Ko Trai, ha khmih, uta uba me ieit u pang.” (v.3).

Ban pynlyngkot ia ka jingiathuh, U Jisu u la leit sha kata ka ïing jong ka Mari bad Martha bad shuwa ban pynim pat ia u Lasaros, ka Bible ka ong, "U Jisu u la iam". Namar kata, kita ki Jiw ki la ïa-ong, “Ha khmih, katno u la ieit ïa u!” (vv.35-36) Ynda u la dep iam, u la pynim pat ia u Lasaros. (vv.38-44)

Ha kane ka por ngam kwah ban ia kren kham bun shaphang ka jingpynim pat ia u Lasaros, hynrei ngin ia peit ia katei ka kyntien "U Jisu u la iam". Haba U Jisu u la tip ba u Lasaros u la iap, u la leit sha ka ïing jong u, bad haba u la poi ha kata ka jaka ba la buh (tep) ia u, U Jisu u la iam. Ngi lah ban sngewphylla balei U Jisu um ju iam haba u leit sha kiwei pat ki ïing iap briew. Shibun ki ïing iap briew u lah leit, shibun kiba u la pynim pat, hynrei balei ym ju iohi (ym shym la thoh) ba U Jisu u iam, hynrei tang ha kane ba iap u Lasaros.

Ka dkhot ba 3 bad ka dkhot ba 36 ki ai ia ka jubab 'Balei U Jisu u la iam', ka dei namar ba u ieit eh ia u Lasaros. U Jisu um lah khlem da iam haba U iohi ba kita kiba u ieit ki iap. U kwah ba kin im, kumta u la pynim pat ia u Lasaros kumba ngi pule ha ka Ktien jong U Blei.

Kaei kaba nga kwah ban wanrah ia ka jinghikai na kane ka dkhot "U Jisu u la iam" ka long ba U Jisu um sngewtynnad ban iohi ba kita kiba u ieit kin iap (nga kren ia kata ka jingiap ha jinglong mynsiem). U Jisu u iam pangnud ban iohi ba ngi don ha ka jingtep jong ka pop. Um kwah ban iohi ba ngi thiah sah ha kata ka pop. U kwah ban pynim pat ia ngi na kaba kum kata ka jingiap ba kynja mynsiem.

Paralok, lada phi la don ha kaba kum kata ka condition ha kaba ka jinglong mynsiem jong phi ka la iap, khot ia U Jisu kumba ka Mari bad Martha ki la khot, U Jisu un pynim pat ia phi na kata ka jingiap ba kynja mynsiem. Wat ai ba U Jisu un iam sah na ka bynta jong ngi. Lada U Jisu u iam mynta na ka bynta jong phi, phi leh bymsuidniew, ynda phin iam sa ma phi ha dujok, U Jisu un nym iam shuh.

Proberb 1:24-27, "Namar nga la khot, bad phim treh; nga la kner ïa la ka kti, bad ym don ba suidñiew; hynrei, phi la ibeiñ ïa ka jingpyrkhat jong nga baroh, bad phim mon satia ïa ka jingsneng jong nga: nga ruh ngan rkhie ha ka jingjynjar jong phi; ngan rkhiebeiñ haba wan lap ka jingsheptieng jong phi; haba wan lap ka jingsheptieng jong phi kum ka 'erïong, bad haba nang wan ka jingjynjar jong phi kum ka lyer langthari; haba ka jingshipa bad ka jingsngewpisa ki ngat halor jong phi."

Paralok baieit, lada phi sngewthuh ialade ba phi don ha ka jingiap kaba kynja mynsiem, khot kyrpad ia U Jisu, un pynim pat ia phi, un pynthymmai pat ia phi. Kynmaw, U Jisu un nym pynim pat ia phi na kata ka jinglong ba iap lada phim khot kyrpad ia U, bad lada phi khot ia U, U Mynsiem jong U Blei un pynthymmai pat ia phi da shisha.

Rom 8:11 ka ong, "Hynrei, lada U Mynsiem jong uta uba la pynmih pat ïa U Jisu na ki baïap u shong sah hapoh jong phi, uta uba la pynmih pat ïa U Khrist na ki baïap, un pynlong im ruh ïa kita ki met baïap jong phi, da uta U Mynsiem jong u, uba shong sah hapoh jong phi."

To U Blei un kyrkhu ia phi. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.