Ka jingialap Gospel

Intro: Ka Jingialap (evangelism) ka dei ka jingpynphriang ia ka gospel jong U Jisu Khrist sha kita ki bym pat ngeit lane iohsngew ia ka.

Kaei ka gospel? Ka gospel ka long ka bor U Blei ban pynim ia uwei pa uwei uba ngeit. 

Rom 1:16, "Namar ngam sngewlehrain ïa ka gospel U Khrist; naba ka long ka bor U Blei ïa ka ban pynim ïa uwei pa uwei uba ngeit, ïa u Jiw nyngkong bad ïa u Grik ruh."

1. Ka khot ban ialap

Ka jingialap gospel ka dei ka jingkhot ia uwei pa uwei uba lah ngeit bad ba la pdiang ia U Jisu Khrist. Ngi iohi ruh ba U Jisu mynba u dang don hangne ha pyrthei u iai ban bad iai pynkynmaw ia ki synran na ka por sha ka por ba kin ialap ia ka gospel. 

#- Naduh ka sngi banyngkong ba U khot ia ki synran U la ong ia ki ba kin ialap ia ka gospel kat shaba ki iaid. Mathaïos 10:7, "Katba phi ïaid ruh, to ïalap, da ong, ‘Ka hima ki bneng ka la jan."

#- Hadien ka jingmihpat, U la pynkynmaw ia ki ba ki dei ban ialap ia ka gospel. Markos 16:15-16, U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh; te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem."

#- Bad shuwa ba un kiew noh sha bneng ruh u la pynkynmaw biang ba ki dei ban ialap ia ka gospel. Ki Kam 1:8, "Hynrei, phin ïoh diang ïa ka bor, ynda la wan U Mynsiem Bakhuid ha phi; bad phin long ki nongphla ïa nga ha Jerusalem, bad ha Judia baroh bad ha Samaria, bad haduh bakut ka pyrthei.”

La ju ong ba kano kano kaba la ban arsien laisien ka pynpaw ia ka jinglong donkam jong kata ka Ktien. Kumta ngi sngewthuh ba kane ka jingialap gospel ka long kaba donkam haduh katta katta, kaba uwei pa uwei u bangeit u hap ban shim ia ka jingkitkhlieh ban ialap.

2. Ki rukom jingialap:

1) Ialap marmet (personal evangelism): Ka jingialap marmet ka dei ka jingialap kaba baroh u bangeit u lah ban leh. Ia kane lah ban leh wat tang hapdeng marwei, arngut laingut ruh. Ka lah ban long ha ïing briew, ha lynti syngkien, ha dukan, ha kali bad kumta ter ter.

#- Ngi iohi U Jisu u ialap ia ka Nong Samaria marwei ha rud lynti. (Ioannis 4:1-26)

#- U Philip u ialap ia u Iunukh para marwei ha ka Kali jong u. (Kam 8:26-38)

#- U Petros u ialap ha ïing u Kornilios. Hapdeng kham bun ki briew. (Kam 10:34 ter ter)

2) Ialap paidbah (mass evangelism): Ngi iohi ruh ha ka Bible la ju ialap hapdeng bun ki paidbah ia kaba ngi lah ban ong ha ka ktien phareng ka mass evangelism.

#- U Jisu mynba u dang don ha kane ka pyrthei, ngi shem ba u ialap hapdeng u paidbah ba bun kumba san hajar ngut tam. (Mathaïos 14:13-14)

#- U Petros u ialap hapdeng u paidbah ba bun, ha kaba tang kiba kylla bamut ruh kumba 3000 ngut. (Kam 2:41-42)

#- U Philip u ialap ha ka Nongbah Samaria, ha kaba ki briew kata ka shnong ki la kylla ka bamut. (Kam 8:4-8)

3. Kumno ngin ialap?

Lehse ngi la ju iohsngew na ka por sha ka por ia ka jinghikai bad jingkyntu ba ngi dei ban ialap ia ka gospel, ban ialap ia U Jisu sha kiwei pat, hynrei phin tip kumno ban ialap. Nga kwah ban pyni shaphi na ka Bible kumno kita kiba dang sdang ki ialap ia U Jisu.

#- U Philip - Haba u la iashem bad U Jisu, ynda katto katne por u ia kynduh ia u Nathaniel u la iathuh ia u shaphang U Jisu bad u Nathaniel ruh u la iashem ia U Jisu. (Ioannis 1:43-51)

#- Ka Nong Samaria - Kane ruh haba ka la iashem bad U Jisu ha kata ka lynti katba ka dang mut ban leit tong um, hadien kata ka la mareh sha ka shnong jong ka ban iathuh lem ia ki para shong jong ka shaphang U Jisu, bad kita ki briew jong kata ka shnong ki la ia wan bad ki la ngeit ia U Jisu. Kaba suk haduh katta katta (So simple).

Nga ngeit katba ngi nang phla, U Mynsiem Bakhuid un nang ai jingstad, jingshlur bad un nang pynsleh ia ngi.

2 Timothy 1:7-8 "Namar U Blei um shym la ai ha ngi, ka mynsiem ka jingsheptieng; hynrei, ka jong ka bor, bad ka jong ka jingieit, bad ka jingleh adkar. Namar kata, wat sngewlehrain ïa kata ka jingphla ïa U Trai jong ngi, lymne ïa nga u nongsah byndi jong u; hynrei, to ïashah shitom bad ka gospel katba kum ka bor U Blei…"

La ai ia U Mynsiem jong ka bor, ka jingieit bad ka jingleh adkar khnang ba ngi lah ban ialap ia ka gospel. Ym ban lehrain, ym ban sheptieng, bad haba ngi ialap ia kiwei, ialade ruh ngin im bad ngin nang iohbor. (1 Timothy 4:15-16)

To ngin ialap ia ka gospel haba dei por bad ha bymdei por de. (2 Timothy 4:2)

U Blei un kyrkhu bad pynsleh ia phi ban ialap ia ka gospel U Jisu Khrist, khnang ba ki mynsiem bakordor kin ioh jingpynim. 

U Blei un kyrkhu. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | May 31, 11:20 PM