Intro: U nongialam jingmane u don ka bynta ka ba khraw ha ka Balang, bad ka jingshakri jong u ka long syriem bad u nongsharai (Pastor). Kumta u nongialam jingmane u dei ban don ia ka dohnud jong u nongap langbrot bashisha.
Ngan pynshong nongrim ia kane ka jinghikai da kaba peit ia ka nuksa na u Nongap Langbrot bashisha bad kumno ba ki nongialam jingmane ruh ki dei ban pyrthuhbud ia u.
Ki jinglong jong u Nongap langbrot bashisha:
1. U don ka jingieit bad ka jingsngewsynei na ka bynta ki langbrot – Kaei kaba pynlong ia u nongap langbrot ban sharai bha ia ki langbrot ka dei namar ba u don ka jingieit bad ka jingsngewsynei na ka bynta ki langbrot. Kata ka jingieit bad ka jingsngewsynei ka la pynlong ia u ba un kñia wat ia la ka jingim na ka bynta ki langbrot.
U Jisu kum u nongap langbrot bashisha u ong, Nga, nga long u nongaplangbrot u babha; uta u nongaplangbrot u babha u aiti noh ïa la ka jingim na ka bynta ki langbrot. Ïoannis 10:11.
Kumjuh ruh kum ki nongialam jingmane ngi dei ban don ia ka jingieit bad jingsngewsynei na ka bynta ki bangeit. Ka jingbym don ka jingieit bad jingsngewsynei ka pynlong ba ngim da salia eh shaphang ki bangeit, lada ki lah ne ym lah ia ka jingrwai ruh, tangba lah lah ialade lah biang. Kata ka pyni ruh ba ngim dei kita ki nongialam jingmane bashisha. U nongialam jingmane bashisha u kloi ban kñia noh ia la ki jong ki jingsngwtynnad jong u (personal preferences) na ka bynta ki bangeit.
2. U don ka jingkitkhlieh – Kata ka jingkitkhlieh kaba u don na ka bynta ki langbrot ka la pynlong ia u ba un pyrkhat man ka sngi shaei un ialam ia ki langbrot ba kin ioh ka jingbam kaba biang bad ba kin kdang, (naduh ki langbrot khunlung haduh ki langbrot tymmen). U tip ruh ha kano ka por ban pynbam phlang bad ha kano ka por ban pyndih um.
U nongap langbrot u bym don jingkitkhlieh um da salia eh ki langbrot kin ioh bam ne kim ioh bam ruh. Kata ka dei ka jingiapher.
U nongialam jingmane bashisha ruh u dei ban don ka jingkitkhlieh na ka bynta ki bangeit kiba u ialam. U hap ban pyrkhat, u hap ban pynkhreh kumno ban ialam ia ki bangeit ha ka jingmane. Ban peit ruh ba kata ka jingbam (jingrwai jingtem) ka long kaba lah ban bam lang naduh ki khynnah samla haduh ki riew tymmen. U hap ban sngewthuh ba ka jingiaseng ka dei kaba iakhleh lang ki pateng (multigenerational).
Shuh shuh u nongialam jingmane bashisha u tip ha kano ka por ban ailad ia ki bangeit ba kin mane jylliew ia U Trai bad u tip ha kano ka por ban ailad ia ki bangeit ban tuid bad ban dih na U Mynsiem, khnang ba ki bangeit kin mih na ka jingmane da ka jinghun bad ka jingkyrkhu.
3. U iaid ha shuwa: La ong ba ki nongap langbrot sha ki thaiñ Middle East (Israel) haba ki leit ban sharai ia ki langbrot ki ju iaid na khmat bad ki langbrot ki bud nadien. Kane ka kren ba u nongap langbrot barobor u long ka nuksa ia ki langbrot. Kumta ruh kum ki nongialam jingmane ngi dei ban long ka nuksa ia ki bangeit, la ka dei ha ka jinglong jingim, bad kumjuh ha ka jingmane ia U Trai.
Ka nuksa kumno ngi rwai, kumno ngi thap kti rah kti, kumno ngi ngam ha ka jingmane bashisha bad kumta ter ter. Ngi dei ban long barobor ha khmat.
4. U peit ba kin ym sakma – Nalor kitei baroh, u nongap langbrot u peit bha ruh ba iwei i langbrot in ym sakma na ka kynhun jong u. Katba lah un ialeh ban lum lang ia ki shi jaka. Kumta barobor un ialam ia ki langbrot ha ka jaka ba biang ki jingbam kaba baroh kin ia ioh bam lang khnang ba kin ym sakma.
Kane ruh ka dei ban don ha ki nongialam jingmane, ban peit ba ki bangeit kin ym sakma ha ka jingmane ia U Trai. Ialeh katba lah ban lum lang ia ki bad ban pynpoi lang ia ki ha kajuh ka kynhun. Kawei ka ban pynlong ia ki bangeit ban ym sakma ka long ba ka jingrwai jingtem jong ngi kan long kaba lah ban ia tuid lang. Lada ka jingrwai jingtem jong ngi ka long tang ka jingsngwtynnad marwei, lane tang ki katto katne, kumta phin shem ba ki bangeit kin shu sakma ha ka jingmane, kin hap ban shu peit kai shadiang shamon, teng teng ki la hap ban shu khmied sha tnum sha sad, bad kumta ter ter. Kumta ba ki bangeit kin ym sakma, ngi hap ban da peit bha ha baroh ki liang.
Kine ki long katto katne ki jinghikai kiba ngi la ia peit ia ka nuksa na u nongap langbrot bashisha. Nga ngeit ba lyngba kane ka jingthoh, kan iarap ia ngi ba ngi lah ban long kita ki nongialam jingmane, kiba don ia ka dohnud jong u nongap-langbrot.
U Blei un kyrkhu ia phi. Amen
N.B: U Nongaplangbrot bashisha u dei U Jisu.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | June 10, 2021
Comments
Post a Comment