Jinglamphrang: Haba ngi kren shaphang ka jingshon shab bunsien kaba wan ha ka jingmut u briew hi ka long beit shaphang ka jingshon shab jong u mrad khlaw (666), hynrei ngi klet pat ba U Blei ruh u don la ka rukom jingshon shab, bad wat u briew ruh u don la ka rukom jingshon shab.
Click ha kane 👇ka link na ka bynta ka
Shuwa ban iaid shaphang ngin ia peit, Kaei ka jingshon shab?
Ka jingshon shap ka dei kata ka jingbuh dak ban pyni ia ka jinglong trai. Kaba mut ban pynithuh ba uta ne kata ki dei ki jong uta uta. La ka dei ka jingshon shab jong u briew, U Blei ne u Soitan ruh, baroh kine ki jingshon shab ki kren ia kitei ki juh ki jingmut ne jingthmu ba la ong haneng.
Ban sngewthuh ia ka jingmut, ngin ia peit shuwa na ka jingshon shap jong u briew.
Kumba nga la ong haneng ba ka jingshon shab ka pyni ia ka jinglong trai. Kumta ruh ki briew ki ju buh dak ne thoh marka ia la ki jong ki mar ki mata ban pynithuh ba kata ka tiar ne ka mar ka dei ka jong ki. Ki briew kin nym thoh marka ia ka mar kiwei, ka bym dei ka jong ki. Ngi ju iohi ia kane haba ki briew ki thied ia ki mar ki mata, la ka long ki pliang, pela, ki khiew ki siang bad kiwei kiwei la ju buh dak ia ki, ia kaba ngi ju ong 'thoh marka'. Ïa kane la ju leh ruh da ki nongkhaï haba ki leit thied mar na iew la ju thoh marka ia ki shuwa ban pynkit ha ki kali iew, khnang ba kito ki nongbud ne nongñiah kali kin tip ban pynhap, une u dei jong kata kata lane jong uta uta. Tang na ka marka ki ithuh ba kane ka mar ka dei jong kita kita ki briew. Kata ka dei ka jingmut jong ka jingshon shab.
Kawei pat kaba ngi lah ban sngewthuh ka long haba la thoh marka ia kano kano ka mar, kata ka mar ka lah don hapoh ka jingpeit ka jingsumar jong uta u trai, lada u sumar bha ne u sumar sniew.
To ngin ia peit mynta shaphang kane:
1. Ka jingshon shap jong U Blei:
Ka Bible ka iathuh ia ngi ba U Blei ruh u don la ka jong ka jingshon shab, bad kane ka jingshon shab jong U Blei ruh la long kumjuh hi.
EPHESOS 1:13
Ha u, ma phi ruh, haba phi la ïohsngew ïa ka ktien ka jingshisha, ka gospel ka jingpynim jong phi; ha uba, haba phi la ngeit ruh, la shon shab ïa phi da U Mynsiem Bakhuid ka jingkular.
Haba u briew u kylla bamut, u ngeit bad u pdiang ia U Jisu, kumta U Blei u shon shab ia uta u briew ne ka briew ban pyni ba uta u briew u lah dei u jong U Blei. Kynmaw U Blei un nym shon shab ia kita ki bym dei ki jong U, hynrei tang ia la ki jong, kita kiba la kylla bamut bad pdiang ia U Jisu.
Shuh shuh ha ka EPHESOS 4:30 ka Ktien U Blei ka ong, To wat pynsngewsih phi ïa U Mynsiem Bakhuid U Blei, da uba la shon shab ïa phi haduh kata ka sngi ka jingsiewspah.
La shon shab ia ngi da U Mynsiem Bakhuid haduh ka sngi ka jingsiewspah. Bad haba la shon shab ia ngi, ngim dei shuh ban pynsngewsih ia U Mynsiem Bakhuid jong U Blei. Ngi hap ban im ka jingim kaba pynsngewbha ia U.
Shuh shuh kaba sngewtynnad ka long haba la shon shab ia ngi, ngi lah don hapoh ka jingsumar ka jong U Blei. U Soitan un nym lah shuh ban leh trai khlieh halor jong ngi.
1 PETROS 1:5
ïa kiba la sumar da ka bor U Blei da ka jingngeit khnang ïa ka jingpynim, ïa kaba la khreh ban pynpaw ha ka Ïa ka bakhatduh.
La sumar ia ngi da ka bor U Blei haduh ba ngin da ia shem bad U Trai. Ngi iohi na ka Bible ba wat ia ki angel ba la phah khnang ban pynkordit ia ka pyrthei ha ka por ka jingjynjar bah, U Blei u la ong ia ki ba kin ap shuwa haduh ban da ioh ban shon shab ia ki briew jong U Blei.
JINGPYNPAW 7:1-3
Te hadien kane, nga la ïohi ïa ki saw ki angel kiba ïeng halor ki sawdong ka khyndew, ba ki ïabat ïa ki saw lyer ka khyndew, khnang ba ka lyer kan ym ïoh beh ha ka khyndew, lymne ha ka duriaw, lymne ha kano kano ka dieng. Bad nga la ïohi ïa uwei pat u angel ba u wan kiew na sha ba-mih ka sngi, u da bat ïa ka shab jong U Blei U Ba-im; bad u la pyrta da ka ktien bajam ha kita ki saw angel, ha kiba la ai bor ban pynsniew ïa ka khyndew bad ïa ka duriaw, u da ong, “To wat pynsniew ïa ka khyndew, lymne ïa ka duriaw, lymne ïa ki dieng, ha ban da ngi la ïoh shon ïa ki shakri U Blei jong ngi halor ki shyllangmat jong ki.”
Kat kiba dei ki jong U Blei, la shon shab bad kat kita ki bym don ka shab jong U Blei, la pynkordit ia ki da ka jingpynkordit haduh ba kita ki briew ki kwah ban iap ruh kin nym iap satia, hynrei yn pynkordit, pynkordit bad pynkordit.
JINGPYNPAW 9:4-6
Bad la ong ha ki ba kin ym pynsniew ïa u phlang ka khyndew, lymne ïa kaei kaei ruh ka bajyrngam, lymne ïa uno uno ruh u dieng, hynrei, tang ïa kita ki briew ki bymdon kata ka jingshon shab jong U Blei halor ki shyllangmat jong ki. Bad la ai ha ki ba kin ym pynïap noh ïa ki, hynrei, ba yn pynkordit ïa ki, san bnai: te kata ka jingpynkordit ïa ki, ka la long kum ka jingpynkordit ka 'ñianglartham haba ka la dait ïa u briew. Te ha kita ki sngi, ki briew kin wad noh ïa ka jingïap, bad kin ym shem ïa ka satia; bad kin kwah eh ban ïap noh, te kata ka jingïap kan phet noh na ki.
Kata ka dei ka jingpynkordit jong U Blei ia kita ki bym don ia ka shab jong U.
2. Ka jingshon shab u mrad khlaw:
Balei nga buh hadien (last) ia ka jingshon shab jong u mrad khlaw? Namar ka jingshon shab jong u mrad khlaw kan long hadien duh. Kaba pyni ba kita ki ban shah shon shab ha u mrad khlaw ki dei kita kiba la shah kyntait ha ka jingshon shab jong U Blei. Kumta ngi hap ban pyntikna ban ioh ia ka jingshon shab jong U Blei khnang ban lait na ka jingshah shon shab ha u mrad khlaw.
Kumba nga la ong haneng, ngan ong biang ba ka jingshon shab ka pyni ia ka jinglong trai. Kumta ruh u Soitan un shon shab tang ia la ki jong ki briew, un nym shon shab satia ia ki bym dei ki jong u. Bunsien ki briew ki pyrkhat ba u Soitan un shon shab naphang wat ia ki bym mon ruh, un riam un leh buit bad kumta ter ter, hynrei haba ngi peit na ka Ktien U Blei ngi shem ba kan nym long satia kumta. Un nym shon jubor satia ia ki bym dei ki jong u, hynrei tang ia la ki jong, kita kiba ieit bad mane ia u.
JINGPYNPAW 13:4 Bad ki la ïamane dem ïa uta u ïakjakor naba u la aiti ïa ka bor synshar jong u ha uta u mrad khlaw; te ki la ïamane dem ïa uta u mrad khlaw, ki da ong, “Uei, uba long kum uta u mrad khlaw? uei uba lah ban ïaleh thma bad u?”
Bad kat kita kiba u la shon shab ki lah don hapoh ka jingpeit jingsumar jong u. Kin ioh ban thied, kin ioh ban die bad kumta ter ter.
JINGPYNPAW 13:16-17
Bad u pynlong ïa ki baroh, ïa ki barit baraiñ ruh bad ki bakhraw batri, ïa ki bariewspah ruh bad ki baduk, ïa kiba laitluid ruh bad ki mraw, ba yn buh ha ki, ïa ka dak halor ka kti kamon jong ki, lane halor ki shyllangmat jong ki; bad ba uno uno ruh un ym lah ban thied lane ban die, hynrei, tang uta uba don kata ka dak, kata ka kyrteng hi uta u mrad khlaw keiñ, lane kata ka jingkheiñ ka kyrteng jong u.
Kita kiba don ka dak (shab) jong u mrad khlaw ki lah ban thied ban die, kiwei te em. Kane ka pyni ba u Soitan ruh u sumar, u pynbiang ia la ki briew jong u, hynrei sngewsih pat ban ong ba kane ka jingpynbiang jong u mrad khlaw kan long tang shi por, un nym lah ban pynbiang sah. Tang katto katne kan wan ka jingpynjot bad ka jingpynkordit jong U Blei ia kita kiba pdiang ia ka shab jong u mrad khlaw.
1 THESSALONI 5:2-3 Namar phi hi, phi ïatip biang ba kata ka sngi U Trai kan wan kumjuh kum u nongtuh mynmiet. Katba ki dang ong, “Ka jingsuk bad ka jingskhembha”, ynda kumta, ka jingjot bakyndit kyndit kan ngat ha ki, kum ka jingsuh khun ha ka briew kaba punkhun; bad kin ym ïohlait shuh da lei lei.
Katba ki briew (kita ba la shon shab u mrad khlaw) ki dang ong ka jingsuk bad ka jingskhembha, die katba mon, thied katba mon, bam katba mon, dih katba mon, hynrei kynsan kynsan yn pynjot ia ki, ong ka Ktien U Blei.
Paralok baieit, ngi la ia kren shaphang ka jingshon shab jong U Blei bad ka jingshon shab jong u mrad khlaw, da kaba ngi la ia peit ruh ia ka jingmut na ka rukom shon shab jong u briew. Nga ngeit ngi la ioh jingkyrkhu bad sngewthuh kham bha halor kane ka bynta. Ka jingkyntu ka long to ngin long kiba la shah shon shab ha U Blei, khnang ba ngin lait na ka jingshah shon shab ha u mrad khlaw. Wat ym sheptieng ia ka jingshon shab jong u mrad khlaw, hynrei sheptieng ioh phi duh ia ka jingshon shab jong U Blei. Lada ngi duh ia ka jingshon shab jong U Blei, ka jingim jong uta u briew kan long kaba kordit.
Kumta ha kane ka por nga khot ia phi sha U Jisu. Lada phim pat kylla bamut, kylla noh mynta, ngeit bad pdiang ia U Jisu ha ka dohnud jong phi, bad ai ba yn shon shab ia phi da U Mynsiem Bakhuid jong U Blei. Bad haba la shon shab ia phi da U Mynsiem Bakhuid jong U Blei, u Soitan um lah shuh ban dang shon shab halor jong phi.
To U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | June 22, 2021
Comments
Post a Comment