U briew jong ka pop u dei u briew, uba ka jinglong jong u ka long kum u mrad, uba runar, ba bymman bad ia une u briew yn pyntreikam (influence) da u Soitan kumba la thoh ha ka kitab Jingpynpaw 13 lynnong. La tip ruh ia u kum u Khrist lamler, (ha ka ktien phareng ki ong 'Antichrist'. Kaba mut u ba u long mar pyrshah ia U Khrist. U Khrist u leh bha, u Khrist lamler u lehsniew, U Khrist u ialap ia kaba bha, u Khrist lamler un ialap ia kaba sniew, kat kaba u leh ka long mar pyrshah beit bad U Khrist).
Ngin ia peit ia ka jingthmu jong u Paul haba u thoh shaphang utei u briew jong ka pop. Bad da kaba peit ia kane ngin iohi ruh kumno bad lano un mih uta u briew jong ka pop.
Naduh ka por jong u Apostol Paul, Petros bad kiwei kiwei ka don kane ka jingklumar ne jingpynklumar shaphang ka jingwan U Trai (rapture), shaphang ka jingsynshar u mrad khlaw bad shaphang ka jingwan jong U Trai ban bishar kut ia ka pyrthei bad kane ka la ju jia na ka por sha ka por, ha kaba u Apostol Paul, Petros bad kiwei pat ruh ki Apostol ki shem shitom haduh katta katta ban pynshai pynsngewthuh ia ki bangeit, namar bun ki briew kiba mih ban kren, wat ban iathuhlypa ruh (prophecy) ban ong ba u mrad khlaw u lah wan, ka sngi U Trai ka lah wan bad kumta ter ter. Phi lah ban iohi ia kane na ka shithi u Paul sha ki Thessaloni, shithi u Petros bad kiwei kiwei ki dkhot na ka Ktien U Blei.
U Apostol Paul u thoh ha ka shithi sha ki Thessaloni kumne,
¹Te ngi kyrpad ïa phi, ko parabangeit, shaphang kata ka jingwan U Jisu Khrist uba U Trai jong ngi, bad ka jingïalang jong ngi ha u; ²khnang ban ym pynkhih shen ïa phi na la ka jingmut, lymne pynkhuslai ïa phi, lane da ka mynsiem, ne da ka ktien, ne da ka shithi kumba na ngi keiñ, kumba kata ka sngi ka jong U Khrist ka la wan. ³Wat ai ba uno uno ruh un shukor ïa phi da kaba kumno kumno ruh: naba kata kan ym wan, lymda jia shuwa kata ka jingphaidien, bad ba yn ïoh pynpaw noh ïa uta u briew jong ka pop, u khun jong ka jingjot; ⁴uta uba ïaleh pyrshah bad uba pynsarong ïa lade pyrshah ïa baroh ba la khot “Blei” lane ba ju mane; kat haduh ba u shong ha ka templ U Blei, u da leh Blei ïa lade. ⁵Hato phim ïakynmaw, ba, mynba nga dang don lem bad phi, ngi la ïathuh ha phi ïa kine kiei kiei ruh? ⁶Bad mynta phi ïatip ïa kata kaba pynpep, khnang ïa ka ban pynpaw noh ïa u ha kata ka Ïa jong u hi. ⁷Namar kata ka jingmaïan ka jingbymñiew hukum ka la trei lypa: tang ba don uwei uba khang mynta, tad ynda yn weng noh ïa u. ⁸Ynda kumta, yn pynpaw noh ïa uta u bymñiew hukum, ïa uba U Trai Jisu un pynïap da ka jingpyrsad ka shyntur jong u, bad un pyndam noh thiaw da ka jingpynpaw kata ka jingwan jong u; ⁹uta keiñ uba ka jingwan jong u ka long katba kum ka jingtrei jong u Soitan, da ka bor, bad ki dak khyllah, bad ki jingphylla balamler baroh, ¹⁰bad da ka jingshukor ka jingbymhok baroh na ka bynta kita kiba jot; naba kim shym la pdiang ïa ka jingieit ïa ka jingshisha, ba yn pynim ïa ki. ¹¹Te namar kane, U Blei un phah ha ki, ïa ka jingtrei ka jingbakla, ba kin ngeit ïa ka lamler; ¹²khnang ba yn ïoh pynrem ïa kita baroh ki bym shym la ngeit ïa ka jingshisha, hynrei, kiba la sngewbha ha ka jingbymhok. 2 THESSALONI 2:1-12
Ha kato ka por, ka Balang ha Thessaloni ka don ha ka jingkhih jingmut, jingkhuslai namar don kiba kren, kiba iathuhlypa ba U Trai u lah dep wan, don ruh kiba ong ba mynta ngi lah im ha ka por jong u mrad khlaw bad kumta ter ter.
Kumta ha ka dkhot ba nyngkong bad ba ar u Apostol Paul u pynshai bad kyntu ia ki bangeit khnang ba kin ym khih jingmut ne khuslai shaphang ka jingrongnoh kumba ka la dep jia, lane kata ka por jong u mrad khlaw ka la wan.
Ha ka dkhot ba lai bad ba saw u ong, wat ai ba uno uno ruh un shukor ia phi da kaba kumno kumno ruh. Kumba nga la ong sha khmat, shibun ki jingbatai ba ki briew ki batai, wat na kita kiba kam kum ki nongiathuhlypa, tang shu don eiei kaba pher, ki lah batai kumne, ki lah batai kumtai. Ka long kumjuh kum ha kine ki sngi ruh, tang shu don eiei kaba kham pher, 'Kane te lah dei ka dak (shap) u mrad khlaw, une te lah dei u mrad khlaw. Haba mih nyngkong ka ATM Card, ki briew ki lah khuslai, kane te imat lah dei u mrad khlaw, nangta mih da ka EPIC Card baroh baroh ki lah khih jingmut imat lah dei u mrad khlaw, nangta mih lei lei sa u ADHAAR Card, lah nang klumar shuh shuh ka pyrthei, une te lah dei beit, bad ynda lah iohi ba um dei uta u mrad khlaw, baroh baroh ki la ia shim, wow kaba pynsuk shisha. Mynta!!! mih sa ka VACCINE, thliem, liem, liem klumar biang ka pyrthei, une te lah dei shisha u mrad khlaw! Baroh, baroh Wow! Ko Mei! ianai iadur! Mih ki jingthoh, mih ki video, mih ki jingkren bad ki jingbatai laiphew jaid khlem da peit, khlem da pynshong nongrim na ka Ktien U Blei.
Hynrei u Apostol Paul u ong, naba kata kan ym wan, lymda jia shuwa kata ka jingphaidien, bad ba yn ïoh pynpaw noh ïa uta u briew jong ka pop, u khun jong ka jingjot; uta uba ïaleh pyrshah bad uba pynsarong ïa lade pyrshah ïa baroh ba la khot “Blei” lane ba ju mane; kat haduh ba u shong ha ka templ U Blei, u da leh Blei ïa lade.
Ha ka dkhot ba San u ong, Hato phim ïakynmaw, ba, mynba nga dang don lem bad phi, ngi la ïathuh ha phi ïa kine kiei kiei ruh? Kaba mut ba u Paul mynba u dang don ryngkat bad ki u lah ju pynshai kumno ba ka jingrongnoh kan wan, bad kumno u mrad khlaw un wan. Hynrei ynda haba um don markhmat, ki wan ki briew ba pynsngewthuh bakla ia ki shaphang kata ka jingrongnoh bad shaphang ka jingsynshar u mrad khlaw kumba nga la ong sha khmat.
Ha ka dkhot ba hynriew u ong, Bad mynta phi ïatip ïa kata kaba pynpep, khnang ïa ka ban pynpaw noh ïa u ha kata ka Ïa jong u hi. U batai ba ia kata ka jingthmu jong u mrad khlaw la pynpep (la khang noh da U Mynsiem Bakhuid) ba un nym lah ban pyntreikam ha ka por jong ka Balang lane katba ym pat rong noh ia ki riewkhuid, khnang ba yn pynpaw ia u ha ka ïa jong u hi. Nga kwah ba phin ioh bha ia kane ka jingmut "ka ïa jong u hi", un nym lah satia ban pyntreikam kam ha ka ïa jong ngi, ka ïa jong ka Balang. Em, em, em.
Ha ka dkhot ba hynñiew u ong, hooid kata ka jingmaïan ka jingbymñiew hukum ka la trei lypa, (wat mynta ruh ka don), tang ba don uwei uba khang mynta. Uta u bymniew hukum un nym lah ban leh donbor. Kumba nga ong ia phi haneng, U Mynsiem Bakhuid un nym pat shah ia u mrad khlaw ban pyntreikam ia ki jingthmu jong u namar ba ka Balang ka dang don. Hynrei ynda la rong noh ia ka Balang, U Mynsiem Bakhuid ruh yn weng noh, hangta uta u mrad khlaw un sa mihpaw bad un synshar katto katne por bad hadien nangta U Trai Jisu un wan ban pyniap noh ia u da ka jingpyrsad ka shyntur jong u bad yn pynduh pyndam noh ia baroh ki jingtreikam jong u mrad khlaw kumba ngi iohi ha ka dkhot ba phra. Hangne phin iohi ia ka jingkhraw bor jong U Trai Jisu, tang shu pyrsad u Soitan u lah iap. Hallelujah
Ha ka dkhot ba khyndai bad ba shiphew u ong ba, uta keiñ (u briew jong ka pop, u Khrist lamler) uba ka jingwan jong u ka long katba kum ka jingtrei jong u Soitan, da ka bor, bad ki dak khyllah, bad ki jingphylla balamler baroh, bad da ka jingshukor ka jingbymhok baroh na ka bynta kita kiba jot. Kane ka lah nang shai shuh shuh kumba shai ka sngi, ba u mrad khlaw un trei donbor hadien ka jingrongnoh ia ki riewkhuid, un pynpaw ia ka bor, ki dak khyllah, bad ki jingphylla ba lamler baroh ban shukor ia kita kiba jot. Ym dei ia ki riewkhuid, hynrei ia kiba jot, naba kim shym la pdiang ïa ka jingieit ïa ka jingshisha, ba yn pynim ïa ki. Kita ki bym treh ban pdiang ia U Jisu.
Ha ka dkhot ba khadwei bad khadar u ong, Te namar kane, U Blei un phah ha ki, (kita kiba jot, ym ha ki bangeit) ïa ka jingtrei ka jingbakla, ba kin ngeit ïa ka lamler; khnang ba yn ïoh pynrem ïa kita baroh ki bym shym la ngeit ïa ka jingshisha, hynrei, kiba la sngewbha ha ka jingbymhok.
Ki bangeit (riewkhuid) kim don bynta eiei ha ka jingsynshar u mrad khlaw lane ha ka jingjynjar bah. Ki don ki briew kiba ngeit ba ka jingrongnoh kan long ha pdeng ka jingjynjar bah, don ruh kiba ngeit ba kan wan hadien ka jingjynjar bah, ki lah ban ngeit katba ki mon, tangba ka jingrongnoh kan wan shuwa ka jingsynshar u mrad khlaw bad shuwa ka jingjynjar bah.
Ka jingkyntu ka long to ngin ym khih khuslai, to ngin nym klumar jingmut, hynrei ngeit bad shakri shitrhem ia U Trai ba yn shem ia ngi kiba bit nam ban ia shem bad U Trai ha kata ka sngi ba un wan ban shaw ia ka Balang lane ki riewkhuid jong U. Lada phim pat kylla bamut, phim pat pdiang ia U Jisu, ngeit bad pdiang noh ia U Trai Jisu ha ka dohnud jong phi bad im ka jingim ba pynsngewbha ia U man ka sngi, khnang ba ngin ioh bynta ia ka jingrongnoh bad ngin ioh lait na kine kiei kiei baroh ki ban sa jia long, na kata ka jingbitar U Blei bad ka jingjynjar bah.
U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Phi lah ban pule ruh ia kane
© Jester Mawlong | June 18, 2021
Comments
Post a Comment