Pynshong nongrim ia ka jingngeit ha ka jingieit

"...ba U Khrist un shong da ka jingngeit ha ki dohnud jong phi; khnang ba haba la pynsuh thied bad ba la pynshong nongrim ha ka jingieit, phin long kiba khlaiñ ban shemphang lem bad ki riewkhuid baroh, kaei ka jingjlan, bad ka lynter, bad ka jingjylliew, bad ka jingjrong: bad ban tip ïa ka jingieit U Khrist kaba palat eh ïa ki jingtip; ba kumta, yn ïoh pyndap ïa phi shaduh ka jingdap U Blei baroh". Ephesos 3:17‭-‬19

Ka long kaba donkam ban hikai ia ki bangeit ban sngewthuh kham jylliew ia ka jingieit U Khrist uba la iap ïapli na ka bynta ki pop jong ngi halor ka diengphna bad ban pynshong nongrim ia ka jingngeit ha kata ka jingieit jong U Khrist.

Ka jingpynshong nongrim ia ka jingngeit ha ki jingkyrkhu ne ki jingmanbha ka long kaba ma haduh katta katta ia u bangeit. Ki briew kiba pynshong nongrim ia ka jingngeit tang ha ki jingkyrkhu phin shem haba ki ia kynduh jingeh tang khyndiat eh ruh ki lah sdang khih, lah sdang ban pyrkhat balei ka jia kumne ia nga, ne tip ioh U Blei um ieit ne ia nga, ne imat nga tlot jingngeit, ne ioh nga lah leh pop ne bad kumta ter ter. Bad lada slem ban ioh jubab, khlem pep kin thut noh ia U Blei ruh kumba long ka tnga u Job. (Job 2:9)

Ainguh ia U Trai, u Job um shym la pynshong nongrim ia ka jingngeit jong u ha ki jingkyrkhu. U Soitan u nang mut ba u Job u ieit ia U Blei namar ba U Blei u kyrkhu ia u, u leh bha ia u, hynrei em, u Job u pynshong nongrim ia ka jingngeit jong u ha ka jingieit ia U Blei. (Pule Job 1:1-22)

Lada la pynshong nongrim ha ka jingieit, kampher kaei kaba wan ha ka jingim, kin lah ban ïeng. 

U Job u ong, la U ai ne u shim ruh ngan kyrkhu ia U Trai, ngan shakri ia U Trai. Hallelujah! Job 1:21

U Paul u thoh sha ki Nong Rom 8:35-39, "Uei u ban pynïakhlad noh ïa ngi na kata ka jingieit ka jong U Khrist? ka lanot lane ka shipa, lane ka jingpynshitom beiñ, lane ka jingthngan, lane ka jinglyngkhuit, lane ka jingma, lane ka waitlam? Kat kumba la thoh: “Na ka bynta jong me la dang pynïap ïa ngi baroh shi sngi, la ñiew ïa ngi kum ki langbrot ïa ka jingpynïap.” Hynrei, ha kine kiei kiei baroh keiñ ngi jop thiaw da uta uba la ieit ïa ngi. Namar nga ngeit skhem ba ka jingïap, lymne ka jingim, lymne ki angel, lymne ki nongsynshar, lymne kiba don bor, lymne kiei kiei ruh kiba long mynta, lymne kiei kiei ruh ki ban sa long, lymne ka jingjrong, lymne ka jingjylliew, lymne kaei kaei ruh kawei pat ka jingthaw, kan ym lah keiñ ban pynïakhlad noh ïa ngi na kata ka jingieit ka jong U Blei kaba ha U Khrist Jisu uba U Trai jong ngi."

Ki briew kiba lah ban ong "Uei u ban pynïakhkad noh ia ngi na kata ka jingieit ka jong U Khrist" dei kita kiba la pynshong nongrim ia la ka jingngeit ha ka jingieit jong U.

Lada phin pule naduh ka Testament Barim haduh ka Testament Bathymmai phin shem ki briew jong U Blei ki dei kiba mad jingeh tam na ki briew baroh. Ka jingshah kren-beiñ, ka jingshah leh-beiñ, jingshah pynshitom beiñ, ka jingshah sympat, ka jingshah set byndi bad kumta ter ter. Hynrei baroh na ki, ki lah ban iaineh bad ïeng skhem haduh bakut. Ka daw ka dei namar ba ki pynshong nongrim ia ka jingngeit jong ki ha ka jingieit jong U Blei.

Pule ia ka life story jong ki briew jong U Blei, naduh ki Nongiathuhlypa, ki synran U Jisu, ki Apostol bad ki bangeit ka Balang banyngkong phin shem ka jingeh halor ka jingeh ki mad, hynrei ki iaineh skhem triang khlem phaidien. Kane ka long ruh kaba ngi dei ban leh. Ngim lah ban tip kaei ka ban jia ia ngi ha ki sngi ban wan, kaei ka jingeh ba ngin ia kynduh? Ngi donkam ban long kiba la khreh ban face lada ka wan ha kano kano ka rukom da kaba ngin pynshong nongrim lypa ia ka jingngeit jong ngi ha ka jingieit U Khrist u ba la iap iapli na ka bynta jong ngi. Bad haba la pynshong nongrim kumta ngin lah ban iaineh skhem haduh ka bakut.

U Paul u duwai ba ki bangeit ha Philipi kin roi ha ka jingieit. Philipi 1:9, "Te ïa kane nga duwai, ba ka jingieit jong phi kan nang ïoh roi kyrhai shuh shuh ha ka jingtip bad ha ka jingshemphang baroh"

Jingkyntu: To ngin ngam kham jylliew ha ka jingieit U Khrist bad ngin leh ia kiei kiei da kaba pynshong nongrim ha ka jingieit U Khrist. La ka dei ban shakri, shakri da ka jingieit ia U Khrist. La ka dei ban ai, ai da ka jingieit ia U Khrist. Namar ba U Khrist u la ieit ia nga, u la aiti ia la ka jingim namar jong nga, nga ruh ngan ai namar ba nga ieit ia U. Ngan shakri, namar ba nga ieit ia U. Kata dei kaba donkam ban leh.

To U Blei un kyrkhu. Amen

© Jester Mawlong | June 3, 2021 12:30 AM