Ia ka jingim jong phi la buhrieh

"Namar phi la ïap noh, bad ïa ka jingim jong phi la buhrieh lem bad U Khrist ha U Blei." Kolossai 3:3

Ha ka khyllipmat ba ngi kylla bamut bad pdiang ia U Jisu, ia ka jingim jong ngi la buhrieh noh lem bad U Khrist ha U Blei.

Shuwa ban iaid shaphang, ngin ia peit halor kane ka kyntien "Buhrieh".

Buhrieh ka mut:

1) Buh ha kata ka rukom kaba yn nym don ba iohi.

2) Buh ha kata ka rukom ba kiwei kin ym ioh.

3) Buh ha jaka kaba shngain.

Kata ka dei ka jingmut buhrieh.

#-1. Haba ong ia ka jingim jong ngi la buhrieh lem bad U Khrist ha U Blei ka mut ba ka jingim jong ngi mynta ka don ha ka jaka kaba kiwei pat ki bor (u Soitan) kim lah ban iohi. Ngi don hapoh ka jingkah jong U Blei.

Salm 91:1 "Uta uba shong ha ka jaka barieh jong U Bahakhlieh Tam Eh, un ïoh ïaineh hapoh ka jingkah jong U Badonbor Baroh. "

#-2. Kaba ar ka long ba mynta ka jingim jong ngi ka don ha ka jaka kaba kiwei pat ki bor (u Soitan) kin ym ioh ne shem satia. La buhrieh bha ia ngi ha kata ka jaka barieh.

Ia ki arngut ki nongsyntiat ba la phah da u Joshua ban leit syntiat ia ka Jericho la buhrieh da ka Rahab (ka nuti) mynba ki shipai jong u syiem Jericho ki la wad ban pyniap ia ki, hynrei namar ba ka Rahab ka la buhrieh ia ki, kine ki briew jong u syiem kim shym la ioh ban pynsniew ia ki. Mut dur, lada ha ka por ba kine ki briew ki wad ia ki, kine ki briew u Joshua kin mih, kin khongoid, kaei ka ban jia ia ki? Lah tikna kin shah kem bad kin iap. Hynrei namar ba ki la rieh khop hangta, ki la lait im. (Joshua 2:1-8)

Ka long ruh ha ka juh ka rukom na ka bynta jong ngi, la buhrieh ia ngi lem bad U Khrist ha U Blei, pynban lada ngi hi ngi leh saitlah, ngi mih na kata ka jaka ba la buhrieh, dei hangta ngin shah pynjot bad lah ban shah pyniap ruh ha u Soitan. Ioannis 10:10 ka ong ba u Soitan u dei u nongtuh, u nongpyniap bad u nongpynjot. Kumta ngi hap ban rieh bha khop ha U Trai uba long jakarieh jong ngi.

Salm 46:1, U Blei u long ka jaka rieh bad ka bor jong ngi, ka jingïarap bahajan eh ha ka jynjar."

#-3. Kaba lai, ka jingim jong ngi mynta ka don ha ka jaka kaba shngain tam, (hapoh ka jingsumar jong U Blei). Nalor ba U kah, u da sumar bha ruh. Kumta ka jingim jong ngi ka don ha ka jingshngaiñ kaba ngim donkam ban khuslai. Ngi dang iohi lyngba ki news ha kine ki sngi ia ka thma hapdeng ka Israel bad ki Hamas kumno ba ka Israel ka la buhrieh ia la ki briew ha kita ki Bomb Shelter jong ka bad kita kiba la ioh rieh ha kita ki Bomb Shelter ki la ioh ia ka jingshngaiñ. Katno tam lei ma ngi, ngi don ha ka jaka kaba shngain na kiba shngain tam. Iaroh ia U Trai!

Mynba ngi dang khynnah ngi ju ialehkai buhrieh tiar (buhrieh uwei sa wad pat da kiwei), don kiba kham nang ban buhrieh haduh ba ka shimpor slem slem bha ban ioh ia kata ka mar ba la buhrieh. Don ruh kaba ki nongwad kim shem shuh. Kata ka long ka jingbuhrieh jong ki khynnah. Katno tam lei kan long kaba eh ban iohi bad ban ioh haba la buhrieh lem bad U Khrist ha U Blei. Lah tikna ba yn ym don shuh ba lah ban shem. Lada dang shem kam dei shuh ka jingbakla jong u jingbuhrieh, hynrei ka dei ka jong u nongrieh.

Kawei pat ka bynta, Balei ba la hap ban buhrieh kumta ia ka jingim jong ngi?

1) Ka jingim jong ngi ka long kaba kordor. U Jisu u la wan naduh na bneng ban wan wad ia ngi. Bad haba u la shem, u la buhrieh ia ngi lem bad U haduh kata ka sngi ba un sa mihpaw ha ka jingrongnoh. (Kolossai 3:4)

2) Don u nongwad. Namar ba ka jingim jong ngi ka long kaba kordor, kumta u don ruh u nongikwah, bad uba wad kumno ban ioh ia ngi, bad uta u dei u Soitan. Ka Bible ka ong ba u Soitan kum u sing ba kyrhuh u ïaid kylleng, u da wad khnang ïa uno uno ruh ba un ïoh nguid tylli. (1 Petros 5:8) U iaid kylleng, u wad ong ka Ktien jong U Blei. Kumta namar ba don u nongwad ban ioh pynjot ia ngi, la donkam ban buhrieh noh ia ngi lem bad U Khrist ha U Blei haduh kata ka sngi.

Phi lah ban kylli, 'balei pat lada lah buhrieh kumta dang don kiba u Soitan u ioh? Ka jubab ka long, ym dei satia ba kam biang ka jaka buhrieh lane u nongbuhrieh, hynrei ka dei ka jingbakla (lehtam) jong u nongrieh. U phet, u mih hi na kata ka jaka ba la buhrieh, kumta ka pynlong ba u Soitan un iohi bad un kem ñiat bad un pynjot. Hynrei lada ngi la rieh khop kum ki nongsyntiat u Joshua, yn nym don ba shem ia ngi haduh ba U Trai un pynpaw ha ka jingrongnoh.

Kane ka dei ka jinghikai ha kane por. To ngin sngewkmen ban tip ba mynta ka jingim jong ngi la buhrieh lem bad U Khrist ha U Blei. Ha kaba ki bor jong ka jingdum u Soitan kin ym lah ban iohi, kin ym lah ban pynjot pynsniew bad ka jingim jong ngi ka don ha ka jaka kaba shngain tam na kiba shngain baroh.

Ka jingkyntu: To ngin rieh khop ha kata ka jaka ba la buhrieh ia ngi, ngin ym mih shabar na kata haduh ba U Trai un da wan ban rongnoh ia ngi.

Na ka bynta ka burom jong U Blei. Amen