Ka jingnoh mynsiem

Balei ba la pynnoh ïa pha, ko ka mynsiem jong nga? bad balei ba pha pynkhih hapoh jong nga? To kyrmen pha ha U Blei: naba ngan sa ïaroh ïa u pat, uba long ka jingkhiah ka khmat jong nga, bad U Blei jong nga. Salm 43:5

Bunsien haba ngi iakynduh ia ki jingeh ki jingialeh, ki jingpang jingshitom bad ki jingjynjar ha ka jingim kan wan beit ka jingnoh mynsiem. Teng teng ngin sngew ba U Trai u la iehnoh ia ngi, teng teng ngin sngew kumba ngi lah shah kyntait bad kumta ter ter.

Kane ruh ka dei kaba une u nongrwai Salm u mad ha ka jingim jong u. Ha ka dkhot ba 2 u ong, Naba me long U Blei ka bor jong nga; balei ba me la kyntait ïa nga? Teng teng u sngew ba u lah shah kyntait ha u briew, ha U Blei. Hynrei ha kaba kum kata ka por, u la hap ban kyntu bad ban pynkynmaw ia la ka jong ka mynsiem ban ong, Balei ba la pynnoh ïa pha, ko ka mynsiem jong nga? bad balei ba pha pynkhih hapoh jong nga? To kyrmen pha ha U Blei: naba ngan sa ïaroh ïa u pat, uba long ka jingkhiah ka khmat jong nga, bad U Blei jong nga.

Ka long ruh ha ka juh ka rukom ha ka jingim jong ngi, kumba nga ong iaphi ba ngi mad ia ki jingeh jingtynjuh kiba teng teng ki la pynnoh mynsiem shisha ia ngi, hynrei ha kaba kum kata ka por ngi hap ban kyntu ia la ka jong ka mynsiem kumba u nongrwai Salm u la kyntu, ban ong, Balei ba la pynnoh ïa pha, ko ka mynsiem jong nga? Shu ngeit ha U Blei uba la kular ban ym iehnoh khunswet ia pha, to ngeit bad to kyrmen ha U.

Ka Ktien jong U Blei ka ong ba kita kiba kyrmen ha u kin ym ioh lehraiñ. Shisha ym don mano mano uba ap kyrmen ha me u ban ïoh lehrain: kita keiñ ki ban ïoh lehrain kiba shetkylla khlem daw. Salm 25:3 

Ha ka por jong ki jingeh jingtynjuh lada ngi pynskhem ia la ka jingngeit bad jingkyrmen jong ngi ha U Trai, ngin iohi ia ka burom jong U bad un ym shah da lei lei ba u nongshun un leh risa halor jong ngi. Ngi donkam ban shu kyntiew ia la ka mynsiem sha U Trai.

U Nongrwai Salm shuh shuh u ong, Sha me, A Trai, nga kyntiew ïa la ka mynsiem. A U Blei jong nga, ha me nga la shaniah, to wat ai ba yn pynlehrain ïa nga; wat ai ba ki nongshun jong nga kin leh risa halor jong nga. Salm 25:1‭-‬2

Da lei lei un nym shah ia u nongshun ban lehrisa. Ngi hap ruh ban kren pyrshah ia u Soitan ban ong, Soitan mem lah ban lehrisa halor jong nga, jingpang jingshitom, jingeh jingjynjar pham lah ban lehrisa halor jong nga. Kata ka dei kaba ngi hap ban leh, ngim dei ban pynnoh mynsiem ha khmat u nongshun.

Shuwa ban pynkut nga kwah ban iathuh ia phi ba U Jisu u la wan khnang na ka bynta kiba tlot ba swai, ba khuslai ba jynjar, u ong, U Mynsiem U Trai U Blei u ha nga; naba U Trai u la pynsleh ïa nga ban ïalap ïa kiei kiei ki babha ha ki bajemnud; u la phah ïa nga ban spaiñ ïa kiba la pait dohnud, ban ïalap ïa ka jingpyllait noh ha kiba la ring mraw, bad ïa kaba plie ïa ka byndi ha kiba la khum; ban ïalap ïa ka snem kaba diang hun ka jong U Trai, bad ïa ka sngi ka jingpynhiar kput U Blei jong ngi; ban pyntngen ïa ki basngewsih baroh; ban buh ha ki basngewsih ha Seïon, ban ai ha ki kaba sien syntiew ha ka jaka ki dpei, ka umphniang ka jingkmen ha ka jaka ka jingsngewsih, ka jaiñkup ka jingïaroh ha ka jaka ka mynsiem kaba khia; ba yn khot ïa ki, “ki dieng ka hok,” “u jingthung U Trai,” ba yn pyndonburom ïa U. Isaïah 61:1‭-‬3

To U Blei un kyrkhu ia phi. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | June 11, 2021