Ka jingshah khangdam (lockdown) ka dei kaba ju jia ia ki briew jong U Blei na ka por sha ka por. Ngi pule ha ka Bible ngi shem kiba bun ki briew jong U Blei ki mad ia ka jingshah khangdam (lockdown) ha ka jingim jong ki ha ki rukom bapher bapher. Ia uwei da kawei ka rukom, ia uwei da kawei pat ka rukom.
Ngin ia peit katto katne na ka Bible shaphang ki briew jong U Blei kiba la mad ia ka jingshah khangdam bad kaei ba ki leh bad kumno ki long.
1. U Jeremiah: Ia u Jeremiah la khangdam (lockdown) ha kawei ka ïing-jah kaba la pynlong ïingbyndi bad hadien nangta la set ia u ha ka byndi poh-khrum kaba ktieh ha kaba u Jeremiah u la ngam ha kata ka ktieh sa ba un iap. Hynrei ka jingshitrhem jong u na ka bynta ka Ktien U Trai kam shym la lip noh. U iai long u Nongiathuhlypa jong U Blei haduh ka jingiap. (Jeremiah 37:1-15; 38:1-13)
2. U David: Ia u David Ia behthong da u syiem Saul ban ioh pyniap ia u namar ka jingbishni ba ki briew ki ai burom bad ki iaroh ia u hadien ka jingjop ia u Goliath. Kumta u David u la phetrieh na khmat u Saul sha ka krem, bad la long kumba lockdown ia u hangta. Hynrei ngi iohi kaei kaba u leh ka long ba ha kata ka krem u pynlut por ban shna jingrwai, ban pynkhraw ia U Trai, ha kaba u la thoh ia ka Salm 57 na kata ka krem. (1 Samuel lynnong 17; 18; 19; 21; 24)
3. U Apostol Paul: U Apostol Paul ruh u la mad ia ka jingshah khangdam (lockdown) ha kaba la set byndi ia u bunsien (Ha Kaisaria, Rom kumba saw snem, u la shah set byndi ruh ha Ephesos). Hynrei ngi iohi ba u Apostol Paul ruh um shym la ud khuslai ia la ka jong ka jingim, hynrei kaei kaba u la leh ka long ba u pyrkhat shaphang ki bangeit, kumno ki im ki man. Kumta da kata ka jingsahnud, ka la pynkhih ia u ban thoh ia ki shithi ban sneng ban kyntu ia ki bangeit kumno ba kin im bad leh kum ki bangeit. (Kam lynnong 21 haduh ka lynnong ba 28).
Na kata ka jaka ba la set slung ia u, u la thoh ia ka shithi sha ki bangeit ha Ephesos, Philipi, Kolossai bad sha u Philemon. Kine ki jingthoh bad jinghikai jong u ki la long ka jingkyrkhu bakhraw haduh kine ki sngi.
4. U Apostol Ioannis: U Apostol Ioannis ha ka por ka jinglong tymmen jong u, u Ia shah pynryngkangpar sha ka dewlynnong Patmos, bad la khangdam (lockdown) ia u hangta. Hynrei wat la hapdeng ka jinglong tymmen jong u, um shym la khnium la ud khuslai shaphang ialade, hynrei u la pynlut por ha ka jingmane ia U Blei. Bad namar kata ka dohnud, U Blei u la shem sngewbha eh ia u bad U la pynpaw ha u Ioannis ia kiei kiei kiba khraw bad ia kiei kiei ki ban sa jia, ha kaba u la thoh ia ka kitab Jingpynpaw. (Jingpynpaw 1:9 ter ter)
Kine ki long ki katto katne ngut ki briew jong U Blei kiba la mad ia ka jingshah khangdam (lockdown), hynrei ngi iohi kumno ki la leh.
Para bangeit baieit, to ngin nym pynlehnohei ia kane ka por lockdown ba dang sah. Wat ai ba ka jingshitrhem jong ngi na ka bynta U Trai kan lip noh. To ngin shim ia ka kabu ba lyngba kane ka lockdown, ngin pyrta ia ka Ktien U Trai la ka long ha kano kano ka dur. Ngin thaw ki jingrwai ban iaroh bad pynkhraw ia U Trai. To ngin shim ia ka kabu ban pynshlur, ban kyntu ia ki para bangeit lyngba ki jingthoh, la ka long lyngba ki WhatsApp, Facebook, Messages bad kiwei kiwei katba ioh lad. To ngin pynlut por ha ka jingmane ia U Trai. To ngin ngam kham jylliew ha ka jingieit bad jingiadei bajan bad U Blei. Kane kan long kaba shem sngewbha hakhmat U Blei bad U Blei un pynpaw ha ngi ia kiei kiei kiba khraw, wat ia ki ba rieh jong U lyngba U Mynsiem Bakhuid.
Ngin nym shu khnium shu ud, ngin nym shu pynlut kai ia ka por tang ha kiei kiei ki ban pynbyrngia ialade. Hynrei to ngin leh eiei na ka bynta U Trai, ka Balang, ki bangeit bad ki mynsiem bakordor.
To U Trai un kyrkhu bad donryngkat bad phi baroh, wat hapdeng jong kane ka lockdown. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | June 02, 2021
Comments
Post a Comment