Tur pyrshah ia ka jingiap

Nga pynshong nongrim ia kane ka jingkren na ka jingim jong u Jakob.

Lada ngi pule ia ka story jong u Jakob ngi shem u dei u briew uba la ioh pateng ia ka jingkular bad ka jingkyrkhu jong U Blei. Ha ka kitab Genesis 12:1-9 la iathuh shaphang ka jingkhot jong U Blei ia u Abraham bad U Blei u la kular ban ai ia ka Ri Kanaan ha u bad ha u symbai jong u. Ban pynlyngkot ia ka jingiathuh, u Abraham u la pynkha ia u Isaak (Gen 21:1-8) bad na u Isaak la kha ia u Iso bad u Jakob kiba long ki khun synrap (twins). (Gen 25:19-26) 

Ka Bible ka iathuh ba naduh ka kpoh jong ka kmie kine arngut ki lah don ka jingialeh, bad ha ka sngi ba kha ia ki, u Iso u la mih shuwa, bad u Jakob u la bat na ka khongdong jat jong u Iso (dkhot 22-26). 

Nangta ngi iohi ter ter ba hadien ba ki lah ia heh ia san, u Iso u la die noh ia ka hok ka jinglong hynmen jong u ha u Jakob u para jong u namar ka syrwa ba shet u Jakob (dkhot 27 ter ter) bad hadien ba u Isaak u la tymmen bad ba la dei ka por ban kyrkhu ia u khun ba nyngkong jong u, u Iso kum uta u nongioh bynta (kumba long ka rukom jong ki Jiw) hynrei ngi iohi kumno u Jakob u la shukor ia u Isaak da kaba u la riam bad leh ialade kumba dei u Iso, kumta namar ba u kpa jong ki u lah tymmen bad byrie ki khmat um ithuh shuh, kumta u la kyrkhu pynban noh ia u Jakob. Bad ynda la wan sa u Iso, u Isaak u ong ba nga lah dep kyrkhu ia u para jong me, u Jakob, bad kumta u Iso u la bitar ia u Jakob bad u la mut ban pyniap noh ia u. (Pule Genesis 27:1-40). 

Te u Iso u la isih ïa u Jakob namar kata ka jingkyrkhu da kaba u kpa jong u, u lah kyrkhu ïa u: bad u Iso u la ong ha la ka dohnud, “Ki sngi ban ïambriew ïa i pa ki la jan; hadien kata, nga, ngan da pynïap noh ïa u Jakob u para jong nga.” (v.41)

Kumta namar ba u Iso u la bitar eh ia u Jakob, u kpa jong ki, u Isaak bad ka Rebekka ki la phah phet rieh noh ia u Jakob sha Haran sha ïing jong u Laban uba long u mama jong u. (dkhot 41-36) 

Bad u Jakob u la shong bad u Laban bad u Laban u la ai kurim ia la ka khun ha u Jakob. Nangta ngi iohi kumno ba u Jakob u la roi haduh katta katta ha ki jingri ki jingdup jong u. (Genesis 28 lynnong ter ter), bad nangta ha ka lynnong ba 31 u Jakob u sdang ban iakhlad noh na u Laban bad u la phet noh nangta ryngkat ka jingmut ban leit phai biang noh sha kata ka ri kaba U Blei u la kular bad ban iasuk noh bad la u jong u hynmen, u Iso. (Genesis 32:1 ter ter). 

Ryngkat ka jingsheptieng, ka jingkhynniuh hynrei u la tur beit ban poi sha kata ka ri ba U Blei u la kular. U tip ba u don u hynmen jong u, uba wad ban pyniap noh ia u bad um tip la un dang map ne em lada yn iakynduh ia u, hynrei watla katta u tur beit shata namar um kwah ban duh ia kata ka ri ba la kular da U Blei. U la tur pyrshah ia kata ka jingiap, bad U Blei uba iohi ia ka dohnud jong u, u la don ryngkat bad u la phah ia ki angel ban synran ia u Jakob.

Ban pynlyngkot ia ka jingiathuh, hadien nangta u Jakob u la leit bad iashem bad la u hynmen ha ka jingsuk bad ka jingsngewbha, bad u la ioh ban shong ha kata ka ri ba la kular da U Blei. (Genesis 33:1 ter ter) 

Bad ka dkhot ba 18 ka ong, Bad u Jakob u la poi suk bha sha ka nongbah Shekhem kaba ha ka ri Kanaan mynba u la wan na Padan-Aram; bad u la pynïeng ïa la ka ïingtrep ha khmat kata ka nongbah.   

Ka jinghikai nangne ka long ba ngi ruh ngi donkam ia kaba kum kane ka mynsiem jong u Jakob. U Jisu U la kular ban ai ha ngi ia kata ka ri ne ka jaka ha kaba yn nym don jingpang jingshitom, jingduk jingjynjar, ha kaba yn nym don jingthngan ne jingsliang bad yn nym jingiap shuh. Ka ri jong ka jingsuk bad ka jingkmen junom. Kumta ngi donkam ia kaba kum ka mynsiem jong u Jakob ban tur pyrshah wat ia ka jingiap khnang ba ngi lah ban poi sha kata ka ri ba la kular U Trai. 

Ïoannis 14:1‭-‬3 “Wat khih khuslai na ka dohnud jong phi: to ngeit phi ha U Blei, to ngeit ha nga ruh. Ha ka ïing U Kpa jong nga don bun ki pulit shongneh; lymda kumta, nga la ïathuh ha phi; naba ngan sa leit noh ban khreh ka jaka ïa phi. Ynda nga la leit noh, bad ba nga la khreh ïa phi ka jaka, ngan wan pat, bad ngan shimti ïa phi ha lade hi, ba ha kaba nga long ma nga, phi ruh phi lah ban long."

Jingpynpaw 21:4, "...te U Blei un ñiad noh ïa ka jingjaw ummat baroh na ki khmat jong ki; bad ka jingïap kan ym long shuh, lymne ka jingsngewsih, lymne ka jingïam, lymne ka jingpang, kan ym long shuh: kita kiei kiei kiba mynshuwa ki la leit noh.”

Ha ka jingiaid lynti sha ka ri jingkular, shibun ki syrngiew jong ka jingiap ngi lah ban iakynduh bad iaid lyngba, hynrei kynmaw ba U Blei un nym iehnoh ia ngi. Salm 23:4 Shisha, la nga ïaid ruh ïa ka them ka syrngiew ka jingïap, ngan ym sheptieng ïa ka basniew; namar me don ryngkat ma me bad nga: u diengduh bad u shanduh jong me, ki pyntngen ïa nga. 

Kumba u la phah ia ki angel ban synran ia u Jakob, un phah ruh na ka bynta jong ngi. Salm 91:11 Naba un hukum ïa la ki angel shaphang jong me, ban sumar ïa me ha ki lynti jong me baroh. Ym tang ki angel, hynrei U Trai hi da U Mynsiem Bakhuid jong U, U synran ia ngi bad un don ryngkat bad ngi.

Para bangeit, lehse don napdeng jong phi ha ka jingiaid lynti bad U Trai, phi la mad shibun ki jingeh ki jingialeh, ki jingpyrshah na ïing na sem, na ka shnong ka thaw, ka jingshah byrngem bad phi sngew la kumba iaid ha ka them ka syrngiew ka jingiap, hynrei ngi donkam ban long kiba shlur ban tur pyrshah wat ia ka jingiap ruh na ka bynta ban ioh ia kata ka ri ba la kular ia ngi, bad lada ngi nud, khlem artatien ngin ioh ia ka kumba long u Jakob, hynrei lada ngi kynran dien noh, ngin nym lah satia ban ioh ia ka. To ngin long shlur, to ngin nang iaid haduh ba ngin da poi sha kata ka ri ba U Blei u la kular.

U Blei un kyrkhu ia phi. Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | June 9, 2021