Philipi 1:15-17, Don shisha kein kiba ialap ia U Khrist wat na kaba sngew pihuin bad kaba iapyneh; don ruh kiba na ka mon sngewbha: kine na ka jingieit, te ki da tip ba la buh ia nga ban long ka jingiada ia ka gospel: kita pat ki ialap ia U Khrist na ka jingiapyneh, ym na ka jingsngur, ba ki da mut ban iapynlang shuh shuh ia ka jingjynjar ha nga ha ki jingkhum jong nga.
U Paul hangne u pyni ia ki nongialap bad ki rukom ialap gospel, kaba kumno ki ialap.
1. Ka jingialap kaba mih na ka jingpihuiñ:
Ka jingialap kaba mih na ka jingpihuiñ ka dei kata ka jingialap kaba ym shym la pynkhih da U Mynsiem Bakhuid bad ka ktien U Blei, hynrei namar ba nga iohi ba utei u ïalap, nga ruh ngan ïalap, namar ba ka Balang utei ka roi bha kumta nga ruh ngan ïalap ba ka Balang jong nga ruh kan roi bha. Ngim dei ban ialap ia U Khrist da kata ka rukom, kata kam dei satia ka jingialap ba U Khrist u kwah.
2. Ka jingialap da kaba ia pyneh:
Ka jingialap da kaba ia pyneh ka dei kata ka jingialap kaba shu pynksan ialade, pynrem ia kiwei. Nga iohi dang ha kine ha ki social media haba la mih kane ka vaccine, ka la don ka jingiakren ka jingiasaid, ka jingkynthoh, ka jingiapharshi kylliang bad kiwei, ka la don ka jingklumar bad ka jingiasaid kaba jur wat hapdeng ki nongialap. La shu ia pyneh, ia pynksan ia la ka jong ka nia ka jutang (yn nai ia kren ia ki bymtip lane bymngeit lei lei), hynrei hapdeng para nongialap, para ba lah ngeit ba lah tip ia U Trai. Ka long kaei kaei kaba sngewsih. Ha ka jaka ban ïalap ia U Khrist, ïalap ia ka gospel, ngi ialap pynrem bad pynksan pynban na ka bynta ka vaccine. Kaba kum kata ka jingialap kadei ka jingialap kaba ia pyneh.
U Paul u kyntu shuh shuh kumne, "Wat leh ei ei ruh da ka jingïapyneh lane da ka jingsarong; hynrei, da ka jingsngewrit da ñiew phi ïa ki paralok kiba kham bha ban ïa lade; khlem da khmih uwei pa uwei tang ïa la ki jong hi, hynrei, uwei pa uwei na phi ïa ki jong kiwei pat keiñ." PHILIPPI 2:3-4
3. Ka jingialap kaba na ka mon sngewbha:
Ka dei ka jingkohnguh jong ngi ia ka jingphah U Trai da la ka mon sngewbha ban ialap ia U Khrist. Kane dei ka jingialap kaba la pdiang hun, kaba U Jisu ruh u kwah ia ngi ban ialap.
U Jisu u ong, “To leit sha ka pyrthei baroh, bad to ïalap ïa ka gospel ha ki bynriew baroh; te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem." MARKOS 16:15-16
Ka jingkhot ka long ia baroh ban ialap ia U Khrist, ban ialap ia ka gospel, hynrei ngim dei ban ialap da kata ka jingpihuiñ, ka jingiapyneh, hynrei ngi dei ban ialap da la ka mon sngewbha, da kaba kohnguh ia ka jingphah U Trai.
Ki synran U Jisu haba u la phah ia ki ban ialap, ki la leit kylleng ban ialap da ka jinglong lakloi, bad ka jingbeit ka dohnud bad haba ki la leit kumta, ngi iohi ia ka jingdonryngkat bad ka jingtrei U Blei, da ki hajar hajar ki mynsiem bakordor ki pdiang bad ngeit ia ka gospel.
To ngin nym ialap ia U Khrist da ka jingpihuiñ, to ngin nym ialap da ka jingia pyneh, hynrei to ngin ialap da ka jinglong lakloi, bad da kata ka jingsngewkhia bad ka jingieit jingsngewsynei ia kiba la jot la rem ha ka pop. Kam dei ia ngi ban ïalap ia kawei pat ka kyrteng, kam dei ia ngi ban ïalap ia ka vaccine, ai uba shim un shim, ai u bym shim un nym shim, ngim dei ban pynrem ban pynksan uwei ia uwei pat.
U Jisu u ong, "Wat bishar, ba yn ym bishar ïa phi. Naba da ka jingbishar ba phi bishar, yn bishar ïa phi: bad da ka jingthew ba phi thew, yn thew pat ïa phi. Balei ruh ba me khmih ïa u thngiat uba ha ka khmat u paralok jong me, hynrei, mem sngew ïa ka khung kaba ha ka khmat jong me hi? MATHAÏOS 7:1-3
Kynmaw wat u Michael u angel rangbah jong U Blei um shym la nud ban bishar pyrshah wat ia u Soitan. Sngap aiu ka Ktien U Blei ka ong, Pynban, kine ruh kumjuh haba ki da phohsniew ki da pynbit-tngit ïa ka doh, bad ki ñiewbeiñ ïa ka jingsynshar, bad ki ïakrenbeiñ ïa ki bakhraw batri. Hynrei, u Mikhal u angel rangbah, mynba u dang ïa-pyneh bad u Soitan, ba u da ïasaid nia shaphang ka met u Moses, um nud ban bishar kat ban krenbeiñ ïa u, hynrei, u la ong, “To U Trai un da sneng ïa me!” Hynrei, kine ki ïakrenbeiñ ïa kat kita kiei kiei ruh ïa kiba kim tip satia; bad kat kita kiei kiei ruh ba ki tip na la ka kynja tynrai, kum ki mrad ba khlem jingmut, ha kita kiei kiei ruh la pynjot ïa ki. JUDAH 1:8-10
4. Ka jingialap kaba mih na ka jingieit:
Ka jingialap kaba mih na ka dohnud kaba dap jingieit ka long kaba la pdiang hun eh da U Blei. Ngi lah ban ïalap, ngi lah ban leh kambah ruh, hynrei lada kata kam mih na ka jingieit kan long tang kum ka wiang rnong ne ka shakuriaw.
U Paul u batai shaphang ka jingieit kumne, La nga kren da ki thylliej ki briew bad ki angel, haba ngam don ka jingieit, nga la jia long kum ka wiang rnong basawa, ne kum ka shakuriaw bariew shaw shaw. Bad la nga don ka jingïathuhlypa, bad nga shemphang ïa ki jingmaïan baroh bad ïa ka jingtip baroh, bad la nga don ruh ka jingngeit baroh kat ban pynkynriah noh ïa ki lum, haba ngam don ka jingieit, ngam long ei ei ruh em. Bad la nga sam ïa kiei kiei baroh kat kiba don ki jong nga ban bsa ïa ki baduk, bad la nga aiti ïa la ka met ban thang, haba ngam don ka jingieit, ngam myntoi ei ei ruh em. Ka jingieit ka ïaishah slem, bad ka leh sbun; ka jingieit kam ju pihuiñ; ka jingieit kam ju leh sarong ïa lade, kam ju pynmeng, kam ju leh khlem akor, kam wad tang ïa kiei kiei ruh la ka jong, kam shait ban khih bitar, kam tharai sniew; kam kmen ha ka jingbymhok, hynrei, ka ïakmen lem bad ka jingshisha; ka ïaishah jem ïa kiei kiei baroh, ka ngeit kloi ïa kiei kiei baroh, ka kyrmen ïa kiei kiei baroh, ka shah ïa kiei kiei baroh. Ka jingieit kan ym duh noh lano lano ruh; hynrei, la ki don ki jingïathuhlypa, yn sa pyndam noh ïa ki; la ki don ki thylliej, kin sa wai noh; la ka don ka jingtip, kan sa dam noh. Te kumta, ka ïaisah ka jingngeit, ka jingkyrmen, bad ka jingieit, kine lai; hynrei, kaba kham kongsan na kine, long ka jingieit." 1 KORINTH 13:1-8, 13
To ngin ït ialade, uba kumno u nongialap nga long. Hato nga ïalap da kaba pihuiñ, kaba iapyneh ne da ka mon sngewbha bad ka jingieit?
Lada ngi shem ba ngi don ha ka thup kaba nyngkong bad ba ar, ngi hap ban kylla bamut kum ki nongialap. Hynrei lada ngi shem ba ngi don ha ka thup kaba lai bad ba saw, Iaroh ia U Trai! Iaid shaphang, iai pynbna ia U Khrist bad ka gospel jong U. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | June 24, 2021
Comments
Post a Comment