Ka long kaba donkam ban iohsngew ia ka jingkhot ba kyrpang (specific calling) jong U Blei ha ka jingim jong ngi la ka long ha kano kano ka bynta. La ka dei ha ka jingshakri ia ka Ktien U Blei, ka jingshakri ha ka jingrwai jingtem (worship) ne ha kano kano ka jingshakri ruh. Namar kaba iohsngew ia ka jingkhot jong U Blei ka iapher na kata kaba trei lane leh eiei da kaba shu iasyllok lane pynsngewthuh ia ngi ban trei. Hooid baroh lehse ngi lah ban leh ne trei, hynrei lada phin peit bha phin shem kan don ka jingiapher bad kita kiba don ka jingkhot bakyrpang jong U Blei.
Baroh ngi lah ban ialap, hynrei bad kita kiba U Blei u la khot kyrpang ia ki ban ialap phin iohi ka don ka jingpher. Baroh ngi lah ban hikai, hynrei bad kita kiba U Blei u la khot ia ki ban hikai ka don ka jingpher. Baroh ngi lah ban ialam jingrwai (worship), hynrei bad kita kiba U Blei u la khot ia ki ha kata ka bynta ka don ka jingpher. La ha kano kano ka bynta ruh.
Ngi iohi ha ka Bible ia ki briew kiba U Blei u khot kyrpang ia ki, kampher la uba bieit ne bastad U da ai ruh bad ka jingaiei kaba kyrpang. To ngin ia peit na ka Bible katto katne shaphang ki briew kiba U Blei u khot ia ki.
1. U Jeremiah: U Blei u la khot ia u Jeremiah naduh ba u dang khynnah ba un long u Nongiathuhlypa. Watla u Jeremiah u ong nga dang khynnah, hynrei U Blei u la buh ia ka Ktien jong U ha u Jeremiah.
Jeremiah 1:4-10 Te ka ktien U Trai ka la wan ha nga, kaba ong, “Haba ngam pat pynlong ïa me ha ka kpoh nga la ithuh ïa me, bad haba mem pat mih na ka kpoh nga la pynkyntang ïa me; nga la thung ïa me ban long u nongïathuhlypa ïa ki jaid bynriew.” Nga te nga la ong, “A Trai U Blei ! Ha khmih, ngam nang kren: naba nga dang khynnah.” Hynrei, U Trai u la ong ïa nga, “Wat ong, ‘Nga dang khynnah:’ naba ha kino kino kiba ngan phah ïa me men leit keiñ, bad ïa kaei kaei kaba ngan hukum ïa me men kren keiñ. Wat sheptieng na ka bynta jong ki: naba nga long lem bad me ïa ka ban pyllait ïa me,” ong U Trai . Ynda kumta, U Trai u la sei ïa la ka kti, bad u la ktah ïa ka shyntur jong nga; bad U Trai u la ong ha nga, “Ha khmih, nga la buh ïa ki ktien jong nga ha ka shyntur jong me: ha khmih, ha kane ka sngi nga la thung ïa me halor ki jaid bynriew bad halor ki hima, ïa ka ban rat noh bad ban pyntwa, ïa ka ban pynduh ruh bad ban pynkyllon; ïa ka ban tei, bad ïa ka ban thung.”
Ngi iohi u Jeremiah um dei uba lah nang lypa ban iathuhlypa lane uba nang ban kren, hynrei haba U Blei u khot, u ai ka jingstad bad ka ktien ban iathuhlypa.
2. U Besalil: La tip ia u Besalil kum uta u briew uba tbit, uba la oh-shrong oh-shrup ia ka Tabernakl U Blei ha ka por jong u Moses. Hynrei haba ngi peit na ka Ktien jong U Blei ngi shem ba dei U Blei uba la khot ia u bad uba la ai jingstad kyrpang ia u ban shna, ban pynitynnad ia ka Tabernakl. Ym dei ba u lah stad lypa ha kita ki jingoh-shrong oh-shrup jong u, hynrei dei haba U Blei u la khot ia u bad u la ai ka jingstad jingshemphang ha kita ki kynja jingshna pynitynnad baroh.
Eksodos 31:1-5 "Bad U Trai u la kren ha u Moses, u da ong, “Ha khmih, nga la khot da ka kyrteng ïa u Besalil u khun u Uri, u khun u Hur, na ka jaid Judah; bad nga la pyndap ïa u da U Mynsiem U Blei, ha ka jingstad, bad ha ka jingshemphang, bad ha ka jingtip, bad ha ki kynja jingtrei baroh, ïa ka ban pyrkhat ïa ki kam bastad, ïa ka ban trei ha ka ksiar, bad ha ka rupa ruh, bad ha ka tama de, bad ha ka buit stad ban shtah ïa ki maw ban thep ïa ki, bad ha kaba mut ha ki dieng ïa ka ban trei ha ka kynja jingtrei baroh."
Haba U Blei u khot, u pyndap. U Blei u ong, Ha khmih, nga la khot.... bad nga la pyndap ïa u da U Mynsiem.
3. Ki synran: Baroh ngi tip ba ki synran jong U Jisu kiba bun hi ki dei ki nongtong dohkha, ki bym don ka jingnang jingstad kaba biang. Ha ka kitab Ki Kam Ki Apostol 4:13 ka ong ba ki long kiba bieit (illiterate). Hynrei U Jisu u khot ia ki bad u ong, “To ale nadien jong nga, te ngan pynlong ïa phi ki nongtong briew.”
(Mathaïos 4:18-19) Bad haba ki la kohnguh ia kata ka jingkhot jong U, U la ai ha ki ka jingstad ban tong ia ki briew (mynsiem bakordor) haduh ba ka la pynlyngngoh ia kiba bun.
Ki Kam 4:13 "Te haba ki la khmih thuh ïa kata ka jingshlur jong u Petros bad u Ïoannis, bad ki la sngewthuh ruh ba ki long ki briew kiba khlem jinghikai bad kiba bieit, ki la ïasngewphylla; hynrei, ki la ithuh ïa ki, ba ki la ju don lem bad U Jisu."
Haba U Blei u khot, ka da pynlyngngoh shisha ia ki briew.
Dei namar kata, nga ong ha kaba sdang ba ka long kaba donkam ban iohsngew ia ka jingkhot jong U Blei la ka long ha kano kano ka bynta jong ka jingshakri. Bad haba U Blei u khot ia phi, wat ym sheptieng, wat ym peit sha lade, uei / kaei phi long, phi bieit ne phi stad (illiterate or educated), kaba kongsan ka long ban iohsngew ia ka jingkhot jong U Blei bad ban shu kohnguh ha kata, U Blei un leh ia la ka jong ka bynta kumba u la leh ia u Jeremiah, u Besalil, ki synran bad kiwei pat ki briew jong U Blei kiba U la khot.
Shuh shuh kaei kaba nga kwah ban kyntu ka long ba haba U Blei u khot ia phi, wat nym ai daw, wat ong ba ngam nang, ngam lah, ngam tip bad wat nym ong ap ngan da leh shuwa kumta kumta lane ngan da pynbit pynbiang shuwa bad kumta ngan sa trei ngan sa leh bad kumta ter ter. Hynrei shu kohnguh ia ka jingkhot jong U, namar ma U, U tip ban pyndap.
Nga duwai ba U Blei un ialam ia phi ba phin shem ia la ka jong ka bynta ha ka jingshakri bad ba phin lah ruh ban sngewthuh ia ka jingkhot jong U bad ba U Blei un ai ha phi ka jingstad jingshemphang ryngkat ka jingpynsleh ha kata ka bynta ba U la khot ia phi khnang ba phin long ka jingkyrkhu ia kiba bun.
U Blei un kyrkhu. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | June 9, 2021
Great! We are blessed. Keep going Deacon. Thanks.
ReplyDeleteThank you so much. God bless you 🙏 May I know you?
Delete