Hato u Covid Vaccine u dei ka Shap jong u mrad khlaw lane u 666?

Intro: Ha kine ki sngi, kiba bun ki briew ki la don ha ka jingklumar bad ka jingsheptieng kaba khraw namar une u Covid Vaccine. Don kiba sheptieng ia ka reaction lane ka side effects jong une u vaccine, don ruh kiba sheptieng ia u thyrnia injection bad kumta ter ter, hynrei kaba ki kham sheptieng eh ka long ba ki pyrkhat ioh lehse une u vaccine u dei ka shap jong u mrad khlaw lane uta u number 666. Hynrei ngi hap ban sngewthuh ka Bible ka ong 'ka dak' (mark), kaba mut kata ka jingbuh dak ban ithuh ba ki long ki nongbud jong u mrad khlaw. Kam ong satia 'ka dawai' (vaccine) kaba hap inject shapoh. Ka jingpyrkhat ioh ba dei ka dak u mrad khlaw ka dei tang ka jingpyrkhat kaba mih namar ka sheptieng palat. Phin shem lada phi iaid marwei mynmiet ha jaka badum, da iohi ia u maw u dieng ruh phin i kum u ksuid, kata ka dei ka jingiohi ha ka jingsheptieng.

Ha kane ka por nga kwah ban ia peit, ia nujor na ka Ktien jong U Blei kumno ka kren ne batai ha kaba iadei bad ka dak u mrad khlaw. Bad shuwa ban iaid shakhmat, nga kwah ban pynshai ba kane ka jingthoh kam mut satia ban promote ia ka vaccine lane ban ong ba ngi dei ban shim beit ne ngim dei ban shim ia ka vaccine, hynrei ka long ba ngin tip ia ka jingshisha jong ka Ktien U Blei la kane ka dei ne em kata ka shap u mrad khlaw. Pynban ka rai ban shim ne ban ym shim ka shong ha ka rai u briew shimet, ban pynbor kam long. Namar wat ia ka jingim bymjukut ruh U Blei u ai ka mon ia u briew ban jied. Ioannis 3:26, 18. 

Haba ngi peit na ka Ktien jong U Blei ngi sngewthuh ba u mrad khlaw un nym pat lah satia ban pyntreikam ia ka shab jong u katba ym pat rong noh ia ka Balang.

Ha ka shithi ba ar sha ki Thessaloni 2:7 ka Ktien U Blei ka ong, Namar kata ka jingmaïan ka jingbymñiew hukum ka la trei lypa: tang ba don uwei uba khang mynta, tad ynda yn weng noh ïa u. U Soitan un ialeh hi katba lah ban pyntreikam da ka buit ka bor jong u, hynrei un nym lah satia, namar ba dang don ba khang ia u mynta. U Apostol Paul u ong tad ynda yn weng noh ia u, kaba mut ia uta u ba khang. 

Uei une u ba khang? U dei U Mynsiem Bakhuid. Dei tang U Mynsiem Bakhuid ba lah ban khang ia ka jingtrei jong ka jingbymniew hukum. 

Lehse phi lah ban kylli, kumno ia U Mynsiem Bakhuid yn weng noh? Ia U Mynsiem Bakhuid yn weng noh haba ia ka Balang la rong noh. Ngi hap ban sngewthuh ba U Mynsiem Bakhuid u don ha ka pyrthei ban pynkynduh ia ki briew ba kin kylla bamut na ka pop (Ioannis 16:8), bad haba ki kylla bamut, ki ngeit bad pdiang ia U Jisu U Mynsiem Bakhuid u wan ban shongsah hapoh jong u bangeit. (1 Kor 6:19) Bad haba ka jingaiei jong U Blei ka la kut, yn rong noh ia ka Balang bad U Mynsiem Bakhuid ruh un sangeh noh ka jingpynkynduh ia ka pyrthei. 

U Apostol Paul u ong ba ngim dei ban pyrkhat khuslai, ba ngin sngewsih kum kita ki bym don jingkyrmen, namar U Trai un wan ban shaw noh ia ngi shuwa ka jingmihpaw u mrad khlaw bad shuwa ka jingjynjar bah.

Hynrei, ngim mon ïa phi ban ym tip, ko parabangeit, shaphang kita kiba ïohthiah, ba phin ym sngewsih kum kita kiwei ki bymdon ka jingkyrmen. Namar lada ngi ngeit ba U Jisu u la ïap bad ba u la mihpat, kumta ruh, ïa kita kiba la ïohthiah ha U Jisu, U Blei un wallam lem bad u. Namar kane, ngi ong ha phi da ka ktien U Trai, ba ma ngi kiba dang im, ïa kiba la pynsah haduh kata ka jingwan U Trai, da lei lei ngin ym ïoh leit shuwa ïa kita kiba la ïohthiah. Naba U Trai hi un wan hiar na bneng bad ka jingrisa, da ka ktien sawa u angel rangbah, bad da ka turoi U Blei: bad kita kiba ïap ha U Khrist kin ïamihpat shuwa. Ynda kumta, ma ngi kiba dang im, ïa kiba la pynsah, yn rong noh ïa ngi lem bad ki ha ki lyoh, ïa ka ban ïashem ïa U Trai ha ka suiñbneng: te kumta, ngin ïailong junom junom lem bad U Trai. 1 THESSALONI 4:13‭-‬17

Ynda la rong noh ia ki riewkhuid, kan don ka jingklumar kaba khraw ha ka pyrthei, kan don ka jingjah jong ki briew, ka jingiawad briew, ka jing crash ki aeroplane, ki train, ki kali bad kiwei kiwei, bad hapdeng kata ka jingklumar kaba khraw, un sa mihpaw u mrad khlaw bad ha kaba nyngkong un pynsuk ia ka pyrthei baroh, haduh ba ka pyrthei kan lyngngoh namar kata ka jinglah jong u ban wan rah ia ka jingsuk hapdeng kat kata ka jingklumar, bad ki briew ka pyrthei baroh (kita ki bym shym la shah rong noh) kin sa ong wow kat une te ym don shuh, kumta kin sdang ban mane ia u (Jingpynpaw 13:1-5)

Nangta un sdang ban kren beiñ ia U Blei ba im bad un ai ruh ka hukum ban thaw ia ka dur jong uta u mrad khlaw bad kata ka dur jong u kan kren briew, bad nangta un pynbor ia ki briew ban mane ia ka dur jong uta u mrad khlaw, bad un sa ong ruh ba hap ban shon shap ia u briew baroh da kata ka shap jong u, bad kat ki bym mane lane pdiang ia ka shap jong uta u mrad khlaw kin ym lah ban die lane thied. (Jingpynpaw 13:14-18)

N.B: Kine kiba ia mane ia uta u mrad khlaw ki dei kita kiba ym shem la thoh ia ka kyrteng jong ki ha ka kitab ka jingim jong U Khun langbrot. Kaba mut kita kiba kyntait ia U Jisu Khrist mynba ka jingaiei ka dang don. Kumta ngi hap ban pyntikna naduh mynta ba ia ka kyrteng jong ngi yn thoh ha ka kitab ka jingim jong U Khun langbrot, bad ba ia ngi yn shon shap da U Mynsiem Bakhuid jong U Blei, bad haba ia ngi la shon shap da U Mynsiem Bakhuid, u mrad khlaw un nym lah shuh ban shon shap nalor. (Ephesos 1:13) Namar u kham khraw uta u ba don hapoh jong ngi ban ia u mynsiem jong u mrad khlaw. (1 Ioannis 4:1-4)

Te kita baroh kiba shong halor ka khyndew kin ïamane dem ïa u, kiba ki kyrteng jong ki ym shym la thoh ha kata ka kitab ka jingim jong uta U Khun langbrot, ïa uba la pynïap la myndanglong ka pyrthei.

JINGPYNPAW 13:8 

Bad ha kane ka por, kin don ki briew ki ban kylla bamut ha ka por jingjynjar bah bad ruh ki Khristan kiba shah iehnoh pynban ki bym treh ban mane lane pdiang ia ka shap jong u mrad khlaw, kita kin hap ban shah pynshitom, don ki ba un ialam mraw, don kiba un pyniap, katba u sngewbit, ki hap ban shah, wat ban iap martar (martyr). Jingpynpaw 13:10. Na ka bynta kiba kum kita ki briew U Blei un pynlyngkot noh ia ki sngi jong ki (un shim noh) namar lada yn ym pynlyngkot noh kin ym lah ban ieng.

Naba hangta, ka kordit bah kan long, kat kaba ym pat ju long naduh myndanglong ka pyrthei haduh mynta, em, lymne kan ym long shuh ruh. Te lymda pyndkut noh ïa kita ki sngi, kan ym lait im kawei ka doh: hynrei, na ka bynta kiba la jied, yn pyndkut noh ïa kita ki sngi. MATHAÏOS 24:21‭-‬22

Ha kata ka jingsynshar jong uta u mrad khlaw, kumba nga la ong iaphi un pynsuk ia ka pyrthei shipor, kumta ki briew kin sngew ba kat kane ka jingsuk ym pat ju don, pynban U Trai un wan kyndit kyndit ban pynjot ia ki baroh.

1 THESSALONI 5:2‭-‬3 Namar phi hi, phi ïatip biang ba kata ka sngi U Trai kan wan kumjuh kum u nongtuh mynmiet. Katba ki dang ong, “Ka jingsuk bad ka jingskhembha”, ynda kumta, ka jingjot bakyndit kyndit kan ngat ha ki, kum ka jingsuh khun ha ka briew kaba punkhun; bad kin ym ïohlait shuh da lei lei.

N.B: Ka sngi U Trai ba u Paul u kren hangne kam dei satia ka jingrongnoh, hynrei ka dei ka sngi ban bishar ia ka pyrthei ba kyntait ia U Jisu, ka sngi ban pynjot ia ki bymman, ka ba jia ha kata ka jingsynshar jong u mrad khlaw.

Kumta kan wan ka jingjynjar bah bad ter ter > ki Israel kin sa pdiang ia U Jisu kum U Messiah > ka jingsynshar shihajar snem > ka jingbishar ba khadduh bad > ka bymjukut.

Ka jingkyntu ka long, ban lait na ka jingshah shon shap ha u mrad khlaw, ban lait na ka jingjynjar bah, ngi donkam ban pynkhreh bha ia la ka jong ka jingim ban ioh ia ka jingrongnoh.

Nga ngeit ngi la sngewthuh ia ka jingshisha jong ka Ktien U Blei lyngba kane ka jinghikai. Ha kane ka por nga don ruh ban pynshlur ia phi iwei pa iwei kiba pule ia kane ka article, haba don kano kano ka jingjia kaba phi sngew sheptieng, sngew artatien, leit sha ka Ktien jong U Blei, peit, nujor kumno ka ong ha kaba ia dei bad kata ka jingjia, kata kan iarap iaphi ba phin ym shu khuslai, shu khih jingmut ha ka jingsheptieng. 

To U Blei un kyrkhu ia phi.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

Phi lah ban pule ruh ia kane harum

U briew jong ka pop

Khublei shibun.

© Jester Mawlong | June 17, 2021